پرەزيدەنتتىڭ الداعى اتقارىلاتىن باستى مىندەتتەرگە ايرىقشا ءمان بەرە سويلەۋى 2024 جىلدىڭ ەل ومىرىنە وڭ وزگەرىستەر الىپ كەلەتىن جاۋاپتى جىل بولارىنا سەندىرەدى. ماسەلەن, 2029 جىلعا قاراي ىشكى جالپى ءونىمنىڭ ەكى ەسەلەنۋىن كوزدەيتىن جاڭا ەكونوميكالىق ۇلگىگە كوشۋ ەل ەكونوميكاسى ءۇشىن ماڭىزدى قادام ەكەنىن تاعى ءبىر مارتە قاداپ ايتتى. كوپ كۇتتىرمەي ۇكىمەتتىڭ كەڭەيتىلگەن وتىرىسىندا وسىعان بايلانىستى ناقتى ءىس-شەشىمدەر ايقىندالاتىنىن جەتكىزدى. سىرتقى ساياساتقا كەلەتىن بولساق, مۇنداعى جاسالاتىن ءاربىر قادام تىكەلەي ۇلت مۇددەسىمەن ۇشتاسا جۇزەگە اساتىنىن مالىمدەدى. قازاقستان بيىل بىرنەشە بەدەلدى حالىقارالىق ۇيىمعا توراعالىق ەتەتىنىن وقىعاندا, كوڭىلىمىز مارقايىپ, ەلىمىزدىڭ شەت مەملەكەتتەر اراسىنداعى ابىروي-بەدەلىن اسقاقتاتار مۇنداي باستامالارعا زور ۇمىتپەن كوز تىكتىك. باۋىرلاس حالىقتار اراسىنداعى مادەني-گۋمانيتارلىق بايلانىستاردى كەڭەيتۋ جانە ۇلتتىق سپورت تۇرلەرىن تانىمال ەتۋ ءۇشىن قازاقستاندا دۇنيەجۇزىلىك كوشپەلىلەر وينىن وتكىزۋ يدەياسى جىل مۇراتىمەن جىلى استاسىپ جاتقانى قۋانتادى.
وسى ورايدا ءبىزدى, عالىمداردى تاعى ءبىر ەرەكشە جايت – تاريحي ءىرى تۇلعالار تاعىلىمىمەن تابىستىراتىن ءىس-شارالارعا مەملەكەتتىك دەڭگەيدە كوڭىل ءبولىنىپ وتىرعانى سۇيسىنتەدى. بەلگىلى عالىم قانىش ساتباەۆتىڭ – 125, قازاقتىڭ باتىر ۇلدارى ساعادات نۇرماعامبەتوۆ پەن راحىمجان قوشقارباەۆتىڭ – 100, سونداي-اق جوشى ۇلىسىنىڭ 800 جىلدىعى اتالىپ وتپەك. مۇنىڭ قاباتىندا قازاقستان تاريحىنا قاتىستى اۋقىمدى جوبانىڭ اياقتالۋ كەزەڭى جاقىنداپ قالعانىن ءبىلىپ جاتىرمىز.
2022 جىلعى قاڭتار وقيعاسى تۋرالى بۇعان دەيىن ءدال وسىنشالىق اۋقىمدى جانە اشىق اڭگىمە بولماعان ەدى. سۇحباتتان قايعىلى وقيعانىڭ باسقا دا سەبەپتەرى مەن العىشارتتارى تۋرالى ەگجەي-تەگجەي ماعلۇمات الىپ, كوكەيدە جۇرگەن كوپ سۇراققا جاۋاپ تاپتىق. جىلدار بويى جيناقتالىپ, شەشىمىن تاپپاعان الەۋمەتتىك-ەكونوميكالىق پروبلەمالار قوعامدا نارازىلىق تۋدىرعانى, ال مۇنداي ءساتتى وزگەرىستى قالامايتىن, قوعامداعى تاۋارلاردى ءادىل بولۋگە باعىتتالعان رەفورمالاردى قابىلداعىسى كەلمەيتىن توپ وزدەرىنىڭ مۇددەسىنە پايدالانۋعا ارەكەت ەتكەنى, قىلمىستىق توپتار مەن ارانداتۋشىلار زورلىق-زومبىلىقپەن, تالقانداۋمەن, ورتەۋمەن, م ۇلىكتى جويۋمەن اينالىسىپ, نارازىلىق سوڭى جاعدايدىڭ ۋشىعۋىنا اكەلىپ تىرەگەنى ءمالىم. پرەزيدەنتتىڭ سونداعى باتىل ءىس-ارەكەتى تاۋەلسىزدىك تۋىن شايقالتپاي ۇستاپ قالدى.
