باسەكەلى جوعارى ءبىلىم

ۇزدىكتەردىڭ ۇلگىسى – بارشاعا ورتاق

مەملەكەت باسشىسى قاسىم-جومارت توقاەۆ: «جاڭا ەكونوميكانى قۇرۋ ءۇشىن جوعارى وقۋ ورىندارىنىڭ باسەكەگە قابى­لەتىن ارتتىرۋ ماڭىزدى. كەيىنگى ۋاقىت­تا ەلىمىزدە جەتەكشى شەتەلدىك جوعارى وقۋ ورىندارىنىڭ فيليالدارى اشىلا باس­تادى. 2025 جىلعا دەيىن ەلىمىزدە بەدەلدى شەتەل ۋنيۆەرسيتەتتەرىنىڭ كەم دەگەندە 5 فيليالىن اشۋ قاجەت دەپ سانايمىن. بۇل رەتتە ەلىمىزدىڭ باتىسىندا تەحنيكالىق ۋنيۆەرسيتەتتەردىڭ ەكى فيليالى اشىلۋعا ءتيىس», دەگەن بولاتىن. پرەزيدەنتتىڭ تاپسىرماسىنا سايكەس, جوعارى ءبىلىم سالاسىندا بىرقاتار كەلىسىمشارت جاسالىپ, ءتيىمدى سەرىكتەستىك ورنادى.

قازىرگى كەزدە ەل ەكونوميكاسىن دامىتۋدا عىلىمنىڭ ۇلەسى زور. سول سەبەپتى ەل پرەزيدەنتى سالانى ىلگەرىلەتۋگە باسا ءمان بەرۋ كەرەك ەكەنىن ەسكەرتىپ, عىلىم جانە جوعارى ءبىلىم مينيسترلىگىنە ءتيىستى تاپسىرمالار بەرگەنى ەسىمىزدە. سولاردىڭ ءبىرى – اكادەميالىق ءبىلىمدى جەتىلدىرۋ ماقساتىندا ەلىمىزدە الدىڭعى قاتارلى شەتەلدىك ۋنيۆەرسيتەتتەردىڭ فيليالىن اشۋ.

وتكەن جىلى مەملەكەت باس­شى­سىنىڭ تاپسىرماسىن ىسكە اسىرۋ ماقساتىندا شەتەلدىك جوعارى وقۋ ورىندارىنىڭ فيليالدارىن اشۋ بويىنشا اۋقىمدى جۇمىس اتقارىلدى. ماسەلەن, پەترو­پاۆلدا University of Arizona فيليالى اشىلدى. وندا ستۋدەنتتەر IT, ينجەنەريا, اگروتەحنولوگيا جانە ءبىلىم بەرۋ باعىتتارى بويىنشا قازاق, ورىس جانە اعىلشىن تىلدەرىندە وقيدى. سونداي-اق س.وتەباەۆ اتىنداعى اتىراۋ مۇناي جانە گاز ۋنيۆەرسيتەتىنىڭ بازاسىندا م.گۋبكين اتىنداعى رەسەي مەملەكەتتىك مۇناي جانە گاز ۋنيۆەرسيتەتىنىڭ فيليالى اشىلىپ, 100 گرانت ءبولىندى. ءبىلىم الۋشىلار «مۇناي-گاز قۇبىرلارى مەن مۇناي-گاز قويمالارىن سالۋ جانە پايدالانۋ», «مۇناي-گاز تەحنولوگيالارى», «مۇناي مەن گازدىڭ تابيعي رەزەرۆۋارلارىن گەولوگيالىق مودەلدەۋ» دايىندىق باعدارلامالارى بويىنشا وقيدى. ال الماتىداعى ءال-فارابي اتىنداعى قازاق ۇلتتىق ۋنيۆەرسيتەتى بازاسىندا ماسكەۋ ينجەنەرلىك-فيزيكالىق ينستيتۋتى ۇلتتىق يادرولىق زەرتتەۋ ۋنيۆەرسيتەتىنىڭ فيليالى قۇرىلدى. وعان باستاپقىدا 100 گرانت ءبولىنىپ, قوسىمشا اقىلى وقۋعا تۇسۋگە مۇمكىندىك قاراستىرىلدى. ستۋدەنتتەر «ەلەمەنتار بولشەكتەر فيزيكاسى جانە كوسموفيزيكا» (باكالاۆريات) جانە «قورعالعان جوعارى ءونىمدى ەسەپتەۋ جۇيەلەرى» (باكالاۆريات, ماگيستراتۋرا) باعدارلامالارى بويىنشا ءبىلىم الىپ جاتىر.

