ماسەلەن, ەسكەلدى اۋدانىنا قاراستى كوكجازىق اۋىلىندا بلوكتى-ءمودۋلدى كونسترۋكتسيالاردان تۇرعىزىلعان سپورت كەشەنى بوي كوتەردى. اۋىل بالالارىنىڭ ارمانىنا اينالعان نىسان – ەندى جاستاردىڭ قۇزىرىندا. قالاعان ۋاقىتىندا بارىپ, شىنىقسا بولادى. ءتىپتى ارنايى جاتتىقتىرۋشىلار دا قىزمەت كورسەتەدى. اشىلۋ سالتاناتىندا اۋدان اكىمى ەلدوس احمەتوۆ حالىقتى وسىناۋ قۋانىشىمەن قۇتتىقتادى.
«جاستاردى دامىتۋعا باعىتتالعان مۇنداي يگى ىستەردىڭ بەرەرى مول. وسىنداي سپورت نىساندارىنان الەمدىك ارەنالاردا توپ جاراتىن چەمپيوندار تاربيەلەنىپ شىعاتىنىنا سەنىمدىمىن. سىزدەردى وسى قۋانىشتى وقيعامەن قۇتتىقتاي وتىرىپ, ءار وتباسىنا بەيبىتشىلىك پەن اماندىق تىلەيمىن!», دەدى ە.احمەتوۆ.
جالپى, سپورت كەشەنىنىڭ قۇرىلىسىنا 130 ملن تەڭگەدەن اسا قارجى بولىنگەن. قۇرىلىس جۇمىستارىن «Qaz Damu Construction» جشس ورىندادى. ەكى قاباتتى عيماراتتىڭ اۋماعى – 720 شارشى مەتر. مۇندا ۆولەيبول, باسكەتبول, كۇرەس زالدارى, سونداي-اق ترەناجەر زالى, دۋش جانە باسقا دا قاجەتتى بولمەلەر بار. سالتاناتتى ءراسىم اياقتالعاننان كەيىن شاعىن ۆولەيبولدان العاشقى جارىستار ۇيىمداستىرىلدى.
اتاپ وتسەك, 2020 جىلى ەسكەلى اۋدانى قارابۇلاق اۋىلىندا دەنە شىنىقتىرۋ-ساۋىقتىرۋ كەشەنى اشىلسا, بىلتىر ورقۋساق اۋىلىندا ۆوركاۋتى بار شاعىن سپورت الاڭى, ال سىرىمبەت اۋىلىندا دەنە شىنىقتىرۋ-ساۋىقتىرۋ كەشەنى اشىلعان ەدى. ەندى كوكجازىق اۋىلىنداعى سپورت كەشەنى قاتارعا قوسىلدى.
ال جاركەنت قالاسىندا بۇرىنعى قاراۋسىز قالعان مادەنيەت ءۇيىن جەكە كاسىپكەرلەر كۇردەلى جوندەۋدەن وتكىزىپ, 120 ورىندى جاڭا ««Daraboz»» سپورت كەشەنى رەتىندە اشقان. 53 مىڭعا جۋىق تۇرعىنى بار شاھار جاستارى ءۇشىن بۇل – ۇلكەن مۇمكىندىك. مۇندا وقۋشىلاردان باستاپ, كەز كەلگەن اۋىل ازاماتى 10 سەكتسيا بويىنشا سپورتپەن شۇعىلدانا الادى.
پانفيلوۆ اۋدانى اكىمدىگىنىڭ مالىمەتىنە قاراعاندا, بۇرىن 80-جىلدارداعى قاراۋسىز قالعان عيماراتتا مادەنيەت ءۇيى بولعان.
جاركەنت قالاسى اكىمىنىڭ قاۋلىسىمەن بۇل عيمارات 5 جىل مەرزىمگە جەرگىلىكتى كاسىپكەرلەر يلشات وسمانوۆ پەن اسحات بۋراشوۆقا سەنىمگەرلىك باسقارۋعا بەرىلگەن. ولار 500 ملن تەڭگە ءوز قاراجاتىن سالىپ, عيماراتقا كۇردەلى جوندەۋ جۇرگىزىپ, بارلىق قاجەتتى سپورتتىق قۇرال-سايماندارمەن جابدىقتاپ, سپورت كەشەنىن اشتى.
ەندى جالپى اۋدانى 1 500 شارشى مەتردى قۇرايتىن دەنە شىنىقتىرۋ-ساۋىقتىرۋ كەشەنىنىڭ عيماراتىندا بوكس, كۇرەس, دزيۋدو, گرەك-ريم كۇرەسى, ۇستەل تەننيسى جانە باسقا دا سپورت تۇرلەرىنەن 10 سەكتسيا جۇمىس ىستەيدى. نىساندا ءبىر ۋاقىتتا 120 ادام جاتتىعا الادى. جاڭا سپورت كەشەنىنىڭ ءوز اسحاناسى, جارىسقا كەلگەن سپورتشىلارعا ارنالعان 16 ورىندىق جاتاقحاناسى مەن سپورت زالى بار. سونداي-اق تەوريالىق وقىتۋ ورتالىعى جانە باسكەتبول مەن فۋتبولعا ارنالعان جەكە فۋتزال الاڭدارى بار. مۇندا 10 جاتتىقتىرۋشىدان باسقا جەرگىلىكتى تۇرعىنداردان تاعى 10 ادام جۇمىسقا تارتىلدى. وسىلايشا, 20 جاڭا تۇراقتى جۇمىس ورنى قۇرىلدى. جۇمىسكەرلەردىڭ ورتاشا جالاقى – 100 مىڭ تەڭگە.
«Daraboz» سپورت كەشەنىنىڭ اشىلۋ سالتاناتىنا قاتىسقان اۋدان اكىمى مارات ساعىمبەك مەتسەناتتار مەن جەرگىلىكتى كاسىپكەرلەرگە اۋداننىڭ الەۋمەتتىك ماسەلەلەرىن شەشۋدە قولداۋ كورسەتكەنى, وسكەلەڭ ۇرپاقتىڭ دەنساۋلىعىنا قامقورلىق جاساعانى جانە حالىقتى سپورتقا تارتقانى ءۇشىن شىن جۇرەكتەن العىسىن ءبىلدىردى.
اتاپ وتسەك, بۇل – پانفيلوۆ اۋدانىندا جەرگىلىكتى مەتسەناتتار مەن كاسىپكەرلەردىڭ ەسەبىنەن اشىلعان توعىزىنشى سپورت كەشەنى. سونداي-اق 2023 جىلى بيۋدجەت ەسەبىنەن پەنجىم جانە ۇلكەنشىعان اۋىلدارىندا سپورت كەشەندەرى سالىنىپ, پايدالانۋعا بەرىلدى. ال ءۇشارال اۋىلىندا 100 ورىندىق تاعى ءبىر جاڭا سپورت كەشەنى سالىنىپ جاتىر.
جەتىسۋ وبلىسى
