سۋرەتتى تۇسىرگەن – يۋري بەككەر
ۋنيۆەرسيتەت باسشىسى اقىلبەك كۇرىشباەۆ قازىرگى ۋاقىتتا جەكەمەنشىككە ءوتىپ كەتكەن ۋنيۆەرسيتەت اكتيۆتەرىن كەرى قايتارۋ جۇمىستارى جالعاسىپ جاتقانىن جەتكىزدى. بۇعان دەيىن №6 ستۋدەنتتىك جاتاقحانا تۇرعىن ءۇي قورىنا قايتارىلىپ, 280 ستۋدەنت باسپانالى بولعانى بەلگىلى. ەندىگى كەزەكتە «شاھ» مەيرامحاناسى مەن وفيس رەتىندە جەكە كاسىپكەر پايدالانىپ كەلگەن №3 ستۋدەنتتىك جاتاقحانا دا كەرى قايتارىلىپ, تولىقتاي كۇردەلى جوندەۋدەن ءوتتى. بۇل ماقساتقا ۋنيۆەرسيتەتتىڭ بيۋدجەتىنەن 160 ملن تەڭگەگە جۋىق قاراجات بولىنگەن. رەكتوردىڭ ايتۋىنشا, مۇنداي اۋقىمدى جوندەۋ جۇمىستارى كەيىنگى 20 جىلدا جۇرگىزىلمەگەن. «ريتم ستروي ەك» كومپانياسىنىڭ قولداۋىمەن جاتاقحانانىڭ سىرتقى جاعى جانە ىشكى بولمەلەرى, اس ۇيلەر مەن دالىزدەر, تازالىق ورىندارى جاڭاشا ديزاينمەن ورنەكتەلىپ, قاجەتتى جيھازدار, مۇزداتقىشتار, كىر جۋعىش ماشينالارى مەن گاز پليتكالارىمەن جابدىقتالدى. ناتيجەسىندە, زاماناۋي 200 بولمەگە ستۋدەنتتەر, 100 بولمەگە ماگيسترانتتار مەن جاس عالىمدار قونىستاندى.
اتالعان ءىس-شاراعا قاتىسقان ەل فۋتبولىنىڭ ارداگەرى قۇرالبەك ورداباەۆ, وليمپيادا چەمپيونى ەرماحان يبرايموۆ, بوكستان ءبىرىنشى جارتىلاي ورتا سالماقتاعى IBO چەمپيونى جانقوش تۇراروۆ, ينۆەستور كومپانيالاردىڭ وكىلدەرى قاتىسىپ, اۋىل شارۋاشىلىعى سالاسىنا ماماندانىپ جاتقان ستۋدەنتتەرگە ساتتىلىك تىلەپ, كۇرەس, بوكس سياقتى سپورت تۇرلەرىنەن جەتىستىككە جەتىپ, رەسپۋبليكالىق دودادا وقۋ ورنى نامىسىن قورعاپ جۇرگەن جاستاردىڭ قاتارى ورتالىق ستاديوننىڭ اشىلۋىمەن تاعى دا تولىعا تۇسەتىندىگىنە سەنىم ءبىلدىردى. جاڭارتىلعان ستاديونعا «اtlant Systems» سەرىكتەستىگى تاراپىنان 130 ملن تەڭگە تارتىلىپ, قۇرىلىس جۇمىستارىن «Korkeم» كومپانياسى جۇرگىزگەن.
پرورەكتور ق.سۇلتانعازيەۆتىڭ ايتۋىنشا, وقۋ ورنىندا پلاستيك تەرەزە جانە ەسىك شىعاراتىن, تىگىن, سونداي-اق مەبەل تسەحى اشىلىپ, جاتاقحانالاردى جابدىقتاۋ ءىسى قولعا الىنعان. مۇنداعى تسەحتاردا ارنايى ماماندارمەن قاتار وندىرىستىك تاجىريبە جيناۋ ماقساتىندا ستۋدەنتتەر دە جۇمىس ىستەيدى. قازىرگى كەزدە جاڭادان اشىلعان جاتاقحانالار وسى وندىرىستىك تسەحتاردا جاسالعان جيھازدارمەن قامتاماسىز ەتىلىپ وتىر. ەندىگى كەزەكتە ۋنيۆەرسيتەتكە تيەسىلى بارلىق جاتاقحانانى جيھازبەن جابدىقتاۋ ءىسى جالعاسىن تاۋىپ, 2 مىڭعا جۋىق ورىن قاجەتتىلىكپەن قامتاماسىز ەتىلمەك.
وقۋ ورنى ستۋدەنتتەرى ءۇشىن تاعى ءبىر جاعىمدى جاڭالىق – «قازاق-ستروي» سەرىكتەستىگىمەن ىنتىماقتاستىق شارت نەگىزىندە 9 قاباتتى 450 ورىنعا ارنالعان ستۋدەنتتىك جاتاقحانانىڭ قۇرىلىسى باستالدى. وعان تارتىلعان ينۆەستيتسيا كولەمى 2,3 ملرد تەڭگەدەن اسادى. جاتاقحانا جانىنان ستۋدەنتتەر ءۇشىن مەديتسينالىق ورتالىق تۇرعىزۋ دا جوسپاردا بار.
بۇگىندە ۋنيۆەرسيتەت قۇرامىنا 6 ءىرى عىلىمي-زەرتتەۋ ينستيتۋتى مەن ءبىر تاجىريبەلىك شارۋاشىلىق كىرەدى. الەمنىڭ جەتەكشى جوعارى وقۋ ورىندارىنىڭ تاجىريبەسىنە سايكەس, «عىلىم – ءبىلىم – ءوندىرىس» جۇيەسى ەنگىزىلىپ, تيىمدىلىگىن كورسەتىپ كەلەدى. وقۋ ورنى بيىل 4 حالىقارالىق جانە ۇلتتىق رەيتينگتە لايىقتى ورىندارعا يە بولدى. سونىمەن قاتار ۋنيۆەرسيتەت بازاسىندا «تاشكەنت يرريگاتسيا جانە اۋىل شارۋاشىلىعىن مەحانيكالاندىرۋ ينجەنەرلەرى ينستيتۋتى» ۇلتتىق زەرتتەۋ ۋنيۆەرسيتەتىنىڭ سۋ شارۋاشىلىعى ماماندارىن دايارلاۋ جونىندەگى فيليالى اشىلىپ, شەتەلدىڭ 7 جوعارى وقۋ ورنىمەن ەكى ديپلوم الۋ باعدارلاماسى ەنگىزىلدى. ال ۆارشاۆا جاراتىلىستانۋ عىلىمدارى ۋنيۆەرسيتەتىمەن «IT-تەحنولوگيالاردى قولدانۋ ارقىلى سۋ رەسۋرستارىن باسقارۋ» ماگيستراتۋرا باعدارلاماسى بويىنشا ءۇش جىل قاتارىنان تۇلەكتەر ءبىتىرىپ شىقتى. سونداي-اق قىتاي اۋىل شارۋاشىلىعى ۋنيۆەرسيتەتىمەن, ليتۆا دەنساۋلىق عىلىمدارى ۋنيۆەرسيتەتىمەن ەكى ديپلومدىق وقىتۋ ءىسى قولعا الىنىپ جاتىر.
الماتى