– فيليالدىڭ قۇرىلۋى سالانى «يادرو­لىق ەنەرگەتيكا جانە تەحنولوگيالار», «ينفورماتيكا جانە ەسەپتەۋ تەحنيكاسى» ماماندىقتارى بويىنشا بىلىكتى كادرلارمەن قامتاماسىز ەتە وتىرىپ, ەلدە يادرولىق ەنەرگەتيكانىڭ دامۋىنا جاڭا سەرپىن بەرەدى. فيليال تۇلەكتەرى ەلىمىزدىڭ ستراتەگيالىق سالاسىن دامىتۋعا ەلەۋلى ۇلەس قوسارىنا سەنىمدىمىز. ستۋدەنتتەر ساپالى ينجە­نەر­لىك ءبىلىم الادى. ولار عىلىممەن اينالىسادى, قاجەتتى داعدىلارعا يە بولادى, زاماناۋي عىلىمي زەرتحانالاردا تاعىلىمدامادان وتەدى, – دەيدى ۇلتتىق ۋنيۆەرسيتەتتىڭ باسشىسى جانسەيىت تۇيمەباەۆ.

ال بيىل شەتەلدىك 8 جەتەكشى جوعا­رى وقۋ ورنىنىڭ فيليالى اشىلدى. ولاردىڭ قاتارىندا ەڭ ءىرى ءارى رەيتينگتە ەڭ جوعارى تۇرعانى – ق.جۇبانوۆ ۋنيۆەرسيتەتىنىڭ بازاسىندا ورنالاسقان اقتوبە قالاسىنداعى Heriot-Watt ۋني­ۆەرسيتەتىنىڭ فيليالى. بۇل قاتارعا Yessenov University بازاسىنداعى نەمىس ينجەنەرلىك ينستيتۋتىن دا جاتقىزۋعا بولادى. سونداي-اق قىزىلوردا ۋني­ۆەرسيتەتىندە سەۋل ۇلتتىق عىلىم جانە تەحنولوگيا ۋنيۆەرسيتەتىمەن سەرىكتەستىكتە جاساندى ينتەللەكت عىلىمي مەكتەبى قىزمەت اتقارىپ جاتىر.

