فوتو: ۇكىمەتتىڭ رەسمي سايتى
قاۋىپسىز ەڭبەكتىڭ نەگىزگى ينديكاتورلارى – وندىرىستىك جاراقات پەن كاسىپتىك اۋرۋلار كورسەتكىشتەرى. وسىنى ەسكەرە وتىرىپ, تۇجىرىمداما اياسىندا ءتيىستى شارالار كەشەنى جۇزەگە اسىرىلاتىن بولادى.
پرەمەر-ءمينيستردىڭ ايتۋىنشا, قازاقستاندا 500 مىڭعا جۋىق ادام زياندى ەڭبەك جاعدايلارىندا جۇمىس ىستەيدى. ەىدۇ ەلدەرىندە بۇل كورسەتكىش وندىرىستىك پروتسەستەردى اۆتوماتتاندىرۋ جانە قاۋىپسىزدىك تەحنيكاسى دەڭگەيىن ارتتىرۋ ەسەبىنەن جىل سايىن ازايىپ كەلەدى.
«ال بىزدە وندىرىستىك جاراقات الۋ كورسەتكىشى ءبىرشاما جوعارى ەكەنىن اتاپ وتۋگە تۋرا كەلەدى. ەلىمىزدە جىل سايىن 2 مىڭعا جۋىق ادام جۇمىس بارىسىندا جاراقات الادى. ونىڭ ىشىندە 200-دەن استام ادام مەرت بولادى», دەدى ءاليحان سمايىلوۆ.
ۇكىمەت باسشىسىنىڭ سوزىنشە, وندىرىستە قازىر قولدانىلىپ جۇرگەن جازاتايىم وقيعالاردان ساقتاندىرۋ جۇيەسى جۇمىس بەرۋشىلەردى ەڭبەك جاعدايلارىن جاقسارتۋعا ىنتالاندىرمايدى. بۇگىندە كاسىپورىنداردىڭ تەك 32%-ى عانا ءوز قىزمەتكەرلەرىن ساقتاندىرىپ وتىر.
«كوپتەگەن ەلدە ءومىردى ساقتاندىرۋ كومپانيالارى ساقتاندىرۋ سىيلىقاقىسىنىڭ بەلگىلى ءبىر بولىگىن پرەۆەنتيۆتى ءىس-شارالارعا باعىتتايدى. ياعني, ولاردا قىزمەتكەرلەردى ەڭبەك قاۋىپسىزدىگىنە وقىتۋعا, ۇجىمدىق جانە جەكە قورعاۋ قۇرالدارىن ساتىپ الۋعا باسىمدىق بەرىلەدى. ءبىز دە وسىنداي جۇيەگە كوشۋىمىز كەرەك», دەدى ۇكىمەت باسشىسى.
وسى سالادا قالىپتاسقان پروبلەمالاردى كەزەك كۇتتىرمەي شەشۋ ءۇشىن قازاقستاندا العاش رەت 2030 جىلعا دەيىنگى قاۋىپسىز ەڭبەك تۇجىرىمداماسى ازىرلەندى.
«بۇل قۇجات ەڭ الدىمەن, كاسىپتىك قاۋىپ-قاتەرلەر مەن وندىرىستىك جاراقاتتانۋ دەڭگەيىن جانە كاسىپتىك اۋرۋ تۇرلەرىن تومەندەتۋگە باعىتتالعان. بارلىق تاۋەكەل الدىن الا ەسكەرىلەتىن بولادى. وندىرىستەگى قاۋىپسىزدىك سالاسىن تسيفرلاندىرۋ وسى ماسەلەلەردى شەشۋگە ىقپال ەتۋى ءتيىس», دەدى پرەمەر-مينيستر.
ونىڭ ايتۋىنشا, تۇجىرىمداما ەڭبەكتى قورعاۋ سالاسىنداعى باقىلاۋ مەن مونيتورينگتىڭ تيىمدىلىگىن ارتتىرۋى كەرەك.
ۇسىنىلعان قۇجات بويىنشا داۋىس بەرۋ راسىمىنەن كەيىن ۇكىمەت باسشىسى تۇجىرىمدامانىڭ ءىس-شارالارىنىڭ بارلىعىن ورىنداۋ بويىنشا جۇمىستى جۇيەلى تۇردە ۇيىمداستىرۋدى تاپسىردى.
وعان قوسا قاۋىپتى ونەركاسىپتىك وبەكتىلەردەگى اۆاريالار سانىن تومەندەتۋدى باقىلاۋدا ۇستاۋ, كاسىپتىك اۋرۋلار ينستيتۋتىن قۇرۋ ماسەلەسىن تەزدەتۋ, سونداي-اق ەمدەۋ مەن پروفيلاكتيكانىڭ ساپاسىن ارتتىرۋ قاجەت.
سونىمەن قاتار پرەمەر-مينيستر وڭىرلەردە ەڭبەكتى قورعاۋ تالاپتارىنىڭ ساقتالۋى بويىنشا پرەۆەنتيۆتى مەملەكەتتىك باقىلاۋدى قامتاماسىز ەتۋ جانە وسى باعىتتاعى اۋقىمدى اقپاراتتىق-ءتۇسىندىرۋ جۇمىسىن كۇشەيتۋ كەرەكتىگىن ايتتى.
