بۇل رەتتە ەنەرگەتيكتەر كاسىپوداعىنىڭ توراعاسى ورازبەك بەكباس: «الەۋمەتتىك سەرىكتەستەر اراسىندا ءبارى اشىق جانە پراگماتيكالىق تۇرعىدا بولۋعا ءتيىس. تاراپتاردىڭ كەۋدەمسوقتىققا جول بەرۋىنە ورىن جوق. بۇل سالالىق دەڭگەيدە دە, ەلدىك دەڭگەيدە دە سولاي بولۋعا ءتيىس. قۇجاتتى قابىلداعانعا دەيىن وعان قول قويۋشىلاردىڭ ۇمتىلىسىن, ىنتا-ىقىلاسىن انىقتاۋ ءۇشىن الدىن الا جۇمىستار جۇرگىزىلەتىنى تۇسىنىكتى جايت. قازىردىڭ وزىندە وسى دەڭگەيدە سەرىكتەستەر تاراپتاردىڭ مۇددەلەرىن ەسكەرەتىن بەلگىلى ءبىر ىمىراعا كەلۋى كەرەك. دەمەك, ءوزارا تۇسىنىستىككە دەگەن جول دا وسىدان باستاۋ الادى. ونىڭ ۇستىنە كاسىپوداقتار ءبىر ماقساتتاعى كەلىسىمدەردىڭ بارىنشا الەۋمەتتىك باعىتقا يە بولعانىن قالايدى», دەيدى.
ۇلتتىق ەكونوميكا مينيسترلىگىنىڭ تابيعي مونوپوليالاردى رەتتەۋ جانە باسەكەلەستىكتى قورعاۋ كوميتەتىندە ايماقتىق ەلەكتر جەلىلەرى كومپانيالارىنىڭ قىزمەتتەرىنە تاريف دەڭگەيىن بەلگىلەگەن كەزىندە ەڭبەك نارىعىنداعى احۋالعا جانە وڭىرلەردەگى قىزمەتكەرلەردىڭ ەڭبەكاقىسىن تولەۋگە باعدارلانۋى قاجەت بولعان. اتالعان مينيسترلىك 2019 جىلدىڭ 19 قاراشاسىنداعى بۇيرىعىمەن بەكىتىلگەن تاريفتەردى قالىپتاستىرۋ قاعيدالارىنداعى «ەكونوميكالىق قىزمەت تۇرلەرى بويىنشا» دەگەن ءسوزدى الىپ تاستاۋدى ەنەرگەتيكتەر كاسىپوداعى ۇسىنىپ وتىر.
كاسىپوداق سالاسىنىڭ باسشىسى: ء«بىر قاراعاندا, زيانى جوق بولىپ كورىنەتىن بۇل سوزدەر ەلىمىزدىڭ سالالىق كاسىپوداقتىڭ بارلىق جۇمساعان كۇش-جىگەرىن تولىعىمەن جويدى. ەنەرگەتيكتەردىڭ ماتەريالدىق جاعدايىن جاقسارتۋداعى ينستانتسيالارعا جازىلعان 60-تان اسا حات, وتاندىق ەلەكتر ەنەرگەتيكالىق قاۋىمداستىعىمەن بىرگە دە, بولەك تە جازىلعان 20 ءوتىنىش, سانسىز كەزدەسۋلەر مەن باق-تاعى 30-دان اسا سويلەنگەن سوزدەر بار. جىلىنا جاسالاتىن تاريفتەردى تۇزەتۋ سانىنا قاتىستى شەكتەۋلەردى الىپ تاستاۋ جانە تاريفتەردى قاراۋ كەزىندە كاسىپورىندار قىزمەتكەرلەرىنىڭ ناقتى سانىن ەمەس, نورماتيۆتىك سانىن ەسكەرۋى كەرەك», دەپ وتىر.