– مەملەكەت باسشىسىنىڭ عىلىم مەن بىلىمگە ەرەكشە نازار اۋدارۋىنىڭ ناتيجەسىندە, الدىڭعى قاتارلى شەتەلدىك جوعارى وقۋ ورىندارىمەن بايلانىس ورناتىپ, كوپتەگەن مۇمكىندىككە قول جەتكىزىپ جاتىرمىز. اتاپ ايتقاندا, ق.جۇبانوۆ اتىنداعى اقتوبە وڭىرلىك ۋنيۆەرسيتەتى بازاسىنداعى Heriot-Watt ۋنيۆەرسيتەتىنىڭ (شوتلانديا) فيليالى, شاكارىم ۋنيۆەرسيتەتى بازاسىنداعى ەكونوميكا ۋنيۆەرسيتەتىنىڭ (پولشا) فيليالى, ش.ەسەنوۆ ۋنيۆەرسيتەتىنىڭ بازاسىندا نەمىس ينجەنەرلىك ينستيتۋتى قۇرىلدى. بۇل بۇگىنگى تاڭدا جوعارى ءبىلىم ساپاسىنىڭ الەمدىك دەڭگەيدە زور جەتىستىككە جەتىپ كەلە جاتقانىنىڭ دالەلى. م.قوزىباەۆ اتىنداعى سولتۇستىك قازاقستان ۋنيۆەرسيتەتىندە بىلتىر اشىلعان اريزونا ۋنيۆەرسيتەتىنىڭ فيليالى ناتيجەلى جۇمىس ىستەپ جاتىر. وندا 500 ستۋدەنت قوسديپلومدى باعدارلاما بويىنشا وقيدى. ال بيىلعى وقۋ جىلىندا 500 ستۋدەنت 10 ءبىلىم بەرۋ باعدارلاماسى بويىنشا گرانتتا وقۋدى باستادى, ونىڭ 5-ءۋى قوس ديپ­لوم باعدارلاماسى ارقىلى ءبىلىم الادى. سونىمەن قاتار Liesl Folks-پەن كەلىسسوز ناتيجەلەرى بويىنشا اريزونا ۋنيۆەرسيتەتى بىلىكتىلىگىن ارتتىرۋ جانە عىلىمي ىنتىماقتاستىقتى دامىتۋ ءۇشىن م.قوزىباەۆ اتىنداعى سولتۇستىك قازاقستان ۋنيۆەرسيتەتىنەن 30 وتاندىق وقىتۋشىنى قابىلدايتىنى تۋرالى ۋاعدالاستىققا قول جەتكىزدىك. سونىمەن قاتار ءبىز باسقا دا امەريكالىق جوعارى وقۋ ورىندارىمەن كەلىسسوزدەر جۇرگىزىپ جاتىرمىز. العا قويىپ وتىرعان ەندىگى ماقساتىمىز – 2029 جىلعا قاراي ەلىمىزدە 12 شەتەلدىك ۋنيۆەرسيتەتتىڭ فيليالىن اشۋ, – دەدى عىلىم جانە جوعارى ءبىلىم ءمينيسترى ساياسات نۇربەك.

ينفوگرافيكانى جاساعان – زاۋرەش سماعۇل ,«EQ»

بۇعان قوسا الماتىدا ەلىمىزدىڭ عىلىم جانە جوعارى ءبىلىم مينيس­تر­­لى­گىنىڭ باستاماسىمەن ق.ساتباەۆ ۋني­ۆەر­سيتەتى جانىنان QS رەيتينگى بويىنشا 70-ورىندا تۇرعان الەمدەگى ەڭ ۇزدىك وقۋ ورىندارىنىڭ ءبىرى – گونكونگ CityU قالالىق ۋنيۆەرسيتەتىنىڭ فيليالى اشىلدى. ءمينيستردىڭ پىكىرىنشە, CityU مەن ق.ساتباەۆ ۋنيۆەرسيتەتى اراسىنداعى ىنتىماقتاستىق جەرگىلىكتى ستۋدەنتتەر ءۇشىن جاڭا پەرسپەكتيۆالار اشىپ, ولاردىڭ ءبىلىم الۋ تاجىريبەسىن بايىتادى جانە ەلىمىزدەگى جاساندى ينتەللەكت پەن ينجەنەريا سالاسىنداعى يننوۆاتسيالار ءۇشىن قوسىمشا مۇم­كىندىكتەر ۇسىنادى. «مەملەكەت باسشىسى اتاپ وتكەندەي, ۇلتتىق ەكونوميكانى جاڭعىرتۋدا وتاندىق عىلىم اۆانگارد بولۋعا ءتيىس. بۇعان قول جەتكىزۋ ءۇشىن ءبىز عىلىمنىڭ اشىق ءارى وزىق ۇلگىسىن قالىپتاستىرامىز, سونىمەن قاتار اكادەميالىق ەركىندىك­تىڭ ماڭىزدىلىعىن جوعارى باعالاۋى­مىز قاجەت. ويتكەنى بۇگىندە حالىق­ارالىق دەڭگەيدەگى ىنتىماقتاستىق قالىپ­تاسپايىنشا, عىلىمدا بىردە-ءبىر ەلەۋلى جەتىستىككە جەتۋ مۇمكىن ەمەس», دەدى ول.

