فوتو: primeminister.kz
قازاقستاندا ينۆەستيتسيالىق جوبالاردىڭ جالپىۇلتتىق پۋلى اياسىندا بۇگىندە 61 ءىرى جوبانى جۇزەگە اسىرۋ كوزدەلگەن. ونىڭ ىشىندە جەك, جەو نىساندارىن سالۋ, گاز جانە گيدروەلەكتروستانتسيالارىن ىسكە قوسۋ قامتىلعان. 2023 جىلعى كورسەتكىشتەر ينۆەستيتسيا تارتۋ بويىنشا جولعا قويىلعان جۇمىستاردى كورسەتەتىنى اتاپ ءوتىلدى. مەملەكەتتىك ورگاندارعا ينۆەستورلارمەن ءوزارا ءىس-قيمىلدى كۇشەيتىپ, جوبالاردى بەلگىلەنگەن مەرزىمدە پايدالانۋعا بەرۋدى قامتاماسىز ەتۋ تاپسىرىلدى.
سونداي-اق وڭىرلەرگە ينۆەستيتسيا تارتۋ ماسەلەلەرى كوتەرىلدى. ماسەلەن, 2023 جىلى جەتىسۋدا 52,8 ملرد تەڭگەگە جوسپارلانعان 47 ينۆەستيتسيالىق جوبانىڭ بارلىعى ىسكە قوسىلىپ, سونىڭ ارقاسىندا وبلىستا 1200-دەن استام جۇمىس ورنى اشىلدى. ونىڭ ىشىندە جالپىۇلتتىق پۋل اياسىندا 10 ءىرى جوبا جۇزەگە اسىرىلدى. ولاردىڭ قاتارىندا قۋاتتىلىعى 50 مەگاۆاتت جەل ەلەكتر ستانساسى, ونەركاسىپتىك اككۋمۋلياتورلار شىعاراتىن زاۋىت, مۋلتيمودالدى كولىك-لوگيستيكالىق ورتالىق جانە ت.ب. بار.
ينۆەستيتسيالىق جوبالاردى ىسكە اسىرۋ ماسەلەلەرى ينۆەستيتسيالىق شتاب وتىرىستارىندا تۇراقتى نەگىزدە قارالاتىن بولادى.
