مەملەكەت باسشىسى قاسىم-جومارت توقاەۆ «ادىلەتتى قازاقستاننىڭ ەكونوميكالىق باعدارى» اتتى جولداۋىندا «كولىكتىك-لوگيستيكالىق الەۋەتتى تولىققاندى ىسكە اسىرۋ ستراتەگيالىق ماڭىزعا يە. قازاقستان سولتۇستىك پەن وڭتۇستىكتى, باتىس پەن شىعىستى بايلانىستىراتىن جاھاندىق جولايرىقتا ورنالاسقان. بۇل ءبىزدىڭ ەلىمىزگە زور مۇمكىندىك بەرىپ وتىر. سوندىقتان كولىك-لوگيستيكا سالاسى ەكونوميكامىزدى العا باستايتىن باستى كۇشتىڭ بىرىنە اينالۋعا ءتيىس», دەپ اتاپ وتكەن ەدى. بۇدان ءبىز وبلىسىمىزداعى «دوستىق-مويىنتى» باعىتىندا ءىرى تەمىرجول جوبالارىن جۇزەگە اسىرىپ, دوستىق شەكارالىق تەمىرجول بەكەتىندە «قۇرعاق» پورت سالۋدىڭ وزەكتىلىگى جوعارى ەكەنىن اڭعارامىز. بۇل تەك جەتىسۋدىڭ عانا ەمەس, ەلىمىزدىڭ ەكونوميكالىق بەلسەندىلىگىن كورسەتەدى.
مىنە, وسى ماقسات شەڭبەرىندە الاكول اۋدانىنا قاراستى دوستىق اۋىلىندا «Nurzholy Customs Service» حالىقارالىق كولىك-لوگيستيكالىق ورتالىعى اشىلدى. بۇل – قازاقستان مەن قىتاي حالىق رەسپۋبليكاسىنىڭ ەڭ العاشقى شەكارالارىنىڭ ءبىرى. جوبانىڭ كوزدەگەن مۇددەسى قويما شارۋاشىلىعى, حالىقارالىق جانە جەرگىلىكتى لوگيستيكا سالاسىندا ەل نارىعىندا ساپالى جانە باسەكەگە قابىلەتتى قىزمەتتەردى ىلگەرىلەتۋ. مۇنى اتالعان نىساننىڭ اشىلۋ راسىمىنە ارنايى كەلگەن كولىك ۆيتسە-ءمينيسترى ماقسات قالياقپاروۆ تا ايتتى.
«ەلىمىزدىڭ كولىك-لوگيستيكالىق الەۋەتىن ارتتىرۋعا مەملەكەت باسشىسى ەرەكشە كوڭىل بولۋدە. «دوستىق-مويىنتى» باعىتىندا تەمىرجول قۇرىلىسىن ساپالى اياقتاۋ – بۇگىنگى كۇننىڭ باستى تاقىرىبى. جوبا جۇزەگە اسقاندا قازاقستان مەن قىتاي اراسىنداعى تاۋار تاسىمالى ەكى جارىم ەسەگە ارتاتىن بولادى. حالىقارالىق كولىك-لوگيستيكالىق ورتالىقتىڭ ەلىمىزدىڭ ەكونوميكالىق دامۋىنا
تيگىزەر پايداسى ۇشان-تەڭىز. بولاشاقتا ورتالىق ازيا مەن ەۋروپا اراسىنداعى تاۋارلىق الىس-بەرىستى بىرنەشە ەسەگە ارتتىرامىز دەگەن جوسپارىمىز بار. قازىرگى تاڭدا جاڭادان اشىلعان امبەباپ كەشەن قىتاي مەن قازاقستان اراسىنداعى ساۋدا-ساتتىقتىڭ جۇمىسىن جانداندىرادى. ەڭ باستىسى, ءاربىر ءىستىڭ بەرەكەسىن حالىق كورۋگە ءتيىس. قازاقستاننىڭ الەمدىك ەكونوميكاداعى باسەكەگە قابىلەتتىلىگىن ارتتىرۋعا ىقپال ەتە وتىرىپ, وڭىرلىك جانە حالىقارالىق كولىك قاتىناسىندا ماڭىزدى ءرول اتقارادى دەپ سەنەمىز», دەدى م.قالياقپاروۆ.
