زاڭنامالىق تۇزەتۋلەر بويىنشا قارجى جانە بيۋدجەت كوميتەتىنىڭ توراعاسى ءمادي تاكيەۆ بايانداما جاسادى. ول زاڭ جوباسىن ازىرلەۋ كەزىندە دەپۋتاتتار نەگىزگى جەتى باعىتتى قامتىعانىن اتاپ ءوتتى.
ءبىرىنشىسى – قارىز الۋشى نەسيەلەرىنىڭ وسۋىنە جول بەرمەۋ.
«پروبلەمالىق نەسيەلەرى بار ازاماتتاردىڭ بورىشتىق جۇكتەمەسىنىڭ ارتۋىنا جول بەرمەۋ ءۇشىن, بىرىنشىدەن, نەسيەلەر مەرزىمى 90 كۇننەن اساتىن بولسا, كەپىلسىز تۇتىنۋشىلىق نەسيەلەر بەرۋگە تىيىم سالۋ ۇسىنىلىپ وتىر. ەكىنشىدەن, مەرزىمى 90 كۇننەن اسقان بەرەشەگى بار تۇلعالارعا قارىزدارى بويىنشا ۇستەمە ەسەپتەۋگە تىيىم سالۋ. ويتكەنى مۇنداي ازاماتتار قيىن ومىرلىك جاعدايعا تاپ بولعاندىقتان قارىزدى قايتارا المايدى», دەدى م.تاكيەۆ.
سونىمەن قاتار كامەلەتكە تولماعان بالالارى بار وتباسىلاردى جىلىتۋ ماۋسىمىندا باسپاناسىنان شىعارۋعا تىيىم سالىنباق. سونداي-اق بانك ومبۋدسمەنىنە ازاماتتاردىڭ بارلىق (تەك يپوتەكالىق ەمەس) نەسيەسى بويىنشا داۋلاردى شەشۋدى مىندەتتەۋ ۇسىنىلادى, بۇل رەتتە ونىڭ شەشىمدەرى بانكتەر, ميكروقارجى ۇيىمدارى مەن كوللەكتورلار ءۇشىن مىندەتتى بولادى.
زاڭ جوباسىندا ازاماتتاردىڭ نەسيەلەر بويىنشا بانكروتتىق راسىمىنە قول جەتكىزۋىن جەڭىلدەتۋ, سونداي-اق الاياقتىقتى ازايتۋ دا قامتىلعان. سونداي-اق مەملەكەت باسشىسىنىڭ بانكتەردەگى سترەستى اكتيۆتەر دەڭگەيىن تومەندەتۋ, بيزنەستى نەسيەلەندىرۋ قولجەتىمدىلىگىن, ونىڭ ىشىندە بىرلەسكەن جانە سينديكاتتالعان نەسيەلەۋ تەتىكتەرىن پايدالانۋ ارقىلى كەڭەيتۋ جونىندەگى تاپسىرمالارىن ىسكە اسىرۋعا باعىتتالعان بولىمدەر دە بار.
