سايىسقا مەگاپوليستىڭ ءتۇرلى وقۋ ورىندارىنان 30-دان استام ستۋدەنت قاتىسىپ, ونەرلەرىن ورتاعا سالدى.
قازاقستاننىڭ حالىق ءارتيسى ايگۇل ۇلكەنباەۆا, فيلولوگيا عىلىمدارىنىڭ دوكتورى, پروفەسسور عاريفوللا انەس, قر ەڭبەك سىڭىرگەن مادەنيەت قايراتكەرى, پروفەسسور تولەپبەرگەن توقجانوۆ, قازاقستاننىڭ ەڭبەك سىڭىرگەن قايراتكەرى ساۋلە جانپەيىسوۆا, قر مەملەكەتتىك ورتالىق مۋزەيىنىڭ ديرەكتورى راشيدا حاريپوۆا قازىلىق ەتكەن بايقاۋدا ەرەكشە ونەرىمەن كوزگە تۇسكەن جاستار جارىس جەڭىمپازى اتاندى.
اتاپ ايتقاندا, بايقاۋدىڭ گران پري جۇلدەسىن – قۇرمانعازى اتىنداعى قازاق ۇلتتىق كونسەۆاتورياسىنىڭ ستۋدەنتى قانات قىزىلعۇلوۆ يەلەندى.
دومبىرا نوميناتسياسى بويىنشا:
1-ورىن زينور نۇرايعا,
2-ورىن ءنۇرالى سايات ۇلى مەن قايىربەك ساريەۆكە,
3-ورىن ءلاززات اقيقاتقا تابىستالدى.
تەرمە نوميناتسياسىندا جۇزدەن جۇيرىك دەپ تانىلعان امانجول داۋىلباەۆ, پەريزات امانگەلديەۆا سىندى جاس ونەرپازدار كورەرمەن ىقىلاسىنا بولەندى.
جەڭىمپازدارعا كەمەر بەلبەۋ, قالقان, قىزدارعا ارنالعان ۇلتتىق اشەكەيلەر سەكىلدى ەرەكشە سىيلىقتار تابىس ەتىلدى.
شارا اياسىندا ورتالىق مۋزەي ۇيىمداستىرعان #ماحامبەت220 چەللەندجىنىڭ قاتىسۋشىلارى ماراپاتتالدى.
چەللەندجدى قازاقستاننىڭ حالىق ءارتىسى, بەلگىلى كۇيشى ايگۇل ۇلكەنباەۆا باستاپ, ماحامبەت وتەمىس ۇلى دومبىراسىنىڭ دالمە-ءدال كوشىرمەسىمەن «جۇمىر قىلىش» كۇيىن ورىنداعان بولاتىن. ونەر يەسى چەللەندجدى ارى قاراي ونەردەگى ارىپتەستەرىنە, ەلىمىزدىڭ ونەر ۇجىمدارىنا جولدادى. ماحامبەت اقىننىڭ رۋحى بويىنا سىڭگەن كوپتەگەن ونەر قايراتكەرلەرى, اقىندار, كۇيشىلەر مەن ءداستۇرلى انشىلەر, فيلارمونيالار مەنوركەستر ۇجىمدارى چەللەندجدى ارى قاراي جالعاستىرىپ, بۇگىنگە دەيىن 27 ونەر ۇجىمىنان 1000-نان اسا ادام اتسالىسقان.
ورتالىق مۋزەي ۇجىمىنىڭ اتىنان وسى ءبىر يگى باستاماعا قولداۋ كورسەتكەن ءاربىر قاتىسۋشى مادەنيەت جانە اقپارات مينيسترلىگىنىڭ العىس حاتىمەن ماراپاتتالدى.
