ماۋلەن اشىمباەۆ جەر-جەردە اۋىل مەن اۋدان جۇرتشىلىعى كوتەرگەن ماسەلەلەر پالاتانىڭ الداعى جۇمىسىندا نازارعا الىناتىنىن ايتتى.
«جاڭا جىلدىڭ العاشقى كۇندەرىندە وڭىرلەرگە بارىپ, جۇرتشىلىقپەن كەزدەسۋلەر وتكىزدىك. سونىڭ بارىسىندا حالىقتى الاڭداتىپ وتىرعان وزەكتى ماسەلەلەرگە نازار اۋدارىپ, تۇرعىندارمەن بىرگە تالقىلادىق. ەندى سەناتورلاردان ماڭىزدى ماسەلەلەر بويىنشا دەپۋتاتتىق ساۋالدار كۇتەمىز. سونداي-اق اتالعان تۇيتكىلدەر پارلامەنتتىك تىڭداۋلار مەن ۇكىمەت ساعاتتارىن وتكىزۋ كەزىندە دە ەسكەرىلۋگە ءتيىس. ازاماتتار كوتەرگەن پروبلەمالار سەناتورلاردىڭ ۇدايى نازارىندا بولادى. ءبىز ولاردى وڭ شەشۋ باعىتىندا ناقتى جۇمىس جۇرگىزۋىمىز كەرەك», دەدى سەنات توراعاسى.
ماۋلەن اشىمباەۆ وتىرىس بارىسىندا مەملەكەت باسشىسىنىڭ «Egemen Qazaqstan» گازەتىنە بەرگەن سۇحباتىندا بەلگىلەنگەن ماڭىزدى مىندەتتەرگە دە توقتالىپ ءوتتى. پالاتا سپيكەرى ەل پرەزيدەنتىنىڭ تىكەلەي تاپسىرماسىمەن بيۋدجەت جانە سالىق كودەكستەرىنىڭ جوبالارى ازىرلەنىپ جاتقانىن ايتىپ, سەناتورلاردى اتالعان زاڭداردىڭ سەناتقا كەلۋىن كۇتپەستەن, ءتيىستى جۇمىستى باستاي بەرۋگە شاقىردى. سونداي-اق ول ورتاق ماقساتقا قول جەتكىزۋ ءۇشىن بارشا وتانداستارىمىزدىڭ جۇدىرىقتاي جۇمىلىپ ارەكەت ەتۋى اسا ماڭىزدى ەكەنىن اتاپ ءوتتى.
الداعى پالاتا وتىرىسىندا سەناتورلار «قازاقستان رەسپۋبليكاسىنىڭ كەيبىر زاڭنامالىق اكتىلەرىنە ەكسپورتتىق-كرەديتتىك اگەنتتىك جانە شيكىزاتتىق ەمەس تاۋارلاردىڭ (جۇمىستاردىڭ, كورسەتىلەتىن قىزمەتتەردىڭ) ەكسپورتىن ىلگەرىلەتۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭدى ەكىنشى وقىلىمدا قارايدى. بۇل زاڭ ازاماتتىق جانە بيۋدجەت كودەكستەرىنە, سونداي-اق تاعى 8 زاڭعا تۇزەتۋلەر ەنگىزۋدى كوزدەيدى.
بۇعان دەيىن اتاپ وتىلگەندەي, قۇجات مەملەكەت باسشىسىنىڭ تاپسىرماسىن ورىنداۋ ماقساتىمەن ازىرلەندى. زاڭ شيكىزاتتىق ەمەس ەكسپورتتى دامىتۋ جانە ىلگەرىلەتۋ سالاسىنداعى ۇلتتىق ينستيتۋت مارتەبەسىنە يە ەكسپورتتىق-كرەديتتىك اگەنتتىك قۇرۋعا باعىتتالعان.
سونىمەن قاتار دەپۋتاتتار «2014 جىلعى 29 مامىرداعى ەۋرازيالىق ەكونوميكالىق وداق تۋرالى شارتقا وزگەرىستەر ەنگىزۋ تۋرالى حاتتامانى راتيفيكاتسيالاۋ تۋرالى» زاڭدى قارايدى. زاڭ قۇقىق قولدانۋ كەزىندە انىقتالعان قۇقىقتىق رەتتەۋدەگى ولقىلىقتاردى جويۋعا جانە تەرمينولوگيانى بىرىڭعاي ستاندارتقا كەلتىرۋگە ارنالعان.
زاڭ نورمالارىنا سايكەس ەاەو كوميسسياسىنا ءۇشىنشى ەلدەرگە قاتىستى ستاندارتتاۋ, ارنايى قورعاۋ, دەمپينگكە قارسى, وتەماقى شارالارى بولىگىندە وكىلەتتىكتەر بەرۋ جانە باسقا دا بىرقاتار وزگەرىستەر قاراستىرىلعان.
ودان بولەك, بيۋرو وتىرىسىندا پارلامەنت ماجىلىسىنەن كەلىپ تۇسكەن زاڭدار سەناتتىڭ تۇراقتى كوميتەتتەرىنە ءبولىنىپ بەرىلدى.
