پرەزيدەنت قاسىم-جومارت توقاەۆ «Egemen Qazaqstan» گازەتىنە بەرگەن سۇحباتىندا 2024 جىلى تويلاۋ جوسپارلانىپ وتىرعان تۇلعالاردىڭ مەرەيتويلارىن اتاپ وتكەن بولاتىن. «ەل تاريحىندا ەرەكشە ورنى بار تۇلعالارعا قۇرمەت كورسەتۋ ءداستۇرى ەلىمىزدىڭ جالپىۇلتتىق بىرەگەيلىگىن نىعايتا تۇسۋگە زور سەپتىگىن تيگىزەدى. بيىل ايگىلى عالىم قانىش ساتباەۆتىڭ تۋعانىنا 125, داڭقتى باتىرلار ساعادات نۇرماعامبەتوۆ پەن راقىمجان قوشقارباەۆتىڭ تۋعانىنا 100 جىل تولادى. سونىمەن قاتار تاريحشىلاردىڭ پايىمداۋىنشا, جوشى ۇلىسىنىڭ ىرگەسى قالانعانىنا – 800 جىل. مەملەكەتتىلىگىمىزدىڭ تامىرى تىم تەرەڭدە جاتقانىن ايگىلەيتىن وسى ايتۋلى داتاعا وراي كەڭ اۋقىمدى زەرتتەۋلەر قولعا الىنادى».
بۇدان بولەك, بيىل حالىق اقىنى, كۇمىس كومەي ءانشى ءارى كومپوزيتور كەنەن ازىرباەۆتىڭ تۋعانىنا - 140 جىل تولادى.
وسى جىلى قازاق حالىق مۋزىكاسىن زەردەلەپ, قاعازعا ءتۇسىرىپ, ۇلتتىق ءان ونەرىمىزدىڭ باسىن قۇراعان ەتنوگراف الەكساندر زاتاەۆيچتىڭ 155 جىلدىق مەرەيتويى.
حح عاسىرداعى قازاق ادەبيەتىنىڭ كورنەكتى وكىلدەرى - بەيىمبەت مايلين, ءىلياس جانسۇگىروۆ, ساكەن سەيفۋلليننىڭ تۋعانىنا - 130 جىل بولسا, جازۋشى, پۋبليتسيست, دراماتۋرگ جۇسىپبەك ايماۋىتوۆتىڭ 135 جىلدىق مەرەيلى داتاسى وسى جىلعا تۇسپا-تۇس كەلىپ تۇر.
سونداي-اق 2024 جىلى قاجىرلى قايراتكەر تۇرار رىسقۇلوۆتىڭ دا تۋعانىنا 130 جىل بولادى.
ارحەولوگيالىق جانە ەتنوگرافيالىق زەرتتەۋشى, عالىم الكەي مارعۇلاننىڭ, قازاقتان شىققان تۇڭعىش كاسىبي سۋرەتشى, كەسكىندەمەشى ءابىلحان قاستەەۆتىڭ تۋعانىنا بيىل - 120 جىل تولادى.
ال «قان مەن تەر» تريلوگياسىنىڭ اۆتورى, جازۋشى ءابدىجامىل نۇرپەيىسوۆ پەن بالالارعا ارنالعان شوقتىعى بيىك شىعارمالاردى مۇرا ەتىپ قالدىرعان بەردىبەك سوقپاقباەۆتىڭ دا وسى جىلى 100 جىلدىق مەرەيتويى بولادى.
