قاڭتار قاسىرەتىنە دە ەكى جىل تولىپ وتىر. ۋاقىت زىمىراپ ءوتىپ جاتىر, بىراق سول كەزدەگى حالىقتىڭ جۇرەگىنە تۇسكەن سىزات ءالى سىزداپ تۇر, جازىلار ەمەس. ارينە, ول ءبىر-ەكى جىلدا جازىلاتىن دا نارسە ەمەس. ءبىز سول قاڭتاردا ەگەمەندىگىمىز عانا ەمەس, ەلدىگىمىزدەن ايىرىلىپ قالا جازدادىق. شەتتى ايتپاعاندا, ءوزىمىزدىڭ ارامىزدا دا ءتۇرلى ساۋەگەيلەر ءارتۇرلى پىكىر تاراتىپ, حالىقتىڭ ساناسىن سارساڭعا سالدى. ءدال وسى كەزدەگى قوسارلانعان بيلىكتىڭ ەكىۇشتىلىعى دا كۇمان قيالىندا وتىرعان حالىقتىڭ سەنىمسىزدىگىن تەرەڭدەتە ءتۇستى. بۇرىنعى بيلىكتىڭ قۇدىرەتىنەن ايىرىلىپ قالعىسى كەلمەۋى جانە جاڭا بيلىكتىڭ جاساپ جاتقان جاڭا رەفورمالارىن قابىلداماۋ پيعىلى الاڭسىز وتىرعان حالىقتى اقىرى دۇربەلەڭگە سالدى. وسىنداي سىندارلى ۋاقىتتا مەملەكەت باسشىسى ق.توقاەۆتىڭ تاباندىلىعى مەن قايراتتى مىنەزى, باتىل شەشىمدەرى, ايتقان ورنىقتى سوزدەرى, ساليقالى ساياساتى, جاساعان قادامدارى, بار جاۋاپكەرشىلىكتى ءوز موينىنا الا ءبىلۋى, ابدىراپ وتىرعان ەلدىڭ ەسىن جيعىزدى, كۇمانىن سەيىلتتى, ءۇمىتىن وياتتى. بولمىسىنان ۇلتتىق سانا-سەزىمى بيىك, ەل مۇددەسىنە قاتەر تونگەن كەزدەردە قۇرىشتاي ۇيىسا الاتىن, اق-قارانى اجىراتا بىلەتىن حالقىمىز پرەزيدەنتىمىزدىڭ اينالاسىنا بىرىگىپ, كوك تۋىمىزدىڭ استىنا جينالىپ, قايسارلىعىن تانىتتى. ەلدىك پەن ەگەمەندىكتى تاڭدادى.
ق.توقاەۆ سول قاڭتار قاسىرەتىنەن كەيىنگى ەكى جىلدىڭ كولەمىندە, ەلدىڭ بولاشاققا دەگەن سەنىمىن نىعايتا ءتۇسۋ ءۇشىن, ەكونوميكامىز تۇرالاپ تۇرىپ قالماۋى ءۇشىن, الەم الدىندا ءجۇزىمىز جارقىن, مارتەبەمىز بيىك, ەلدىگىمىز بەرىك ەكەندىگىن دالەلدەۋ ءۇشىن, ورنىقتى, مارتەبەلى ورنىمىزدى نىق الۋىمىز ءۇشىن تىنباي ەڭبەك ەتىپ كەلەدى. الەمنىڭ جارتىسىن شارلاپ, ايگىلى ينۆەستورلارمەن كەزدەسىپ, مەملەكەتىمىزدىڭ ىشكى دە سىرتقى جاعدايىنىڭ تۇراقتى ەكەندىگىن دالەلدەۋ ءۇشىن كۇش-جىگەرىن اياماي كەلە جاتىر. ءوزىنىڭ حالقىنىڭ الدىندا, باسىم داۋىسپەن زاڭدى سايلانعان پرەزيدەنت رەتىندە قاشان دا شىنايىلىعىنان تانعان ەمەس. بۇگىنگى سۇحبات تا سونىڭ دالەلى. ەل كوكەيىندە جۇرگەن سۇراقتارعا جاۋاپ بەرە وتىرىپ, پرەزيدەنت مەملەكەتىمىزدىڭ بولاشاعىنا قاتىستى سەنىمدى جانە ناقتى قادامداردىڭ جاسالعانىن, ولاردىڭ ساياسي, ەكونوميكالىق, زاڭنامالىق نەگىزدەرىنىڭ تولىق قالىپتاسقانىن, ەل ەكونوميكاسىنىڭ سەرپىندى دامۋىنا بارلىق العىشارتتىڭ بار ەكەنىن اشىق جانە اشىپ ايتتى. ول ءۇشىن ەلىمىزدىڭ تۇتاستىعى, وعان نەگىز بولاتىن حالقىمىزدىڭ ىنتىماعى مەن بىرلىگىنىڭ اسا ماڭىزدىلىعىن العا تارتتى.
ۇلتىمىز بەن ۇرپاعىمىزدىڭ بولاشاعى ءۇشىن, ءاربىر ازاماتتىڭ جان-جاققا تارتقىلاماي, جۇدىرىقتاي بىرىگىپ, جۇمىلا ەڭبەك ەتۋى ماڭىزدى ەكەندىگىن تاعى دا اتاپ ءوتتى. شىنىندا دا, تاۋەلسىزدىك – باسىمىزداعى باق. ونى ايالاي ءبىلۋ – ءبارىمىزدىڭ مىندەتىمىز.
ءالي بەكتاەۆ,
سەنات دەپۋتاتى
