س.ەلەمەسوۆ 1973 جىلى 21 اقپاندا اۋىسىم شەبەرى جامبىل ىبىراەۆپەن بىرگە جەزقازعان مىس زاۋىتىندا العاشقى قارا مىس العان كونۆەرتورشى بولاتىن. ول ەڭبەك قىزىل تۋ وردەنىمەن, قازكسر جوعارعى كەڭەسىنىڭ قۇرمەت گراموتاسىمەن ماراپاتتالدى, كسرو-نىڭ قۇرمەتتى مەتاللۋرگى اتاندى, 2012 جىلى ومىردەن وزدى. جەزقازعان مىس زاۋىتىندا قازىر ونىڭ جولىن بالالارى مەن نەمەرەلەرى جالعاستىرىپ كەلەدى.
پرەمەرانى تاماشالاۋعا كورەرمەندەر كوپ جينالدى. حالىق قويۋشى-رەجيسسەر – تەمىرجان جانبوتاەۆتىڭ درامانى ءساتتى ساحنالاي بىلگەنىنە جانە ارتىستەردىڭ, اسىرەسە باس كەيىپكەردى سومداعان اكتەر جانىبەك ارىستانبەكوۆتىڭ ونەرىنە ريزاشىلىق ءبىلدىردى.
قويىلىمعا كەڭەسشىلىك جاساعان قازاقستاننىڭ قۇرمەتتى مەتاللۋرگى, قاراعاندى وبلىسىنىڭ جانە جەزقازعان قالاسىنىڭ قۇرمەتتى ازاماتى تولەگەن بۇكىروۆ كەزىندە س.ەلەمەسوۆتىڭ شاكىرتى بولعان.
– وسىدان 25 جىل بۇرىن مەن تەحنيكا عىلىمىنىڭ كانديداتى اتانعانىمدا, سۇلتەكەڭ مەنى جۇمىس ورنىما ارنايى ىزدەپ كەلىپ قۇتتىقتادى. قولىندا التىن ساعاتى بار ەكەن, سونى ماعان كورىمدىك رەتىندە سىيعا تارتقان ەدى, – دەگەن ەستەلىگىمەن بولىسكەن ت.بۇكىروۆ پرەمەرادان سوڭ ەلدىڭ كوز الدىندا اراعا شيرەك عاسىر سالىپ, سول ساعاتتى سۇلتانبەك اعانىڭ اتاسى ەڭبەك ەتكەن تسەحتا جۇمىس ىستەيتىن نەمەرەسى ابزالدىڭ قولىنا قايتا تاقتى.
ارالارىنان شىققان مايتالمان مەتاللۋرگتىڭ ءومىرىن ارقاۋ ەتكەن تەاتر ۇجىمىن «قازاقمىس كورپوراتسياسى» جشس جەزقازعانتۇستىمەت وندىرىستىك بىرلەستىگىنىڭ باس ديرەكتورى جاسۇلان باينيازوۆ پەن جەزقازعان مىس قورىتۋ زاۋىتى ديرەكتورى جاسۇلان باينيازوۆ قۇتتىقتادى.
ەڭبەك ادامىن دارىپتەگەن دراما الداعى ۋاقىتتا تەاتر رەپەرتۋارىنان تۇراقتى تۇردە ورىن الاتىن بولادى.
جەزقازعان قالاسى