شەتەلدىك ءبىلىم, وتاندىق تاجىريبە

ەلىمىزدە فيليالدار اشۋدىڭ نەگىزگى ماقساتى وتاندىق جوعارى ءبىلىم بەرۋ جۇيەسىن دامىتۋ, ۇزدىك حالىقارالىق تاجىريبەلەر ارقىلى ونىڭ ساپاسىن ارتتىرۋ بولعاندىقتان, كەلىسسوز جۇرگىزۋگە الدىڭعى قاتارداعى جەتەكشى ۋنيۆەرسيتەتتەر تاڭدالىپ الىناتىنى ءسوزسىز. مىسالى, ەلىمىزدە فيليالدارى اشىلعان رەسەيدىڭ جوعارى وقۋ ورىندارىن پرەزيدەنت قاسىم-جومارت توقاەۆ الەۋەتى جوعارى ءارى سۇرانىسقا يە ۋنيۆەرسيتەتتەر رەتىندە باعالادى. اسىرەسە تەحنيكالىق ماماندىقتاردى وقىتۋدا رەسەي تاجىريبەسى ماڭىزدى. مىسالى, ماسكەۋ ينجەنەرلىك-فيزيكالىق ينستيتۋتى ۇلتتىق يادرو­لىق زەرتتەۋ ۋنيۆەرسيتەتى «Times Higher Education» رەيتينگىندە 401-500-ءشى جانە QS رەيتينگىندە 461-ورىندا تۇر. ۋنيۆەرسيتەت «روساتوم» مەملەكەتتىك اتوم ەنەرگياسى كورپوراتسياسىمەن جانە حالىقارالىق اتوم ەنەرگياسى اگەنتتىگىمەن تىعىز بايلانىستا. اتالعان وقۋ ورنىندا نوبەل سىيلىعىنىڭ لاۋرەاتتارى ن.باسوۆ, ن.سەمەنوۆ, پ.چەرەنكوۆ, ە.تامم, ا.ساحاروۆ, م.فرانك وقىپ, جۇمىس ىستەگەن. ۇكىمەتتىڭ قاۋلىسىمەن فيليال­ اشىلعاننان كەيىن ونىڭ قىزمەتىن جۇزەگە اسىرۋعا 100 گرانت ءبولىندى (70 باكا­لاۆر دارەجەسى جانە 30 ماگيستر دارەجەسى). رەسمي مالىمەت بويىنشا, 2022-2023 وقۋ جىلىندا 32 باكالاۆر مەن 12 ماگيسترانت وقۋدى ءساتتى اياقتاعان.

ي.گۋبكين اتىنداعى رەسەي مەم­لە­كەت­تىك مۇناي جانە گاز ۋنيۆەرسيتەتى «Times Higher Education» رەيتينگىندە 1501-ورىندى يەلەنگەن. ونىڭ ەلىمىزدەگى فيليالىنىڭ جۇمىسىنا باكالاۆريات باعدارلامالارى بويىنشا وقۋعا 100 گرانت بولىنگەن. وقۋ قۇنى 2 ملن تەڭگەنى قۇرايدى.

ال اقش-تاعى جەتەكشى زەرتتەۋ ۋنيۆەرسيتەتتەرىنىڭ ءبىرى, 1885 جىلى قۇرىلعان اريزونا ۋنيۆەرسيتەتى 1 مىڭنان اسا كۇندىزگى وقۋ باعدار­لا­ماسىن جانە 80-گە جۋىق قاشىقتان وقىتۋ باعدارلاماسىن ۇسىنادى. كارنەگي كلاسسيفيكاتسياسىنا سايكەس, اريزونا ۋنيۆەرسيتەتى زەرتتەۋ بەلسەندىلىگى وتە جوعارى R1 دوكتورلىق ۋنيۆەرسيتەتتەرىنە جاتادى. ۋنيۆەرسيتەت حالىقارالىق رەيتينگتەردە, اتاپ ايتقاندا, ARWU رەيتينگىندە 151-200-ورىندا, «Times Higher Education» رەيتينگىندە 180-ورىندا, ال QS WUR رەيتينگىندە 285-ورىندا تۇر. فيليال قىزمەتىنە 1200 گرانت بولىنگەن. بىرلەسكەن ءبىلىم بەرۋ باعدار­­­لامالارى ءۇشىن گرانت قۇنى 2,5 ملن تەڭگەنى, قوس ديپلوم باعدارلاماسى ءۇشىن 4,8 ملن تەڭگەنى قۇرايدى. 2022-2023 وقۋ جىلىندا 155 ستۋدەنت 2 ءبىلىم بەرۋ باعدارلاماسى (بيوتەحنولوگيا جانە اقپا­راتتىق تەحنولوگيالار) بويىنشا, ونىڭ ىشىندە 44-ءى قوس ديپلوم باعدار­لاماسى بويىنشا ءبىلىم العان. ال 2023-2024 وقۋ جىلىندا 434 ستۋدەنت قابىل­دانىپ, وقىتۋ 10 ءبىلىم بەرۋ باعدار­لاماسى بويىنشا جۇرگىزىلىپ جاتىر.

