تسەلينوگراد اۋدانىنىڭ ەكى تۇرعىنى قۇقىق قورعاۋ قىزمەتكەرلەرىنىڭ ءىز كەسۋدى ىجداعاتتى جۇرگىزۋلەرىنىڭ ارقاسىندا قولعا ءتۇستى. ولاردىڭ ەكى بىردەي قىلمىستىق ءىس-ارەكەتكە قاتىسى بارى انىقتالىپ وتىر. تالاپكەر اۋىلىنداعى شارۋا قوجالىعىنىڭ باسشىسى بەلگىسىز بىرەۋلەردىڭ قوراسىنان جيىرما قويىن ۇرلاپ كەتكەنى تۋرالى حابارلاعان. شىعىن ءبىر ميلليون تەڭگەگە جۋىق. ورىستە جۇرگەن جەرىنەن يت قۋىپ ۇركىپ نەمەسە جەلدەپ كەتتى دەيتىن ەمەس, قاماۋلى تۇرعان جەرىنەن قولدى بولعان. ال ەكىنشى اق ادال مالىنان ايىرىلعان تۇرعىننىڭ قوراسىنان بەس قويى جوعالعان. ونىڭ شىعىنى 300 مىڭ تەڭگەنىڭ توڭىرەگىندە.
پوليتسيا قىزمەتكەرلەرىنىڭ جەدەل الدىن الۋ شارالارىن جۇرگىزۋىنىڭ ارقاسىندا قاجىمۇقان اۋىلىنىڭ ەكى تۇرعىنى قولعا ءتۇستى. ءىز كەسۋ بارىسىندا ۇرىلار مالدى ۇپتەپ كەتۋگە كەلگەندە كولىك جالداعان. كەيىن سويىپ, ساتقان. ايعاق رەتىندە تەرىسى, ءۇش قويدىڭ ەتى تابىلدى. تەرگەۋ بارىسىندا ۇرىنىڭ ءبىرى وسىلايشا اقشا جيناپ, ۇيلەنۋ تويىن وتكىزگىم كەلدى دەپ اقتالاتىن كورىنەدى. مال ۇرلاپ ءبىر باسىن ەكەۋ ەتپەك بولعاننىڭ ەندى ءوز باسى داۋعا قالىپ وتىر.
ساندىقتاۋ اۋدانىنداعى جىلاندى اۋىلىنىڭ تۇرعىندارى اياقاستىنان ابىگەرگە تۇسكەن. تەبىندەگى 103 باس جىلقى ءىزىم-قايىم. مال سۇمەسىمەن كۇن كورىپ وتىرعان مالساق قاۋىم ءۇشىن ادام ايتقىسىز شىعىن. العاشقى تاۋلىكتەرى اۋىل تۇرعىندارى تۇگەلگە جۋىق اتقا قونىپ, تاۋ-تاستىڭ, ورمان-توعايدىڭ ءىشىن ءسۇزىپ شىققان. جىپ-جىلماعاي. سونىعا تۇسكەن ءبىر ءىز بولساشى. قۇتتى جۇزدەن استام جىلقىنى جەل كوتەرىپ كەتكەندەي. شىعىنى دا وتىز ميلليون تەڭگەنىڭ كولەمىندە. وزدەرى تابا المايتىن بولعان سوڭ پوليتسياعا حابارلاعان. جالعىز پوليتسيا قىزمەتكەرلەرى عانا ەمەس, توتەنشە جاعداي دەپارتامەنتىنىڭ قىزمەتكەرلەرى دە ءىز كەسۋگە كەلگەن. ءتىپتى اسپانعا درون دا ۇشىرىلدى. پوليتسيا قىزمەتكەرلەرى كۇرە جولدىڭ بويىنداعى كۇدىكتى-اۋ دەگەن كولىكتەردى توقتاتا باستادى. ەتپەن اينالىساتىن الىپساتارلار دا نازارعا الىندى. شاعىن اۋىلدىڭ بار جىلقىسى تۇگەل جوعالسا, مالساق قاۋىم جۇگەن ۇستاپ قالماي ما؟! ءدال وسى كۇندەرى قاس قىلعانداي كۇن كۇرت سۋىتىپ, ساقىلداعان سارى اياز كۇشىنە ءمىنىپ تۇرعان. ايتسە دە ءالسىن-ءالسىن جىلىنىپ العان ءىز كەسۋشىلەر قىرۋار جىلقىنى ىزدەۋمەن بولدى. ەڭبەك ەش كەتكەن جوق, تابىلدى. جەل ايداعان ءتامام جىلقى قىر اسىپ, كورشى اۋداننىڭ اۋماعىنا شىعىپ كەتىپتى. تۇستەپ تۇگەندەسە, تۇگەل.
قايتقان مالدىڭ قايىرى بار. بىلاي قاراعاندا, اناۋ ايتقانداي قىلمىستىق وقيعا بولعان جوق. ەندەشە, نەگە جازىپ وتىرمىز. قانشاما جۇرتتى اۋرە-سارساڭعا سالعان وسى تاقىلەتتەس وقيعا ءجيى تىركەلەدى. دەمەك مال باققان سوڭ كوزدەن تاسا ەتپەگەن ءجون. قاراۋسىز مالعا كوز سالاتىندار قاي جەردە بولسىن كەزدەسىپ قالۋى ابدەن مۇمكىن.
اقمولا وبلىسى
