تۇرعىن ءۇي, تۇراقتى جۇمىس. وڭتۇستىكتەن سولتۇستىككە كوشكەندەرگە قانداي كومەك كورسەتىلەدى؟

ەل ىشىندەگى كوشى-قون «قۋاتتى وڭىرلەر – ەل دامۋىنىڭ درايۆەرى» ۇلتتىق جوباسى نەگىزىندە جۇزەگە اسىرىلىپ جاتىر. جوبا ماقساتى وڭىرلەر اراسىنداعى ەڭبەك كۇشىن تەڭەستىرۋ.

2021 جىلى استانادان سولتۇستىك قازاقستان وبلىسىنىڭ تايىنشا قالاسىنا قونىس اۋدارعاندار قاتارىندا قۇرالاي ماساتباەۆا دا بار. ول تايىنشاعا كەلگەلى تۇرمىسى تۇزەلىپ, جەكە كاسىبىن باستاعانىن ايتتى.

«باستاپقى اسكەري دايىندىق» ماماندىعى بويىنشا جوعارى ءبىلىمى بار قۇرالاي 2023 جىلى 1 ملن 380 مىڭ تەڭگە سوماسىندا مەملەكەتتىك گرانت الىپ, شاعىن كونديتەرلىك دۇكەنىن اشقان.

«كوشكەننەن كەيىن وتباسىمىزعا 612 570 تەڭگە سوماسىندا كوشۋگە ماتەريالدىق كومەك بەرىلدى, سونداي-اق بىزگە قالادان مەملەكەتتىك جالعا بەرىلەتىن تۇرعىن ءۇي بەرىلدى», دەدى قونىس اۋدارۋشى.

ايتا كەتەيىك, ۇلتتىق جوبا اياسىندا قونىس اۋدارۋشىلارعا مىناداي مەملەكەتتىك قولداۋ كورسەتىلەدى: 

• كوشۋگە ارنالعان سۋبسيديا – وتاعاسىنا جانە وتباسىنىڭ ءاربىر مۇشەسىنە 70 اەك مولشەرىندە بىرجولعى كومەك;
• وتباسى مۇشەلەرىنىڭ سانى مەن ەلدى مەكەنگە بايلانىستى 15-تەن 30 اەك-كە دەيىنگى مولشەردە 12 اي ىشىندە تۇرعىن ءۇي جالداۋعا جانە كوممۋنالدىق قىزمەتتەرگە اقى تولەۋگە اي سايىنعى سۋبسيديالاۋ;
• قىسقا مەرزىمدى كاسىپتىك وقىتۋعا جىبەرۋ;
• جۇمىسقا ورنالاسۋعا نەمەسە كاسىپكەرلىك باستامانى دامىتۋعا جاردەمدەسۋ;
• ەكونوميكالىق ۇتقىرلىق سەرتيفيكاتتارىن بەرۋ.

«بۇدان باسقا وڭىرارالىق قونىس اۋدارۋعا جاردەم كورسەتەتىن جۇمىس بەرۋشىلەرگە دە تۇرعىن ۇيمەن قامتاماسىز ەتىلگەن جانە كەمىندە 2 جىل مەرزىمگە تۇراقتى جۇمىسقا قابىلداعان ءاربىر قىزمەتكەرى ءۇشىن 400 اەك مولشەرىندە جۇمىسقا ورنالاسۋعا بىرجولعى سۋبسيديا بەرىلەدى. وتكەن جىلى بارلىق قونىس اۋدارعانداردىڭ ىشىندە 4 158 ادام ەڭبەككە جارامدى بولىپ, ونىڭ 3 079-ى تۇراقتى جۇمىسقا ورنالاستىرىلعان, 164 ادام كاسىپكەرلىك قىزمەتپەن اينالىسسا, 35 ادام بيزنەس اشۋ ءۇشىن گرانتتار الدى», دەلىنگەن مينيسترلىك حابارلاماسىندا.