– مۇندا وقۋ, ارينە, وتە قيىن. بىراق مەن جاقسى وقۋعا تىرىسامىن. بىزدە وقىتۋ ءتىلى ارالاس, بىراق ساباقتار نەگىزىنەن اعىلشىن تىلىندە وتكىزىلەدى. ەلدەن الىس كەتپەي-اق شەتەلدىك باعدارلاما بو­يىنشا ءبىلىم الۋعا وسىنداي مۇمكىندىك تۋعانىنا وتە قۋانىشتىمىن, – دەيدى جوعارى ماتەماتيكا مەن فيزيكا ءبىلىم بەرۋ باعدارلاماسى بويىنشا وقىپ جاتقان ستۋدەنت دەنيس ميتيانين.

اقتوبەدە اشىلعان Heriot-Watt ۋنيۆەرسيتەتى – شوتلانديانىڭ ەدين­بۋرگ قالاسىنداعى مەملەكەتتىك زەرتتەۋ ۋنيۆەرسيتەتى. بۇل ۇلىبري­تانياداعى ۇلكەندىگى جاعىنان سەگىزىنشى ورىندا تۇرعان ۋنيۆەرسيتەت. ونىڭ قۇرامىنا 5 مەكتەپ جانە جوعارى وقۋ ورنىنان كەيىنگى ءبىلىم بەرۋ ينستيتۋتى – ەدينبۋرگ بيزنەس مەكتەبى كىرەدى. «Heriot-Watt» حالىقارالىق رەيتينگتەردە, اتاپ ايتقاندا, ARWU رەيتينگىندە 901-1000-ورىندا, «Times Higher Education» رەيتينگىندە 501-600-ورىندا, ال QS WUR رەيتينگىندە 235-ورىندا تۇر. ق.جۇبانوۆ اتىنداعى اقتوبە ۋنيۆەرسيتەتىنىڭ ءباسپاسوز قىزمەتىنىڭ مالىمەتىنشە, 2023-2024 وقۋ جىلىندا وقىتۋ مۇناي ماشيناسىن جاساۋ, ەلەكتر ەنەرگەتيكاسى, كومپيۋتەرلىك ينجەنەريا ءبىلىم بەرۋ باعدارلامالارى بويىنشا جۇرگىزىلىپ جاتىر. بيىلعى وقۋ جىلىندا 286 ستۋدەنت قابىلدانعان. ونىڭ ىشىندە مۇناي-حيميا باعدارلامالارى بويىنشا 56, ەلەكتر ەنەرگەتيكاسى باع­­دارلامالارى بويىنشا 76 جانە كومپيۋتەرلىك ينجەنەريا بويىنشا 154 ءبىلىم الۋشى بار.

– ستۋدەنتتەر ق.جۇبانوۆ اتىنداعى اقتوبە ۋنيۆەرسيتەتى ارقىلى Heriot-Watt-قا تۇسەدى. ياعني ەكى ءبىلىم بەرۋ باع­دار­لاماسىن يگەرىپ قوس ديپلوم الادى. ءبىزدىڭ ۋنيۆەرسيتەت مەملەكەتتىك ستاندارتقا سايكەس جالپى ءبىلىم بەرەتىن پاندەر مەن Heriot-Watt باعدارلاماسىنا سايكەس مامانداندىرىلعان پاندەر بازا­سىن ۇسىنادى. سونىمەن قاتار ستۋدەنت وقۋ كەزەڭىندە شوتلاندياعا, ودان كەيىن مالايزياعا نەمەسە دۋبايعا بارىپ وقۋعا مۇمكىندىك الادى. وقۋدى بىتىرگەننەن كەيىن ستۋدەنتتەر ق.جۇبانوۆ اتىنداعى ۋنيۆەرسيتەتتىڭ وتاندىق ديپ­لومىن جانە Heriot-Watt شوتلانديا ۋنيۆەرسيتەتىنىڭ ديپلومىن الادى, – دەيدى ق.جۇبانوۆ ۋنيۆەرسيتەتىنىڭ رەكتورى لاۋرا قاراباسوۆا.

