ماسەلەن, اتىراۋ وبلىسىنىڭ اكىمى سەرىك شاپكەنوۆتىڭ ايتۋىنشا, بىلتىر 785 ورىندىق ءۇش بالاباقشا اشىلعان. ال بيىل مەملەكەتتىك-جەكەمەنشىك ارىپتەستىگى اياسىندا 2 610 ورىنعا ەسەپتەلگەن 9 بالاباقشانىڭ قۇرىلىسى اياقتالدى. وتكەن اپتادا جاڭا ءۇش بالاباقشا اشىلدى. جاڭا نىسانداردىڭ قۇرىلىسىن «سەرپىن»-2030» جشس جۇرگىزگەن.
بالاباقشانىڭ ءبىرى – اتىراۋ قالاسىنا ىرگەلەس ورنالاسقان اقجار-2 ەلدى مەكەنىندە ورنالاسقان «اقجەلكەن». ال «بولاشاق» جانە «بايتەرەك» بالاباقشالارى مۇنايلى شاھاردىڭ ا.بايتۇرسىنوۆ پەن بەلينسكي كوشەسىندە اشىلدى. ءار بالاباقشا 290 ورىنعا ارنالعان.
«مەملەكەتىمىزدىڭ باستى ۇستانىمى – بالالارعا ساپالى ءبىلىم, سانالى تاربيە الۋعا قولايلى جاعداي جاساۋ. پرەزيدەنتتىڭ بالاباقشا مەن مەكتەپتەردىڭ سانىن كوبەيتۋ جونىندەگى تاپسىرماسىنا وراي وبلىستاعى بالاباقشا سانىن كوبەيتىپ جاتىرمىز. الداعى بەس جىلدا 2-6 جاستاعى بالالار ءۇشىن 8 مىڭعا جۋىق ورنى بار بوبەكجايلار سالۋدى جوسپارلاپ وتىرمىز. بالالارعا ساپالى ءبىلىم مەن ۇلتتىق تاربيە بەرەتىن وسىنداي جوبالار ءارى قاراي دا جالعاسادى», دەدى س.شاپكەنوۆ.
بالاباقشالارداعى اسحانا, جاتىن بولمە, ويىن, لوگوپەد جانە پسيحولوگ, پەداگوگتەر بولمەلەرى, سپورتزالى زاماناۋي قۇرال-جابدىقتارمەن قامتىلعان. اسحاناداعى تاعامدار سانيتارلىق تالاپقا ساي توڭازىتقىشتا ساقتالادى. دارىگەر بولمەسىندە بالالارعا العاشقى كومەك كورسەتۋگە قاجەتتى ءدارى-دارمەكتىڭ ءبارى بار.
ءار بالاباقشادا 26 ادام جۇمىس ىستەيدى. بالاباقشالاردا 12 توپ اشىلعان. وندا بالاقايلار كىشى جانە ۇلكەن توپقا بولىنەدى.
«وسى كەزگە دەيىن مەملەكەت-جەكەمەنشىك ارىپتەستىگى اياسىندا 870 ورىندىق ءۇش بالاباقشا قولدانىسقا بەرىلدى. ەندى تاعى 890 بالانى قامتيتىن ءۇش بالاباقشانىڭ نىسانى ىسكە قوسىلادى. بۇل بالاباقشامەن قامتۋ ۇلەسىن 15,2 پايىزعا ازايتادى», دەدى س.شاپكەنوۆ.
اتىراۋ وبلىسى
