وڭىردە دەپۋتات شەكاراشىلارمەن كەزدەسىپ, «سىرىم» شەكارالىق وتكىزۋ بەكەتىندەگى جاعدايعا نازار اۋداردى. «شەكاراداعى, كەدەندەگى جۇمىسقا بايلانىستى تۋىندايتىن سۇراقتىڭ بارلىعىن جيناقتاپ, تانىسىپ, ءبىلۋ ءۇشىن ارنايى كەلدىم. ءالى دە شەشىلمەي جاتقان ماسەلەلەر بولسا, قولىمىزدان كەلگەنشە كومەك بەرىپ, ۇكىمەتكە, مەملەكەت باسشىسىنا جەتكىزۋ ءۇشىن ءىسساپاردا ءجۇرمىز», دەدى باقتىقوجا ىزمۇحامبەتوۆ.
ءوز كەزەگىندە شەكاراشىلار باتىس قازاقستان وبلىسى مەن رەسەي اراسىنداعى شەكارادا جۇك كولىكتەرى تاۋلىكتەپ كەزەك كۇتەتىنىن ايتتى. الداعى ۋاقىتتا تەكسەرۋ بەكەتتەرىنىڭ سانىن كوبەيتىپ, كولىك وتەتىن جولاقتاردىڭ سانىن ارتتىرۋ جوسپارلانىپ وتىر.
«رەكونسترۋكتسيا جاسالعان سوڭ, بەكەتتىڭ وتكىزۋ قابىلەتى تاۋلىگىنە 25 مىڭ ادامعا دەيىن جەتەدى. بۇل قازىرگى كورسەتكىشتەن ەكى ەسەگە كوپ. كۇن سايىن ءبىز ارقىلى 8 مىڭ كولىك وتەدى. ونىڭ 1,5 مىڭى جۇك كولىگى. شەكارانىڭ وتكىزۋ قابىلەتى جەتىلدىرىلگەن سوڭ, 15 مىڭ كولىك قاتىناي الادى», دەدى بقو شەكارا قىزمەتى دەپارتامەنتى باستىعىنىڭ ورىنباسارى تالعات شايماردانوۆ.
ايتا كەتۋ كەرەك, قارجىلاندىرۋدىڭ جوقتىعىنا بايلانىستى وسى شەكاراعا قاتىستى بىرقاتار ماسەلە ءالى شەشىمىن تاپپاعان. بۇلاردىڭ بارلىعىن دەپۋتات ءوز باقىلاۋىنا الاتىنىن ايتتى.
ودان ءارى دەپۋتات سىرىم وتكىزۋ بەكەتىنەن 12 شاقىرىم قاشىقتا ورنالاسقان «ماحامبەت» شەكارا بولىمشەسىنە, «باتىس» وڭىرلىك قولباسشىلىعىنىڭ جانە 5517 اسكەري بولىمىنە بارىپ, وفيتسەرلەر مەن كەلىسىمشارت بويىنشا مىندەتىن اتقارىپ جاتقان اسكەري قىزمەتشىلەرمەن كەزدەستى.
«مەملەكەتىمىزدىڭ ىرگەسى بەرىك بولۋ ءۇشىن شەكارا قىزمەتى مەن اسكەري بولىمدەردىڭ ماتەريالدىق بازالارىن زاماناۋي جابدىقتارمەن جابدىقتاۋ ماڭىزدى. بۇل – كەزەك كۇتتىرمەيتىن ماسەلەنىڭ ءبىرى. تاعى ءبىر ماڭىزدى تۇيتكىل – مۇندا ءموبيلدى جانە ينتەرنەت بايلانىسى مۇلدە جوق. قاجەت كەزدە روۋمينگ ارقىلى اقىلى تۇردە قوسىلا الادى. وسى سەكىلدى ماسەلەلەردى الداعى ۋاقىتتا ماجىلىستە كوتەرەمىز», دەدى باقتىقوجا ىزمۇحامبەتوۆ.
