فوتو: Turizm_jane_sport_ministrligi
ء«تورت جىلدىقتىڭ باستى جارىسى 19 قاڭتار مەن 1 اقپان ارالىعىندا كانۆون پروۆينتسياسىنىڭ كاننىن قالاسىندا وتەدى. سالتاناتتى ءىس-شاراعا تۋريزم جانە سپورت ءمينيسترى ەرمەك مارجىقپاەۆ, ۇلتتىق وليمپيادا كوميتەتىنىڭ وكىلدەرى, سپورت ارداگەرلەرى, فەدەراتسيا باسشىلارى مەن مەملەكەتتىك جاتتىقتىرۋشىلار قاتىستى. ءىس-شارا بارىسىندا جاسوسپىرىمدەر وليمپياداسىنىڭ اشىلۋ راسىمىندە تۋ ۇستايتىن سپورتشىلارعا قازاقستان رەسپۋبليكاسىنىڭ تۋى سالتاناتتى تۇردە تاپسىرىلدى. IV قىسقى جاسوسپىرىمدەر وليمپياداسىنىڭ اشىلۋ سالتاناتىندا ەلىمىزدىڭ بايراعىن شورت-ترەكتەن ەل چەمپيونى, سپورت شەبەرىنە ۇمىتكەر ەراسىل شىڭعىسحان جانە كونكيمەن جۇگىرۋ سپورتىنان قر سپورت شەبەرى, سونداي-اق ەل بىرىنشىلىگىنىڭ جەڭىمپازى كريستينا شۋماكوۆا الىپ شىعادى. ءوز كەزەگىندە ەراسىل شىڭعىسحان تۋ ۇستاۋشى رەتىندە كوپشىلىكتىڭ الدىنا شىعىپ, سالتاناتتى تۇردە انت بەردى. جاسوسپىرىمدەر وليمپياداسىندا قازاقستاننىڭ جاسوسپىرىمدەر قۇراماسى سپورتتىڭ 5 تۇرىنەن باق سىناپ, 55 مەدال جيىنتىعىن ساراپقا سالادى. قىسقى ويىنداردا ەل نامىسىن 42 سپورتشى بياتلون, كەرلينگ, كونكيمەن جۇگىرۋ, شورت-ترەك, شاڭعى جارىسى, ترامپليننەن سەكىرۋ, تاۋ شاڭعىسى, شاڭعى قوسسايىسى, فريستايل موگۋل جانە شايبالى حوككەي سپورت تۇرلەرىنەن قورعايدى», دەپ جازىلعان اقپاراتتا.
تۋريزم جانە سپورت ءمينيسترى ەرمەك مارجىقپاەۆ ءسوز سويلەپ, سپورتشىلارعا ساتتىلىك تىلەدى.
«قازاقستان سپورتشىلارى تاۋەلسىزدىك جىلدارىندا بارلىق جاسوسپىرىمدەر وليمپياداسىندا 29 مەدال جەڭىپ الدى, ونىڭ 5-ءى قىسقى ويىندارعا تيەسىلى. ەلىمىزدە قىسقى سپورت تۇرلەرىندە جەڭىسپەن ورىلگەن جاقسى ءداستۇر بار. بۇگىندە تەك ەلىمىزگە عانا ەمەس, بۇكىل الەمگە تانىمال داڭقتى سپورتشىلارىمىز حالىقارالىق قىسقى جارىستاردا ونەر كورسەتىپ, ۇنەمى جۇلدەگەرلەر قاتارىنان كورىنىپ ءجۇردى. ولاردىڭ قاتارىندا شاڭعىشى ۆلاديمير سميرنوۆ, كونكيمەن جۇگىرۋشى ليۋدميلا پروكاشەۆا, بياتلونشى ەلەنا حرۋستالەۆا, مانەرلەپ سىرعاناۋشىلار دەنيس تەن جانە ەليزاۆەتا تۇرسىنباەۆا بار. سىزدەر بۇل ويىندارعا قاتىسا وتىرىپ, زور تاجىريبە جينايسىزدار. وسى قۇندى تاجىريبە بولاشاقتا پايدالى بولاتىنى ءسوزسىز, ويتكەنى سىزدەر قازاقستان ۇلتتىق قۇراماسىنىڭ رەزەرۆى سانالاسىزدار. بۇگىن ءبىز ءداستۇرلى شىعارىپ سالۋ راسىمىنە قاتىسىپ وتىرمىز. سىزدەرگە الداعى جارىستا تەك ساتتىلىك تىلەيمىن. وسىعان دەيىن جيعان بار شەبەرلىكتەرىڭىزدى, قابىلەتتەرىڭىزدى پاش ەتىپ, جوعارى ناتيجە كورسەتۋلەرىڭىزگە جانە جەكە رەكوردتارىڭىزدى جاڭارتۋعا تىلەكتەسپىن! ءبىز سىزدەرگە جانكۇيەر بولىپ, جەڭىس تۇعىرىنان كورىنۋلەرىڭىزگە شىن نيەتپەن تىلەۋلەس بولامىز», دەدى ە.مارجىقپاەۆ.
14-17 جاس ارالىعىنداعى جاسوسپىرىمدەردىڭ قىسقى الامانىنان الەمنىڭ 70 ەلىنەن سپورتشىلار قاتىسىپ, 7 سپورت ءتۇرىنىڭ 15 باعدارلاماسى بويىنشا 81 مەدال جيىنتىعىنا تالاسادى.