ونىڭ ايتۋىنشا, اۋقىمدى جوباعا 2,8 ملرد تەڭگە ينۆەستيتسيا تارتىلىپ, 120 ادام تۇراقتى جۇمىسپەن قامتاماسىز ەتىلگەن. ودان كەيىن مەملەكەتتىك كىرىستەر كوميتەتىنىڭ توراعاسى جاندوس دۇيسەمبيەۆ جوبانىڭ جاقسى جۇزەگە اسقانىن ايتىپ, حالىقارالىق كولىك-لوگيستيكالىق ورتالىقتىڭ جۇمىسىنا ساتتىلىك تىلەدى.
حالىقارالىق كولىك لوگيستيكالىق ورتالىعىنىڭ ءبىر ەرەكشەلىگى – جەتكىزۋ تىزبەگىن جەڭىلدەتۋ جانە تۇتىنۋشىنىڭ لوگيستيكالىق شىعىندارىن ازايتۋ ءۇشىن قويما جۇمىسى كروسس-دوكينگ (اۆتوكولىكتەن اۆتوكولىككە ارتىق تيەۋ) تەحنولوگياسى ارقىلى جۇزەگە اسادى. ياعني قىتايدان كەلگەن جۇك وتاندىق اۆتوكولىكتەرگە جىلدام تيەلەتىن بولادى. جوبانى ەلىمىزدىڭ قارجى مينيسترلىگى مەملەكەتتىك كىرىستەر كوميتەتى «Nurzholy customs service» جشس-مەن بىرلەسىپ جۇزەگە اسىرىپ وتىر.
كەشەننىڭ ۋاقىتشا ساقتاۋ قويماسى اۋماعىندا كەدەندىك راسىمدەۋ ورتالىعىن ۇيىمداستىرۋمەن جانە ورنالاستىرۋمەن ىسكە اسىرادى. «دوستىق» كەدەن بەكەتىنەن وتەتىن جۇك كولىكتەرىنىڭ سانى تاۋلىگىنە 200-دەن 600-گە دەيىن ۇلعايتىلىپ, تاۋلىكتىك جۇك اينالىمىن 4 مىڭنان 12 مىڭ تونناعا دەيىن ارتتىرۋعا ۇلكەن مۇمكىندىك بەرەدى. بۇل دەگەنىڭىز – ءبىر جىل ىشىندە جۇك اينالىمىن 12 مىڭ توننادان 3 ملن تونناعا دەيىن ارتتىرۋعا قاۋقارلى دەگەن ءسوز.
قويما ءىشى زاماناۋي تالاپتارعا سايكەس بارلىق قاجەتتى ءارى ساپالى قۇرال-جابدىقتارمەن جابدىقتالعان. اتاپ ايتساق, كۇزەت, بەينەباقىلاۋ كامەرالارى, ءورت ءسوندىرۋ جۇيەلەرى جانە ت.ب ءارتۇرلى تاۋاردى وڭدەۋگە ارنالعان زاماناۋي ينفراقۇرىلىمدارمەن جابدىقتارى بار.
شىنىندا, جەر بەتىندەگى حالىقتىڭ تۇتىنۋشىلىق سۇرانىسى كوبەيىپ, وندىرەتىن ءونىم كولەمى ەسەلەپ ارتقان سايىن سونشاما جۇكتى تاسىمالداۋ ماسەلەسى دە كۇن تارتىبىنەن تۇسكەن ەمەس. ادام بالاسى مىڭداعان توننا تاۋاردى ءبىر نۇكتەدەن ەكىنشى نۇكتەگە جەتكىزۋ ماقساتىندا جاڭا تەحنولوگيانىڭ سوڭعى مۇمكىندىكتەرىن پايدالانۋدا. حالقى تىعىز ورنالاسقان قالالار مەن ەلدى مەكەندەر ماڭايىندا جولايرىقتارىمەن قوسا ءىرى قويمالار پايدا بولا باستادى. بۇل رەتتە كولىك تاسىمالى جولدارىنىڭ اۋقىمدى, كەڭ سالالى بولۋى ەلدىڭ الەۋمەتتىك-ەكونوميكالىق ءال-اۋقاتىن جاقسارتۋعا مۇمكىندىك بەرەرى انىق.
جەتىسۋ وبلىسى