جاساندى ينتەللەكت – ستراتەگيالىق باعىت

مەملەكەت باسشىسى جولداۋىندا: «جاساندى ينتەللەكتىنىڭ مۇمكىن­دىكتەرىن تولىق پايدالانساق, ءبىلىم ەكونوميكاسىنا تىڭ سەرپىن بەرەمىز. جەتەكشى حالىق­ارالىق كومپانيالارمەن ىنتى­ماقتاس­تىق ورناتۋ كەرەك. بىلىكتى ماماندار دايار­­لاۋىمىز قاجەت. كەمىندە ءۇش بەلگىلى جوعارى وقۋ ورنى جاساندى ينتەللەكت سالا­سىنا قاجەتتى كادر دايار­لاۋمەن جانە زەرت­تەۋلەر جۇرگىزۋمەن اينالىسۋى كەرەك», دەپ تاپسىرما بەرگەن ەدى. وسى مىن­دەتتەرگە سايكەس قىزىلورداداعى ۋني­ۆەرسيتەت بازاسىندا جاساندى ينتەللەكت جانە ينفورماتيكا جوعارى مەكتەبى جۇمىسىن باس­تادى. مۇنداي مۇم­كىندىك قورقىت اتا ۋنيۆەرسيتەتى مەن وڭتۇستىك كورەياداعى سەۋل ۇلتتىق عىلىم جانە تەحنولوگيالار ۋني­ۆەرسيتەتى اراسىنداعى «حالىقارالىق ىنتى­ماقتاستىق بويىنشا جەتەكشى ۋني­ۆەر­سي­تەتتىك جوبا» اياسىندا جۇزەگە اسىپ وتىر. بۇل – ىنتىماقتاستىقتىڭ تەك ال­عاش­قى كەزەڭى. ەكىنشى كەزەڭدە كەلەر جىلدىڭ 4 قىركۇيەگىنەن باستاپ سەۋل ۇلتتىق عىلىم جانە تەحنولوگيا­لار ۋني­ۆەرسيتەتىنىڭ فيليالىن قۇرۋ جوسپار­لان­عان.

