كورەرمەندەر مولبەرتتەگى كونە سۋرەتتەرگە قالتا تەلەفونىنا كوشىرىپ العان «MAGICAL PICTURE» ءموبيلدى قوسىمشاسىن جاقىنداتسا, قالانىڭ ەجەلگى جانە بۇگىنگى كورىنىستەرىنە ءبىر ساتتە كۋا بولادى. قاراپ وتىرساق, وسكەمەن كوپ وزگەرگەن. قانشاما جاڭا عيمارات بوي كوتەرىپ, داڭعىلدار, كوشەلەر سالىندى. «ەلۋ جىلدا ەل جاڭا» دەگەن وسى شىعار. وزگەرگەن وسكەمەن مەن كونە شاھاردى سالىستىرا قاراپ جۇرگەن وقۋشىلار مەن ستۋدەنتتەر كوپ مۇندا. ولار قالانىڭ تاريحى تۋرالى كىتاپتارمەن دە تانىستى. توپتاستىرىلعان تاريحي كىتاپتاردا وسكەمەننىڭ ىرگەسى 1720 جىلى قالاندى دەگەنمەن, ودان ارعىسىن دا تەرەڭدەتە زەرتتەۋىمىز كەرەك. پەتر پاتشانىڭ بۇيرىعىمەن قالا ەمەس, ەرتىس پەن ءۇلبىنىڭ قوسىلعان تۇسىنا قامال سالىنعان شىعار. ال وعان دەيىنگى ەرتىس بويى يەن جاتپاعانى بەلگىلى.
«قالادا ءوتىپ جاتقان كورمەلەردەن قالماۋعا تىرىسامىز. ال بۇل جولعى AR فورماتىنداعى فوتوكورمە ەرەكشە ەكەن. ەرەكشەلىگى سول, وسىدان 50-60 جىل بۇرىن تۇسىرىلگەن فوتوسۋرەتتەرگە قاراپ, بۇگىنگى جەتكەن جەتىستىگىمىزدى باعامداۋعا بولادى. قالا ۇلكەيگەن, گۇلدەنگەن. ەسەسىنە اۋىلدارىمىز توزىپ كەتتى. اۋىلدىق جەردە دە وسىنداي كورمە جاساسا دەپ ويلايمىن», دەيدى 3-كۋرس ستۋدەنتى ءدىلناز ەرمەك.
ءيا, اسىرەسە شەكاراداعى, شالعايداعى اۋىلداردىڭ كەشەگى سۋرەتتەرىن جيناقتاپ, بۇگىنگىسىمەن سالىستىرسا, كورەرمەن دامۋدىڭ كەرى كەتكەنىنە كۋا بولار ەدى. ايتا كەتەرلىگى, «وزگەرگەن وسكەمەن» فوتوكورمەسى اي سوڭىنا دەيىن تۇرادى. كورەمىن دەسەڭىز, كىتاپحانا ەسىگى ايقارا اشىق.
وسكەمەن