جالپى, ەلىمىزدەگى اتالعان سالالىق كاسىپوداق ۇيىمى بىرنەشە جىلدان بەرى ەنەرگەتيكتەردىڭ جاعدايىن بيلىككە جەتكىزۋدى قانشالىقتى قالاسا دا, جارتى جولدان قالىپ قوياتىندىعىن, جەكە باستىڭ شارۋاسى ەمەس, جۇمىسشىلاردىڭ ايماقتارداعى باسقا وندىرۋشىلەرمەن جالاقى جاعىنان تەڭەستىرۋ ماڭىزدى ەكەنىن, مونوپولياعا قارسى اگەنتتىك ماماندارى جاعدايدى تۇسىنگەن سىڭاي تانىتقانىمەن, رەسپۋبليكالىق ماڭىزى بار ءۇش مەگاپوليستەگى ەلەكتر جەلىسى كومپانيالارىنداعى جۇمىسشىلاردىڭ ورتاشا جالاقىسىنا كەلىسىپ, بىراق ماعىناسىن وزگەرتكەن, جۇمساعان ەڭبەكتىڭ باعالانباعانىن ايتادى.
«مەملەكەت باسشىسى كوتەرىڭكى ءتاريفتى قولدانۋعا بۇيرىق بەردى. بۇنداعى الىنعان پايدانى نەگىزگى اكتيۆتى جاڭعىرتۋعا جانە جوندەۋگە, سونداي-اق كادرلاردى بەكىتۋگە باعىتتاۋ كەرەك. بۇل ءبىرىنشى كەزەكتە كاسىپورىن قىزمەتكەرلەرىنىڭ جالاقىسى لايىقتى دەڭگەيدە بولۋعا ءتيىس دەگەندى بىلدىرەدى. بىراق كاسىپورىنداردا ونى قولدانىلۋىنا ءتيىستى باقىلاۋ بولعان ەمەس. سونىڭ سالدارىنان كەيبىر باسشىلار الىنعان پايدانى ماقساتسىز پايدالانۋعا جول بەردى. ارينە, ول جۇمىسشىلاردىڭ جالاقىسىن كوتەرۋگە باعىتتالماعان. سوندىقتان ءبىز قازىر وسى باعدارلامانى جۇزەگە اسىرۋعا قاتىساتىن كاسىپورىنداردىڭ كاسىپوداقتار ۇيىمى الىنعان پايدانىڭ قولدانۋىن باقىلاۋ جونىندەگى جۇمىس كوميسسياسىنا قوسۋدى ۇسىنىپ وتىرمىز. بۇل – جۇمىسشىلار ءۇشىن وتە ماڭىزدى, سوندىقتان ءبىز وسى ۇسىنىسىمىزدىڭ باس كەلىسىمگە ەنگىزىلگەنىن قالايمىز», دەيدى و.بەكباس.
ازىرگە ەنەرگەتيكتەردىڭ ماتەريالدىق جاعدايىن جاقسارتۋ كۇن تارتىبىنەن تۇسپەي تۇر. ۇلتتىق ستاتيستيكا بيۋروسىنىڭ دەرەگى بويىنشا 2023 جىلدىڭ ەكىنشى توقسانىندا جالاقىنىڭ ورتاشا ءمانى 2022 جىلدىڭ ءتيىستى توقسانىمەن سالىستىرعاندا 17,1 پايىزعا ءوسىپ, 365 502 تەڭگەنى قۇراعان. ونىڭ ۇستىنە ەنەرگەتيكتەردىڭ ورتاشا جالاقىسى 304 712 تەڭگە شاماسىندا توقتاپ, ورتاشا رەسپۋبليكالىق جالاقىدان 17 پايىزعا ارتتا قالعانى بار. بۇل سول كەزەڭدە جىلۋ مەن ەلەكتر ەنەرگياسىن ءوندىرۋشى جانە تاراتۋشى كاسىپورىنداردا جالاقى ورتا ەسەپپەن 20,6 پايىزعا كوتەرىلگەن ەدى.
وسىلايشا, ەلىمىزدىڭ سالالىق ەنەرگەتيكتەر كاسىپوداعى ءوز ۇسىنىستارىن جەتكىزدى. ارينە, اتالعان جايدىڭ جاڭعىرىعىندا ەلەكتر ەنەرگەتيكاسى سالاسىنداعى قىزمەتكەرلەردىڭ ەڭبەك قۇقىقتارى مەن الەۋمەتتىك مۇددەلەرى قورعالۋعا ءتيىس.
