فوتو: بقو اكىمىنىڭ ءباسپاسوز قىزمەتى
«مەملەكەت باسشىسىنىڭ وڭىرلەردە ازاماتتاردى قابىلداۋ ورتالىقتارىن كەڭەيتۋ بويىنشا تاپسىرماسىن ورىنداۋ ماقساتىندا ورال جانە اقساي قالاسىندا ازاماتتاردى قابىلداۋ ورتالىعى اشىلدى», دەپ حابارلادى باتىس قازاقستان وبلىسى اكىمدىگىنىڭ ءباسپاسوز قىزمەتى.
ء«بىز مەملەكەت باسشىسىنىڭ «حالىق ۇنىنە قۇلاق اساتىن مەملەكەت» تۇجىرىمداماسىن ىسكە اسىرۋ باعىتىندا جۇمىس جۇرگىزىپ جاتىرمىز. مەملەكەتتىك ورگانداردىڭ اشىقتىلىعىن كورسەتەتىن قۇرالدىڭ ءبىرى – ازاماتتاردى جەكە قابىلداۋ. بىلتىر وبلىستىڭ جەرگىلىكتى اتقارۋشى ورگاندارىنىڭ وكىلدەرى 7 746 ازاماتتى جەكە قابىلدادى. وسىنداي ورتالىقتار ازاماتتاردىڭ وزەكتى ماسەلەلەرىن دەر كەزىندە قۇزىرلى ورگان وكىلدەرىنىڭ باسشىلارىمەن بىرلەسە شەشۋگە ىقپالىن تيگىزەدى», دەدى ءوز سوزىندە وبلىس ورتالىعىنداعى ورتالىقتىڭ اشىلۋ سالتاناتىنا قاتىسقان ءوڭىر باسشىسى ناريمان تورەعاليەۆ.
اتالعان ورتالىقتا وبلىس اكىمى الدىن-الا قابىلداۋعا جازىلعان 10 تۇرعىندى قابىلدادى. ازاماتتاردىڭ باسىم بولىگى الەۋمەتتىك ماسەلەلەرىن ايتتى. ءوڭىر باسشىسى ءتيىستى سالا باسشىلارىنا بۇل ماسەلەلەردى شەشۋ بويىنشا تاپسىرما بەردى.
ازاماتتاردى قابىلداۋ ورتالىعى تۇرعىنداردى تولعاندىرىپ جۇرگەن وزەكتى ماسەلەلەردى انىقتاۋ جانە ولاردى شەشۋ ماقساتىندا قۇرىلعان. بۇل جەردە وبلىستىق باسقارمالاردىڭ قۇزىرەتى شەڭبەرىندە كەڭەستەر بەرىلەدى. وبلىس اكىمى, ورىنباسارلارى, بارلىق وبلىستىق باسقارما باسشىلارى مەن ورىنباسارلارى, اۋماقتىق دەپارتامەنت باسشىلارى بىرىڭعاي كەستەگە سايكەس الدىن-الا جازۋ ارقىلى جەكە ادامداردى قابىلدايتىن بولادى.
ەندىگى كەزەكتە ورتالىقتا وبلىستىق باسقارمالار, ورال قالاسى اكىمدىگى جانە «ازاماتتارعا ارنالعان ۇكىمەت» باتىس قازاقستان وبلىسى مەملەكەتتىك كورپوراتسياسى قىزمەتكەرلەرى قابىلداۋ وتكىزبەك.
