مۇراتساي اۋىلىندا 773 ادام, ونىڭ ىشىندە 269 بالا تۇرادى. فەلدشەرلىك-اكۋشەرلىك پۋنكتتىڭ شتاتىندا ءبىر فەلدشەر, ءبىر اكۋشەر, ءتورت مەدبيكە جانە ءبىر مەيىرگەر بار.
قۇرىلىسىنا 303 856 168 تەڭگە جۇمسالعان جاڭا عيماراتتا فەلدشەردىڭ قابىلداۋ كابينەتى, ايەلدەرگە ارنالعان قاراۋ بولمەسى, ەمشارا, ەگۋ, سۇزگى, قاقىرىق الۋ, تىركەۋ بولمەلەرى, حيميزاتور, قويما, سانيتارلىق-تۇرمىستىق بولمە كوزدەلگەن. فاپ بارلىق قاجەتتى مەديتسينالىق جابدىقپەن, ۇيىمداستىرۋ تەحنيكاسىمەن, جىلىتۋ جۇيەسىمەن جابدىقتالعان. نىساننىڭ جالپى اۋدانى 330,81 شارشى مەتر, ءبىر اۋىسىمدا 25 ادامدى قابىلداي الادى.
جالپى, 2023 جىلى بوكەي ورداسىنداعى ەكى مەديتسينالىق نىسان كۇردەلى جوندەۋدەن ءوتىپ, جاڭادان ءتورت «جەدەل جاردەم» كولىگى بەرىلدى. وبلىس ورتالىعىنان ەڭ شالعاي جاتقان اۋىل بولعاندىقتان, مامان تاپشىلىعى دا سەزىلەتىن. سوعان وراي اۋدانعا بىلتىر ەكى مامان كەلدى, ال 2024 جىلى تاعى ءتورت دارىگەر جاس ماماندى ورنالاستىرۋ جوسپارلانعان.
«2024 جىلى بوكەي ورداسى اۋدانىندا تاعى ءتورت مەديتسينالىق پۋنكت عيماراتى كۇردەلى جوندەۋدەن ءوتىپ, ءبىر دارىگەرلىك امبۋلاتوريا سالىنادى. 2025 جىلعا دەيىن ەلدى مەكەندەر تۇرعىندارىن مەديتسينالىق قىزمەتپەن تولىق قامتاماسىز ەتەمىز», دەيدى اۋداندىق اۋرۋحانا ديرەكتورى اناربەك بەليسانوۆ.
وسىنداي جاقسى جاڭالىق بارلىق اۋداندا بولىپ جاتىر. قازتالوۆ اۋدانىنىڭ بوستاندىق اۋىلى تۇرعىندارى دا جاڭا جىل قارساڭىندا جاڭا ەمحانا عيماراتىمەن قاۋىشتى. اۋدان بويىنشا 43 مەديتسينالىق نىساننىڭ حالىققا قالتقىسىز قىزمەت كورسەتۋى ءۇشىن مەملەكەت بار مۇمكىندىكتى جاسايدى.
جاڭا عيماراتتا دارىگەرلەر كۇنىنە 30 ادامدى قابىلداي الادى. امبۋلاتوريادا 6 كەرەۋەتتىك كۇندىزگى ستاتسيونار, بالانى دامىتۋ, فيزيوپروتسەدۋرا, ستاموتولوگيا, اكۋشەر كابينەتتەرى, زەرتحانا بار. «جاقىندا عانا ءبىزدىڭ امبۋلاتورياعا جاڭا كولىك بەرىلگەن ەدى. وسىنىڭ ءبارى اۋىل تۇرعىندارىنا, حالىققا دەگەن قامقورلىق قوي. ءبىز دە ءوز تاراپىمىزدان حالىققا ساپالى مەديتسينالىق قىزمەت كورسەتۋگە تىرىسامىز», دەيدى جالپى تاجىريبەلىك دارىگەر ءالنۋرا قۇرمانعالي.
«اۋىلدىق دەنساۋلىق ساقتاۋدى جاڭعىرتۋ» ۇلتتىق جوباسى اياسىندا جاڭاقالا اۋدانىندا دا ءبىر مەديتسينالىق نىسان جاڭادان سالىنىپ, ءتورت نىسان تولىق كۇردەلى جوندەلدى.
«وبلىس اكىمى مەن مەكەمە تاراپىنان كورسەتىلەتىن تۇرعىن ءۇي, كوتەرمەاقى سەكىلدى الەۋمەتتىك قولداۋ شارالارىنىڭ ناتيجەسىندە جاڭاقالا اۋدانىندا بەس جاس مامان جۇمىسقا ورنالاستى. سونىڭ ىشىندە كوپجاسار جانە جاڭاقازان اۋىلىنا دارىگەر كەلىپ, ەلگە قىزمەت كورسەتىپ جاتىر. بيىل ناۋقاس تاسىمالداۋعا قاجەتتى تولىق جاساقتالعان 3 مەديتسينالىق كولىك الدىق», دەيدى جاڭاقالا اۋداندىق اۋرۋحاناسىنىڭ ديرەكتورى ەربول سارسەنعاليەۆ.
ايتا كەتەيىك, باتىس قازاقستان وبلىسىندا 2023 جىلى دەنساۋلىق ساقتاۋ جۇيەسىن قارجىلاندىرۋعا 92,8 ملرد تەڭگە قاراستىرىلعان ەدى. مەديتسينالىق ۇيىمداردى جاراقتاندىرۋ ءۇشىن جەرگىلىكتى بيۋدجەتتەن 3,6 ملرد تەڭگە ءبولىنىپ, 337 مەديتسينالىق جابدىق ساتىپ الىندى. 1 712,5 مىڭ تەڭگە جەرگىلىكتى بيۋدجەت قاراجاتىنا 81 اۆتوكولىك الىنىپ, اۋدان مەن اۋىلداعى مەديتسينا مەكەمەلەرىنە تابىس ەتىلدى. 22 دەنساۋلىق ساقتاۋ نىسانىنا كۇردەلى جوندەۋ جۇمىسى ءجۇردى.
«2023 جىلى وبلىسقا كەلگەن 122 جاس مامان جۇمىسقا ورنالاستىرىلدى. سونىڭ ىشىندە 50-ءى اۋىلدىق جەرگە باردى. 92 جاس مامان بىرجولعى كوتەرمەاقى الىپ, 15 مامانعا قىزمەتتىك تۇرعىن ءۇي بەرىلدى», دەيدى باتىس قازاقستان وبلىستىق دەنساۋلىق ساقتاۋ باسقارماسىنىڭ باسشىسى ەرلان توقسانوۆ.
اۋىل حالقىنىڭ دەنساۋلىعىن ساقتاۋ, ولارعا ساپالى مەديتسينالىق قىزمەت كورسەتۋ بيىل دا باستى نازاردا بولماق.
باتىس قازاقستان وبلىسى
