ءۇش مايدانگەردىڭ سۇيەگى ەلگە جەتكىزىلدى

قارۋلى كۇشتەر باس شتابىنىڭ ۇيىمداستىرۋ-جۇمىلدىرۋ جۇمىسى دەپارتامەنتىنىڭ باستىعى گەنەرال-مايور باۋىرجان ارتىقوۆ جاۋىنگەرلەردىڭ سۇيەكتەرىن ىزدەۋگە بەلسەندى قاتىسقانداردىڭ بارلىعىنا العىسىن ءبىلدىردى.

«قازاقستاننان سۇراپىل سوعىسقا ميلليون 200 مىڭ ازامات اتتانىپ, ولاردىڭ 600 مىڭنان استامى مايدان دالاسىندا قازا تاپتى. قازاق جاۋىنگەرلەرىنىڭ ەرلىكتەرى قازىرگى وتان قورعاۋشىلار ءۇشىن ءور رۋحتىڭ, مىزعىماس باتىلدىقتىڭ, شىنايى جانقيارلىق پەن وتانعا دەگەن سۇيىسپەنشىلىكتىڭ ۇلگىسى», دەدى ول. 

رەسەيلىك ىزدەۋشىلەر جۇمىسىنىڭ ناتيجەسىندە 80 جىلدان اسا ۋاقىتتان سوڭ قىزىل اسكەرلەر – سيلان مامەتوۆ (1912 جىلى تۋعان, قىزىلوردا وبلىسى قازالى اۋدانىنىڭ تۋماسى), قادىربەك داۋلەتقۇلوۆ (1922 جىلى تۋعان, جامبىل وبلىسى مەركى اۋدانىنىڭ تۋماسى) جانە كيسىم اديەۆتىڭ (1911 جىلى تۋعان, گۋرەۆ وبلىسى گۋرەۆ قالاسىنىڭ تۋماسى) سۇيەكتەرى ەلگە جەتتى. 

«ولاردىڭ ەرلىك جولى كىتاپتاردا, اندەردە, ەسكەرتكىشتەردە, مەموريالداردا, مۇراجاي جادىگەرلەرىندە جازىلىپ قالدى, ەسىمدەرىمەن كوشەلەر اتالادى. ەش ۇمىتىلعان جوق.  ىزدەۋشىلەرگە وسىنداي اسىل ميسسيانى مۇرات ەتكەنى ءۇشىن ريزاشىلىعىمىزدى بىلدىرەمىز», دەپ اتاپ ءوتتى «اتامنىڭ اماناتى» قب توراعاسى مۇرات مولداعاليەۆ.

144 اتقىشتار ديۆيزياسىنىڭ قىزىل اسكەرى سيلان مامەتوۆ 1941 جىلى قازا تاپتى. ونىڭ سۇيەگىن «ەحو ۆوينى» ىزدەۋ جاساعى ماسكەۋ وبلىسى, رۋزسك اۋدانى, اپالششينو اۋىلىنىڭ ماڭىنان تاپتى. قادىربەك داۋلەتقۇلوۆتى ورلوۆ وبلىسى, تروسنيانسك اۋدانى, مۋراۆل اۋىلىنان «زاستاۆا سۆ. يلي مۋرومتسا» جاساعىنىڭ ىزدەۋشىلەرى تاپتى. 1942 جىلى حابار-وشارسىز كەتكەن كيسىم اديەۆ سمولەنسك وبلىسى, تەمنينسك اۋدانى, باتيۋشكوۆو اۋىلىنىڭ جانىنداعى شاتقالدان تابىلدى.  

سيلان مامەتوۆتىڭ تۋىستارى تابىلمادى. «Atamnyn Amanaty» قب ىزدەۋشىلەرى سارباز قيسىم اديەۆتىڭ اتىراۋ قالاسىندا تۇراتىن تۋىستارىن تاپتى. استاناعا جامبىل وبلىسىنان قادىربەك داۋلەتقۇلوۆتىڭ ىنىسىنەن تاراعان شوبەرەسى – ەرنۇر نامەتقۇل كەلدى.  

«اتام قادىربەك داۋلەتقۇلوۆ 1941 جىلى مايدانعا اتتانعان ەكەن. وكىنىشكە قاراي, وتباسىن قۇرماعان كەزىندە كەتىپتى. وسى جىلدار ىشىندە اتامدى كوپ ىزدەدىك. ول شەكاراشى بولىپ, كۋرسك دوعاسىندا قازا تاپقانى انىقتالدى. بۇكىل وتباسىمىزدىڭ اتىنان قورعانىس مينيسترلىگى باسشىلىعىنا, بارلىق ىزدەۋشىلەرگە, وسىنداي اماناتتى ابىرويمەن اتقارىپ جۇرگەندەرگە, اۋقىمدى جۇمىستارى ءۇشىن زور العىسىمدى بىلدىرگىم كەلەدى», دەدى ول. 

ىزدەۋشىلەر سونىمەن قاتار قىزىل اسكەر ساربازدارىنىڭ قۇجاتتارىن, كاسكالارىن, مەتالل ساپتىاياقتارىن, ساپەر كۇرەكتەرىن, تۇيمەلەرىن جانە وزدەرىنە تيەسىلى جەكە زاتتارىن تۋىستارىنا بەردى.  

جاۋىنگەرلەردىڭ سۇيەكتەرىن قايتا جەرلەۋ اسكەري قۇرمەتپەن وزدەرى تۋعان وڭىرلەردە وتەدى.