تالانتتى جاستاردىڭ شىعارماشىلىعىن تانىستىرۋعا ارنالعان كينو بايگە سالتاناتى اباي اتىنداعى ۇلتتىق وپەرا جانە بالەت تەاترىندا رەجيسسەر ەلدار قاپاروۆتىڭ «سوعىس تۇتقىنى» تاريحي دراماسىنىڭ پرەمەراسىمەن اشىلدى. فيلمدە ەكىنشى دۇنيەجۇزىلىك سوعىستان كەيىن كەڭەستىڭ تۇتقىنىندا بولعان جاپوندىق جاس جىگىت, يمپەراتورلىق مەكتەپتىڭ كۋرسانتى احيكو تەتسۋرونىڭ شىنايى تاريحى مەن تاعدىرى باياندالادى. تۇتقيىلدان قولعا تۇسكەن جاپوننىڭ جاس جىگىتى لاگەردە ءجۇرىپ, وت پەن وقتىڭ ورتاسىندا شىڭدالعان ناعىز شايقاس باتىرى, كەڭەس ارمياسىندا قىزمەت ەتىپ, بەرلينگە شابۋىل جاساۋعا قاتىسقان قازاق جاۋىنگەرى اقاجاندى كەزدەستىرەدى. قان مايداننىڭ ىشىنەن امان شىققان اقاجان كەيىن جاپون سوعىسىنا جىبەرىلىپ, وندا اۋىر جاراقات الىپ, قاپىدا جاۋ قولىنا تۇسەدى. جازاسىن وتەپ, قايتىپ ورالعانىمەن, ساياسي سەنىمسىزدىككە ۇشىراعان اقاجانعا «ساتقىن», «حالىق جاۋى» دەگەن ۇكىم كەسىلىپ, سوتتالىپ كەتە بارادى.
ءفيلمدى پروديۋسەرلەر بوريس شىرداباەۆ پەن ءاليا ۋبالجانوۆا باستاعان حالىقارالىق شىعارماشىلىق توپ تۇسىرگەن. شاعىن عانا جاپون ارالىندا شىر ەتىپ دۇنيەگە كەلىپ, كەڭ-بايتاق قازاق توپىراعىن باقيعا اتتانىپ كەتكەنشە اتاقونىسىم دەپ تانىعان احيكونىڭ تالايلى تاعدىرىنا ارنالعان فيلمگە جاپونيا جاعىنان سانو سيندزيۋ, شۋيچي ەسيمۋرا قاتىسقان. باستى كەيىپكەرلەردىڭ رولدەرىن بەلگىلى تەاتر جانە كينو ءارتىسى سىرىم قاشقاباەۆ پەن جاپون اكتەرى ەيساكۋ وگاساۆارا سومداعان.
«باستاۋ» فەستيۆالىنە قاتىسۋعا نيەت بىلدىرگەندەردىڭ بيىلعى قاراسى قالىڭ. يسپانيا, فرانتسيا, رۋمىنيا, پولشا, يوردانيا, ءۇندىستان, گرۋزيا, وزبەكستان, قىرعىزستان باسقا دا ەلدەردەن 700-دەن اسا ءوتىنىمنىڭ كەلىپ ءتۇسۋى فەستيۆال تانىمالدىلىعى ارتا تۇسكەنىنىڭ ايعاعى بولسا كەرەك.
وسى جىلى Bastau DEBUTS تولىقمەترلى دەبيۋتتىك كوركەم فيلمدەردىڭ حالىقارالىق بايقاۋى دارىندى جاستارعا قاجەت شىعارماشىلىق الاڭ رەتىندە ەرەكشە سۇرانىسقا يە, وعان بۇكىل الەم بويىنشا «ا» كلاسىنداعى ءىرى كينوفەستيۆالعا قاتىسقان 10 كارتينا كىردى. مۇندا بەرلين كينوفەستيۆالىندە جۇلدەلى بولعان يسپاندىق «20 تىسياچ پورود پچيول» كارتيناسى جانە بيىلعى كانن فەستيۆالىنىڭ قاتىسۋشىلارى – «ەسلي بى تولكو يا موگ ۆپاست ۆ سپياچكۋ» (موڭعوليا, فرانتسيا, شۆەيتساريا, قاتار), سونداي-اق «ينشاللاح مالچيك» (يوردانيا, قاتار, ساۋد ارابياسى, فرانتسيا) فيلمدەرى بار. سونىمەن بىرگە الەمدىك پرەمەراسى بەرلينالەدە وتكەن رەسەيلىك «كلەتكا يششەت پتيتسۋ» ءفيلمى, وزبەكستان رەجيسسەرى شوكير حوليكوۆتىڭ كوپتەگەن حالىقارالىق كينوفەستيۆال جەڭىمپازى اتانعان «جەكسەنبى» كينوسى دا قاتىسادى. ال ەلىمىزدىڭ اتىنان بىردەن ەكى تۋىندى – ماكسيم اكباروۆتىڭ «دالا» جانە داۋلەتجان ماحمۇتتىڭ «گلوبۋس» اتتى فيلمدەرى سىنعا تۇسەدى.
كونكۋرستان تىس باعدارلامالاردىڭ دا مازمۇنى باي. فەستيۆال كەزىندە قىسقامەترلى كوركەم جانە دەرەكتى فيلم جوبالارى رەجيسسەرلەرىنە ارنالعان Almaty Film Lab شەبەرحاناسى ۇيىمداستىرىلادى. جەڭىمپازدار 7 ملن تەڭگە مولشەرىندەگى اقشالاي سىيلىققا يە بولادى.
بيىلعى فەستيۆالدىڭ قادىرلى قوناقتارىنىڭ ءبىرى – ايگىلى بريتاندىق پروديۋسەر پول برەتت. تانىمال پروديۋسەر 30-دان اسا ءتۇرلى جانرداعى تولىقمەترلى فيلمدەر وندىرىسىنە قاتىسقان. ولاردىڭ ىشىندەگى ەڭ تانىمالى – رەجيسسەر توم حۋپەردىڭ «وسكار» سىيلىعىن جەڭىپ العان «كورول گوۆوريت» كارتيناسى, وندا پول ءفيلمنىڭ اتقارۋشى پروديۋسەرى بولعان. پول فەستيۆال اياسىندا ء«فيلمىڭىزدى الەمگە قالاي تانىتۋعا بولادى؟» تاقىرىبىندا شەبەرلىك ساباعىن وتكىزەدى.
سونىمەن قاتار ايگىلى امەريكالىق ستسەناريست, پروديۋسەر جانە جازۋشى دجەيمس ۆ.حارتتىڭ ستسەناري شەبەرلىگى بويىنشا جۇرگىزەتىن ونلاين ساباعى دا جاس رەجيسسەرلەردى قازىردەن قىزىقتىرىپ وتىر.
سونداي-اق بيىلعى فەستيۆالعا العاش رەت فرانتسيانىڭ قازاقستانداعى ەلشىلىگى ءوز قولداۋىن ءبىلدىرىپ وتىر. وسى ىنتىماقتاستىق شەڭبەرىندە la CinéFabrique كينومەكتەبىنىڭ جانە DOCMONDE قاۋىمداستىعىنىڭ بىرقاتار شەبەرلىك سىنىپتارى مەن تۇساۋكەسەرلەرى, RUBIKA انيماتسيالىق مەكتەبى (فرانتسيا) مەن ت.جۇرگەنوۆ اتىنداعى قازاق ۇلتتىق ونەر اكادەمياسى جانە «قازانيماتسيا» اراسىندا مەموراندۋمعا قول قويىلادى.
الماتى