پرەزيدەنت ەلىمىزدىڭ ەكونوميكالىق دامۋىنا ايرىقشا توقتالدى. ۇلتتىق ەكونوميكانىڭ كولەمىن ەكى ەسەگە دەيىن ارتتىرۋ ەل الدىندا تۇرعان ايقىن ماقساتتىڭ ءبىرى سانالادى. بۇعان قالاي قول جەتكىزۋگە بولادى؟ رەسۋرستاردى وڭتايلى ءبولۋ جانە ءتيىمدى جوسپارلاۋ ارقىلى عانا ەكونوميكانىڭ تامىرىنا قان جۇگىرەتىنى انىق. وسى ورايدا الەمدەگى ەكونوميكالىق احۋالدىڭ كۇردەلى جاعدايى ەل دامۋىنا سالقىنىن تيگىزبەي تۇرماسىن تىلگە تيەك ەتكەن مەملەكەت باسشىسى كەز كەلگەن قيىندىقتىڭ ءوزى كەيدە جاڭا مۇمكىندىككە جول اشاتىنىن, ول ءۇشىن ۇكىمەتتىڭ سونداي كۇردەلى كەزەڭنەن الىپ شىعاتىن جان-جاقتى ويلاستىرعان جوسپارى بولۋى كەرەكتىگىن ايتتى. پرەزيدەنتتىڭ وسى سوزىنە ءبىز دە تولىعىمەن قوسىلامىز. ۇكىمەتتىڭ كۇندەلىكتى جۇمىسىنداعى باستى قاعيدا وسى ءسوز بولعانى ءجون. ولاي دەيتىن سەبەبىمىز, قازىرگى ازىق-ت ۇلىك پروبلەماسى بولسىن, قىمباتشىلىق پەن باعانىڭ تۇراقسىزدىعى بولسىن, ەلدەگى باسقا دا شەشىمىن تاپپاعان الەۋمەتتىك ماسەلەلەردىڭ قاي-قايسىسى دا ۇكىمەت قابىلداعان شەشىمدەرگە بارىپ تىرەلىپ جاتاتىنى ايدان انىق.
پرەزيدەنتتىڭ بىلىمپازدىق, كاسىبيلىك, ادالدىق سياقتى ادامي قاسيەتتەر تۋرالى مالىمدەمەسى ەرەكشە نازار اۋدارۋعا تۇرارلىق. سونىمەن بىرگە ول جات مادەنيەتكە ەلىكتەۋدى, جالعان ءپاتريوتيزمدى جانە داراقى ماقتانۋدى استە قابىلدامايدى. مەملەكەت باسشىسىنىڭ بۇل تۇرعىدا ايتقاندارى وزىق ويلى زيالى قاۋىم وكىلدەرىنىڭ دە ويلارىمەن ءاردايىم قابىسىپ تۇراتىنى ەش كۇمان تۋعىزبايدى. ادامي قاسيەتتەر مەن ۇلتتىق قۇندىلىقتار جايىندا قوزعاعان ويلارى مەن ءاربىر ءسوزىن جانىمىزعا جاقىن تۇتامىز ءارى قوعامنىڭ وڭ وزگەرىسىنە ءبىز دە كۇش-قايراتىمىزدى اياماي جۇمساي بەرەمىز.
وسى سۇحباتتى وقىپ وتىرعاندا تاعى ءبىر ءىشىمىزدى جىلىتقان نارسە – «2024 جىلدى قالاي قارسى الدىڭىز؟» دەگەن سۇراققا «جاڭا جىل ماعان قاستەرلى مەرەكە ەمەس... ونىڭ ۇستىنە, ءوزىمىزدىڭ ءتول جاڭا جىلىمىز – ءاز ناۋرىزدى ەستەن شىعارماعان ءجون. بۇل مەيرام – تىرشىلىكتى تۇلەتە كەلەتىن ناعىز تابيعي جىل باسى» دەگەنى.
زەينەپ بازارباەۆا,
ۇعا اكادەميگى