– پرەزيدەنت قاسىم-جومارت توقاەۆ جاساندى ينتەللەكت تەحنولوگيالارىنىڭ دامۋى ەل بولاشاعى ءۇشىن ستراتەگيالىق ماڭىزدى باعىت ەكەنىن اتاپ ءوتتى. جاساندى ينتەللەكت تەحنولوگيالارىن قولدانىسقا ەنگىزۋ ەرەكشە نازار اۋدارۋدى قاجەت ەتەدى. سوندىقتان عىلىم جانە جوعارى ءبىلىم مينيسترلىگى وسى باعىت بويىنشا ءبىلىم بەرۋ باعدارلامالارىن ىسكە اسىرۋعا بىردەن كىرىستى. قورقىت اتا ۋنيۆەرسيتەتىندە سەۋل ۇلتتىق عىلىم جانە تەحنولوگيالار ۋنيۆەرسيتەتىنىڭ جوعارى جاساندى ينتەللەكت مەكتەبىنىڭ اشىلۋى IT تەحنولوگيالار سالاسىندا ادامي كاپيتالدى قالىپتاستىرۋعا, عىلىمي زەرتتەۋ ناتيجەلەرى جانە ءوزارا تاجىريبە الماسۋعا, سونداي-اق كورەيا مەن قازاقستان اراسىنداعى جوعارى ءبىلىم بەرۋ سالاسىنداعى ەكىجاقتى ىنتىماقتاستىقتى ودان ءارى ىلگەرىلەتۋگە سەرپىن بەرەدى. جوعارى مەكتەپ جاساندى ينتەللەكت, كيبەرقاۋىپسىزدىك جانە ينفورماتيكا سالاسىندا جاھاندىق باسەكەگە قابىلەتتى كادرلار دايار­لايتىن بولادى. ستۋدەنتتەر مەن پروفەسسور-وقىتۋشىلار اكادەميالىق ۇتقىرلىق جانە بىرلەسكەن ءبىلىم بەرۋ باعدارلامالارى بويىنشا سەۋل ۋنيۆەرسيتەتىندە ءبىلىم الىپ, عىلىمي تاعىلىمدامادان وتە الادى. ال كورەيالىق عالىمدار ءوز تاجىريبەسىمەن ءبولىسۋ ءۇشىن قىزىلورداعا شاقىرىلادى. جاساندى ينتەللەكت جانە ينفورماتيكا جوعارى مەكتەبىنىڭ اشىلۋى وبلىستىڭ دامۋىنا, ەلىمىزدەگى ءىت سالانىڭ بىلىكتى ماماندارمەن تولىعۋىنا جول اشادى. وتانىمىز عانا ەمەس, الىس-جاقىن شەتەلدەر ءۇشىن جاساندى ينتەللەكت سالاسىنداعى بىرەگەي كادرلاردىڭ دايار­لانۋىنا ىقپال ەتە الادى. ال 2024 جىلى قورقىت اتا اتىنداعى قىزىلوردا ۋنيۆەرسيتەتىندە سەۋل ۋنيۆەرسيتەتىنىڭ فيليالى اشىلادى دەپ جوسپارلانىپ جاتىر, – دەدى ساياسات نۇربەك.

جوبا 2023-2030 جىلدارعا ارنالعان. ونىڭ اياسىندا «جاساندى ينتەللەكت», «كيبەرقاۋىپسىزدىك», «ينفورماتيكا» ءبىلىم بەرۋ باعدارلامالارىنىڭ مازمۇنى ازىرلەنەتىن بولادى. ستۋدەنت­تەر­دى وقىتۋ مەملەكەتتىك گرانت ەسەبىنەن جانە كەلىسىمشارت نەگىزىندە جۇزەگە اسىرىلادى. جوعارى مەكتەپتىڭ زەرتحانالىق جابدىقتارى LUPIC جوبا­سى­مەن قامتاماسىز ەتىلەدى. قورقىت اتا ۋني­ۆەرسيتەتىندە وقۋدى اياقتاعاننان كەيىن باكالاۆر دارەجەسى بەرىلەدى. ايتا كەتەيىك, اتالعان ۋنيۆەرسيتەت حالىقارالىق رەيتيگتە, دالىرەك ايتساق «Times Higher Education» رەيتينگىندە 1201-1800-ورىنعا, ال QS WUR رەيتينگىندە 1001-1200-ورىنعا يە.

جوعارى ءبىلىم سالاسىنداعى ىنتى­­ماقتاستىق الەمدىك دەڭگەيدەگى اكادە­ميالىق تاجىريبەگە قول جەتكىزۋگە مۇمكىندىك بەرىپ وتىر. بۇل ءۇردىس ءالى جالعاسىن تابا بەرەدى. جاقىندا ءى.جانسۇگىروۆ اتىنداعى جەتىسۋ ۋنيۆەر­سيتەتى مەن ماركە پوليتەحنيكالىق ۋني­ۆەرسيتەتى (يتاليا) اراسىندا فيليال قۇرۋ تۋرالى, ءال-فارابي اتىنداعى قازاق ۇلتتىق ۋنيۆەرسيتەتىندە سولتۇستىك-باتىس پوليتەحنيكالىق ۋنيۆەرسيتەتىنىڭ (قحر) فيليالىن اشۋ تۋرالى كەلىسىمگە قول قويىلدى. الداعى ۋاقىتتا اتالعان جوعارى وقۋ ورىندارىنىڭ فيليالى جۇمىسىن باستايتىن بولادى.