دەرەككە سەنسەك, « ۇلى دالادا» قازىر 25 مىڭ تۇرعىن بار. اۋەلى جول ازابىن تارتقان شاعىن اۋدان حالقىنىڭ مۇڭىنا قۇلاق اسقان جەرگىلىكتى بيلىك بىلتىر كوكەيكەستى ماسەلەنى وڭىنان شەشتى. ءوڭىر باسشىسى ەربول قاراشوكەەۆ شاعىن اۋدان تۇرعىندارىمەن وتكەن كەزدەسۋدە ماسەلەلەردىڭ ءبارى نازاردان تىس قالمايتىنىن, تىكەلەي باقىلاۋىنا الاتىنىن ايتقان-دى. سوزىندە تۇردى. بۇعان دەيىن №54 مەكتەپكە قاتىناپ وقىعان « ۇلى دالا» وقۋشىلارىنىڭ جاڭا ءبىلىم ورداسىنىڭ تابالدىرىعىن اتتاعانى كوڭىل قۋانتادى. ءبىلىم وشاعىن سالۋ ءۇشىن جەرگىلىكتى بيۋدجەتتەن 3,1 ملرد تەڭگە بولىنگەن. بۇل – 2023 جىلى وڭىردە پايدالانۋعا بەرىلگەن ءتورتىنشى مەكتەپ.
– بۇل كۇندى « ۇلى دالا» تۇرعىندارى سارىلا كۇتتى. سوندىقتان ولاردى قۋانىشىمەن قۇتتىقتايمىن. جاڭا ءبىلىم ورداسىنىڭ تابالدىرىعىن اتتاعان بالالار ەلىمىزدىڭ اتىن الەمگە ايگىلەيتىن مىقتى ازامات بولىپ قالىپتاسۋىنا تىلەكتەسپىن. ۇستازدار ءبىلىم الۋشىلارعا بار بىلگەنىن ۇيرەتەرىنە سەنىمىم كامىل, – دەدى مەكتەپتىڭ اشىلۋ سالتاناتىندا وبلىس اكىمىنىڭ ورىنباسارى ق.مادىبەك.
ەڭبەك ارداگەرلەرى شارافي قالداربەكوۆ پەن ەرەجەپباي بەكەەۆ ءبىلىم ورداسىنىڭ لەنتاسىن قيىپ, قوناقتار وقۋ ورداسىنىڭ ماتەريالدىق-تەحنيكالىق بازاسىمەن تانىسىپ شىقتى. مۇندا لينگافون كابينەتتەرى, زەرتحانالار, 350 ادامعا ارنالعان ءماجىلىس زالى, وقۋ زالى, كىتاپحانا, 400 ورىندىق اسحانا مەن شەبەرحانا بار. سونداي-اق 56 وقۋ كابينەتى ينتەراكتيۆتى تاقتامەن جابدىقتالىپتى. وقۋ ورداسىندا 58 ۇستاز ساباق بەرەدى.
ايتپاقشى, قازىرگى ۋاقىتتا اتالعان شاعىن اۋداندا بيىل تاپسىرىلادى دەپ جوسپارلانعان 4 400 وقۋشىعا ارنالعان تاعى 3 مەكتەپتىڭ قۇرىلىسى ءجۇرىپ جاتىر.
تاراز
