سۋرەتتى تۇسىرگەن – ەرلان ومار, «EQ»
وسى رەتتە وتكەن جىلى ۇكىمەت وتىرىسىندا باس قوسقان سالا ماماندارى الداعى بەسجىلدىقتا 14 گيگاۆاتت ەلەكتر قۋاتىن ەنگىزۋدى تاعى ءبىر پىسىقتادى.
مەملەكەت باسشىسى دا ەلىمىزدىڭ ەنەرگەتيكا سالاسىن ودان ءارى دامىتۋدىڭ اسا ماڭىزدىلىعىن, ترانسۇلتتىق مۇناي-گاز كورپوراتسياسىنا ينۆەستيتسيانى تارتۋ قاجەتتىلىگى جونىندە باسا ايتقان بولاتىن. اتالىپ وتىرعان 14 گيگاۆاتت جاڭا ەلەكتر قۋاتى ىسكە قوسىلسا, جاڭارتىلاتىن ەنەرگيا كوزدەرى جوباسىنىڭ اراسىندا سۋ ەلەكتر ستانساسى دا قالىس قالماسى انىق.
بىلتىر رەسپۋبليكا بويىنشا ەنەرگيا كوزدەرىن سالۋ مەن جاڭعىرتۋعا 146,5 ملرد تەڭگە بولىنگەن. ونىڭ 19 ملرد تەڭگەسى 8 ەنەرگوبلوك, 43 قازاندىق جانە 40 تۋربينانى جوندەۋ سەكىلدى جەكە ينۆەستيتسياعا جىبەرىلگەن. وتكەن جىلى استانا قالاسىنداعى №3 جەو, «يۋگو-ۆوستوك» پەن «تۇران» سەكىلدى ەكى جىلۋ گاز ستانساسى ىسكە قوسىلدى.
كوكشەتاۋداعى قازاندىقتاردى, ەكىباستۇز بەن ريددەر قالاسىنداعى جىلۋ ەلەكتر ستانسالارىن كۇردەلى جوندەۋگە جانە ماڭعىستاۋداعى اتوم ەلەكتر كومبيناتىنا جابدىقتاردى ساتىپ الۋعا مەملەكەتتىك رەزەرۆتەن 21 ملرد تەڭگەدەن اسا قارجى بولىنگەن. قازىرگى تاڭدا ەكىباستۇز قالاسىنداعى №1 جىلۋ ەلەكتر ستانساسىنداعى قۋاتى 500 مۆت بولاتىن №1 ەنەرگوبلوكتى قالپىنا كەلتىرۋ جانە جاڭعىرتۋ بويىنشا اۋقىمدى جوبا ىسكە اسىرىلىپ, بيىلعى جىلدىڭ ماۋسىم ايىندا تولىق پايدالانۋعا بەرىلمەكشى. سونىمەن قاتار №2 جىلۋ ەلەكتر ستانساسىنداعى قۋاتى 636 مۆت بولاتىن №3 ەنەرگوبلوك قۇرىلىسىنىڭ جۇمىسى باستالدى. ورال قالاسىنداعى جىلۋ ەلەكتر ستانسالارىن تاراتۋ قۇرىلعىلارى جاڭارتىلىپ, تۇركىستان مەن لەڭگىر قالالارىنداعى قوسالقى ستانساسىنىڭ قۇرىلىسى اياقتالعان. بۇگىندە كوكشەتاۋ (240 مۆت), سەمەي (360 مۆت) جانە وسكەمەن قالالارىندا جىلۋ ەلەكتر ستانساسىن سالۋ ماسەلەسى قاراستىرىلىپ, ەلەكتر ەنەرگياسىن ءوندىرۋ 112,9 ملرد كۆت/ساع قۇرايدى دەپ كۇتىلىپ وتىر.
ەلىمىزدە جىل سايىنعى ينۆەستيتسيا ءليميتى 32 ملرد تەڭگەدەن 428 ملرد تەڭگە ارالىعىن قۇراسا, بۇل سوما ەنەرگيا ءوندىرۋشى ۇيىمداردىڭ نەگىزگى جابدىقتارىن جاڭعىرتۋعا, قايتا جاڭعىرتۋعا ءارى كەڭەيتۋگە مۇمكىندىك بەردى. باتىس ايماقتاعى ەلەكتر جەلىسىن نىعايتۋدا ستراتەگيالىق ماڭىزدى جوبا ىسكە قوسىلىپ, سونىڭ اياسىندا جالپى ۇزىندىعى 780 شاقىرىمعا جۋىق بەس 220 كۆ ەلەكتر بەرۋ جەلىسى سالىنعان.
سونىمەن 2027 جىلعا دەيىن جالپى قۋاتى 6,7 گۆت بولاتىن جاڭارتىلعان ەنەرگيا كوزدەرى نىساندارىن سالۋدىڭ 5 جىلدىق اۋكتسيوندىق كەستەسى بەكىتىلدى. بۇگىندە جالپى قۋاتى 495,6 مۆت بولاتىن جاڭارتىلعان ەنەرگيا كوزدەرىنىڭ 16 نىسانى ىسكە قوسىلىپ, ينۆەستيتسيا كولەمى شامامەن 450 ملن دوللاردى قۇراپ وتىر. جاڭارتىلاتىن ەنەرگيا كوزدەرى سالاسىندا جاڭا اۋقىمدى جوبالاردى جۇزەگە اسىرۋ بويىنشا شەتەلدىك ينۆەستورلارمەن بىرقاتار كەلىسىمگە قول قويىلدى. ءباا, Total Energies جانە China Power International Holding-پەن بىرلەسە جالپى قۋاتى 3 گۆت بولاتىن ءۇش جەل ەلەكتر ستانساسىن سالۋ جوسپارلانىپ وتىر.
