سۋرەتتى تۇسىرگەن – رۋسلان قادىروۆ
جەتىسۋدا 336 جالپى ءبىلىم بەرەتىن ورتا مەكتەپ بار, وندا 129 مىڭنان اسا وقۋشى وقيدى. بۇگىندە بالالاردىڭ جان-جاقتى دامۋىنا, ساپالى ءبىلىم الۋىنا جاعداي جاساۋ جانە ولاردىڭ قاۋىپسىزدىگىن قامتاماسىز ەتۋ – باستى نازاردا. وسى ايتىلعان مۇددەگە سايكەس وڭىرىمىزدەگى 5 اۋدانعا جاڭا اۆتوبۋستار تابىستالدى. سالتاناتتى ءىس-شارادا اۆتوبۋس كىلتىن تابىستاعان وبلىستىق ءبىلىم باسقارماسىنىڭ باسشىسى مارات سۇلەيمەنوۆ مەكتەپ قىزمەتكەرلەرىن قۇتتىقتادى.
– وتكەن جىلى شالعاي ەلدى مەكەندەردەگى بالالاردى تاسىمالداۋ ءۇشىن رەسپۋبليكالىق بيۋدجەتتەن 53,4 ملن تەڭگەگە 7 اۆتوبۋس ليزينگكە الىنىپ, سونىڭ ەكەۋى بىلتىر بەرىلسە, قالعان بەسەۋىن بۇگىن تابىستاپ وتىرمىز. سول سياقتى 2023 جىلى جەرگىلىكتى بيۋدجەتتەن 223 ملن تەڭگە ءبولىنىپ, تاعى 5 اۆتوبۋس بەرىلگەن ەدى. بۇل شارالار ءوز كەزەگىندە وقۋشىلاردىڭ جان-جاقتى دامۋى مەن ساپالى ءبىلىم الۋىنا جاعداي جاساپ, ولاردىڭ قاۋىپسىزدىگىن قامتاماسىز ەتۋگە وڭ ىقپال ەتەدى, – دەدى م.سۇلەيمەنوۆ.
24 ورىندى 5 اۆتوبۋس اقسۋ, الاكول, ەسكەلدى, قاراتال, كوكسۋ اۋداندارىنىڭ مەكتەپتەرىنە بەرىلدى. ەندى ارنايى كولىكتەر اقسۋ اۋدانى يۋ.گاگارين اتىنداعى ورتا مەكتەبىنە قىزىلجار اۋىلىنان, الاكول اۋدانى تەرەكتى ورتا مەكتەبىنە تالدىبۇلاق, ۇشبۇلاق اۋىلدارىنان, ەسكەلدى اۋدانى بالپىق بي اتىنداعى ورتا مەكتەپكە تەڭلىك, تەرەكتى, بوكتەرلى اۋىلدارىنان, قاراتال اۋدانى ق.بايسەيىتوۆ اتىنداعى ورتا مەكتەپكە ايدار اۋىلىنان, كوكسۋ اۋدانى №12 ورتا مەكتەپكە اينابۇلاق ستانساسىنان, كەمەرتوعان اۋىلى رازەزدىنەن وقۋشىلاردى تاسىمالداۋ ءۇشىن قولدانىلادى.
اۆتوبۋستاردىڭ ءبارى ينتەللەكتۋالدى اۆتوماتتى قاۋىپسىزدىكتى تەكسەرۋ جۇيەسىمەن, ەكى قاۋىپسىزدىك بەلدىگى بار ورىندىقتارمەن, سالوننىڭ ارتىنداعى اۆاريالىق شىعۋ ەسىگىمەن, سانيتاريالىق-ەپيدەميولوگيالىق قوندىرعى سەكىلدى قاجەتتىلىكتەرمەن جابدىقتالعان.
– اقسۋ اۋدانى بويىنشا 38 جالپى ءبىلىم بەرەتىن مەكتەپ بار. ونىڭ 27-ءسى – ورتا, 7-ءى – ورتالاۋ, 4-ءى – باستاۋىش مەكتەپ. ءبىزدىڭ اۋداندا 5 مەكتەپتەن وقۋشىلار تاسىمالدانادى. بۇل كۇنى 4 مەكتەبىمىزدە جاڭا اۆتوبۋس بار, تەك سۋىقساي اۋىلىنداعى گاگارين اتىنداعى ورتا مەكتەبىندەگى كولىگىمىز ەسكىلەۋ بولاتىن. ءبىلىم باسقارماسى ءبىزدى قولداپ, مىنە, جاڭاسىن الدىق. قۋانىشىمىزدا شەك جوق. وبلىس اكىمدىگىنە, وبلىستىق ءبىلىم باسقارماسىنا اقسۋ اۋدانى ازاماتتارىنىڭ, حالىقتىڭ اتىنان العىس ايتامىز. وسى كولىكتى بالالاردىڭ يگىلىگىنە بارىنشا پايدالانامىز, – دەيدى اقسۋ اۋداندىق ءبىلىم ءبولىمىنىڭ باسشىسى ايدىنبەك جەكسەمباەۆ.
قازىر 32 باستاۋىش مەكتەپتى وڭتايلاندىرۋ جۇمىسى قولعا الىنىپ, وبلىس اكىمىمەن بەكىتىلگەن ارنايى جول كارتاسى بويىنشا باستاۋىش مەكتەپتەردە وقيتىن وقۋشىلاردى نەگىزگى جانە ورتا مەكتەپتەرگە تاسىمالداۋ جۇمىستارى ۇيىمداستىرىلدى. سول ءۇشىن جەرگىلىكتى بيۋدجەتتەن قوسىمشا تاعى دا 10 اۆتوبۋس الۋعا قاراجات بولىنگەن. ەندى ءار اۋدان وزدەرى كولىك ساتىپ الادى. وسىلايشا, بيىل تاسىمالداۋ ماسەلەسى تولىعىمەن شەشىمىن تاپپاق.
جەتىسۋ وبلىسى
