فوتو: sn.kz
سامار اۋدانى, كوكجوتا اۋىلىندا بولعان جاعدايدى ەستىگەن اۋدان اكىمدىگىنىڭ وكىلدەرى, پوليتسيا قىزمەتكەرلەرى دەرەۋ وقيعا ورنىنا جەتكەن. اۋدان باسشىلىعى مالعا شاپقان جىرتقىشتىڭ سىلەۋسىن بولۋى مۇمكىن دەپ بولجاپ وتىر. سەبەبى قاسقىر قورانىڭ كىشكەنتاي قۋىسىنان كىرىپ كەتۋى نەعايبىل. ونىڭ ۇستىنە قويدى جالماعانىمەن, جارماعان. قۇيرىق تۇسىن ۇڭعىپ كەتىپ وتىرعان.
– بەلگىسىز جىرتقىش قوراعا ەسىكتىڭ ءتۇبىن قازىپ كىرگەن. سىلەۋسىن بە دەپ ويلايمىز. قاسقىر بولسا, قويدى جارىپ كەتەر ەدى. بۇل جىرتقىش قان ىشكەن سەكىلدى. جارالى قويلار باۋىزدالدى. ءبارىن جيناپ الىپ, اۋىل ىرگەسىندەگى مال ولەكسەسىن كومۋگە ارنالعان ورىنعا اپارامىز. سەبەبى جىرتقىشتىڭ سىلەكەيىندە ءتۇرلى اۋرۋلار بولۋى مۇمكىن. وكرۋگ اكىمى كەلتىرىلگەن شىعىندى ەسەپتەيدى, – دەدى سامار اۋدانى اكىمىنىڭ ورىنباسارى قايدار سۇراشەۆ.
ال مال يەسى ەدىلحان سارباسوۆ قويىن قىرعان قاسقىر ما دەپ جورامالداپ وتىر. ازىرشە جورامال عانا. انىعىن اڭشىلار دا ءدوپ باسىپ ايتا الماي وتىر. كوكجوتا اۋىلى ق ۇلىنجون قورىعىنا ىرگەلەس جاتقاندىقتان, اڭ ءتۇرى كوپ مۇندا. ونىڭ ۇستىنە قورىق اۋماعىندا اڭ اۋلاۋعا زاڭمەن تىيىم سالىنعان.
– تاڭەرتەڭ قوراعا كىرىپ بارسام, ءىشى قان-جوسا. قوي قىرىلىپ جاتىر. شوشىپ كەتتىم. كاسىبي اڭشىلار اۋىلعا كىرگەن جانە شىققان ىزىنە دەيىن تاۋىپ الدى. قاسقىر ما دەپ بولجاپ وتىر. شاماسى ۇشەۋ سەكىلدى. بىرەۋىنىڭ ءىزى – ۇلكەن, ەكەۋىنىكى – كىشىلەۋ. اۋەلدە سىلەۋسىن دەپ ويلادىق. اڭشىلاردىڭ ايتۋىنشا, سىلەۋسىن بۇلاي ءبىر ساتتە قىرىپ كەتە المايدى ەكەن. مۇندا جانتۇرشىگەرلىك جاعداي اۋىلدا ءبىرىنشى رەت بولىپ وتىر. بالالار كەشكىسىن جاي كەلەدى. جىرتقىشتار اۋىلدا جايباراقات ءجۇر. الاڭدايتىن بولدىق. ادامعا شاپسا قايتەمىز؟ – دەيدى مال يەسى ەدىلحان سارباسوۆ.
اڭشىلار ءىز كەسىپ كورگەنىمەن, جىرتقىش توعايدىڭ ىشىنە كىرىپ جوق بولعان. اڭ شارۋاشىلىعى ماماندارى قورىق اۋماعىنان تىس جەردە بولسا, 15 اقپانعا دەيىن اتۋعا رۇقسات بەرىپ وتىرعان كورىنەدى. ۆەتەرينار ينسپەكتسياسى دا ءتيىستى مەكەمەلەرگە الدىن الۋ كەرەكتىگىن ەسكەرتىپ وتىر. وسى ورايدا يت-قۇستىڭ مالعا شابۋىل جاساۋ وقيعالارىنىڭ الدىن الۋ ءۇشىن جەرگىلىكتى اڭشىلارعا جانە ورمان شارۋاشىلىعىنىڭ ينسپەكتورىنا جىرتقىشتاردى باقىلاۋعا الۋعا قاتىستى ارنايى تاپسىرما بەرىلدى. ايتا كەتەيىك, ءتۇز تاعىلارىنان قاۋىپ سامار وڭىرىندە عانا ەمەس, باسقا اۋداندارعا دا ءتونىپ تۇر.
شىعىس قازاقستان وبلىسى,
سامار اۋدانى
