كونكۋرسقا بارلىعى 1,5 مىڭداي ونەرلى جاستار قاتىستى, سونىڭ 21 ءبىزدىڭ بالالار ەدى. فەستيۆال ماسكەۋدىڭ «كوسموس» قوناقۇيىنىڭ ۇلكەن كونتسەرتتىك زالىندا بولدى. ءادىل قازىلاردىڭ قاتارىندا يۋ.گريگوروۆيچ اتىنداعى كونكۋرستىڭ «حورەوگراف» نوميناتسياسى بويىنشا ەكى دۇركىن لاۋرەاتى, ن.ساتس اتىنداعى بالالار مۋزىكالىق تەاترىنىڭ قويۋشى-رەجيسسەرى ە.بارىشنيكوۆا, حالىقارالىق دەڭگەيدەگى توپ-پەداگوگتاردىڭ ءبىرى د.اكيمەنكو سياقتى بىلىكتى ادامدار بولدى.
رەسەيدىڭ بارلىق وڭىرلەرىنەن كەلگەن ونەرپاز ۇلاندار اراسىندا «قارلىعاش» ءانسامبلى قازاقستاننان جالعىز بارىپ, «حالىقتىڭ ستيلدىك ءبيى» نوميناتسياسى بويىنشا ونەر كورسەتتى. ولار «سۇلۋ قىزدار» جانە «سەۆەرنىە كارتينكي» اتتى ەكى ءنومىر ورىندادى.
جەڭىمپاز ۇلانداردى پوەزدان پەتروپاۆل قالاسىنىڭ اكىمى س.مۇحامەديەۆ باستاعان رەسمي ادامدار, ۇستازدار مەن تۋىستارى قۋانىشپەن قارسى الدى. «بالالارىمىزدىڭ ۇلكەن جەڭىسكە جەتكەنىنە قۋانىشتىمىز. ولار بۇكىل قازاقستاننىڭ اتىن شىعارىپ, ۇلكەن تابىسپەن ورالىپ وتىر. ءبىز ولاردىڭ بولاشاقتا دا ۇلكەن بيىكتەردەن كورىنۋىن تىلەيمىز», دەدى اكىم ءوزىنىڭ سوزىندە.
ءانسامبلدىڭ كوركەمدىك جەتەكشىسى گالينا جۇماليەۆانىڭ قۋانىشى ەرەكشە دەۋگە بولادى. ول قۋانىشتان تولقىپ تۇرىپ ءوزىنىڭ سەزىمىن بىلاي جەتكىزدى: «شىنىن ايتقاندا ءبىز قاتتى تولقىدىق. رەسەيدىڭ بارلىق وڭىرلەرىنەن كەلگەن حورەگرافيالىق ۇجىمداردىڭ دايىندىعى وتە كۇشتى ەكەن. ءبارى دە جالىنداپ تۇرعان جاستار. ولاردىڭ اراسىندا ءبىزدىڭ ۇجىم مەن ءۇشىن بارىنشا قاراپايىم, سالعىرت بولىپ كورىندى. بىراق ساحناعا شىققاندا ءبىزدىڭ بالالار ەرلەدى. ءوزىمىزدىڭ ۇلتتىق كولوريتىمىزدى جارقىلداتىپ, قازاق ونەرىنىڭ وتىن لاۋلاتىپ جىبەردى. ءبىزدىڭ بالالارعا ءبارى دە قاتتى ريزا بولىپ, ۇزاق ۋاقىت قول سوقتى. ءبىزدىڭ ءبيىمىز فەستيۆالدىڭ ۇلكەن جاڭالىعىنداي بولدى. سوندىقتان دا ءادىل قازىلار بىزگە ءبىرىنشى ورىن بەردى», دەدى ول.
«قارلىعاش» ءانسامبلىنىڭ قۇرىلعانىنا 50 جىلداي ۋاقىت بولعان. ول بۇعان دەيىن دە ەلىمىزدىڭ جانە الەمدىك بىرنەشە ساحنالاردا ونەر كورسەتكەن. تەك سوڭعى جىلدارى عانا شىمكەنت, استانا, الماتى ساحنالارىنان كورىندى. ۇجىمنىڭ قازىرگى حورەوگرافى ۆيكتوريا تيحونكوۆا بىرنەشە جىلداردان بەرى جۇمىس ىستەيدى. ء«بىزدىڭ انسامبل نەگىزىنەن حالىق بيلەرىن ورىنداۋعا ماماندانعان. رەپەرتۋارىمىزدا قازاق, ورىس جانە باسقا دا حالىقتاردىڭ ۇلتتىق بيلەرى بار. ءبىز ماسكەۋگە ءبىرىنشى رەت باردىق, ونداعى مامانداردىڭ ەڭبەگىمىزدى جوعارى باعالاعانىنا قۋانىشتىمىن», دەدى ول.
قارسى الۋشىلار ونەرپازدارعا ءتۇرلى سىيلىقتار, ديپلومدار مەن كۋبوكتار تاپسىردى. ماسكەۋ فەستيۆالىندە ولارعا تۋاپسە قالاسىندا بولاتىن فەستيۆالعا شاقىرۋ بەرىلگەن. سونىمەن بىرگە انسامبل وسى جازدا سانكت-پەتەربۋرگتە بولاتىن فەستيۆالعا قاتىسۋدان ءۇمىتتى.
