دەپۋتات: ۇكىمەتتىڭ جىلۋ ماۋسىمىنا ۇزاق مەرزىمدى جوسپارى بار ما؟

دەپۋتاتتىڭ ايتۋىنشا, وتكەن جىلىتۋ ماۋسىمىنداعى اپاتتاردى ەسكەرە وتىرىپ, پارتيا بىلتىر 30 قاراشادا جانە 21 جەلتوقساندا, سونداي-اق, بيىل 18 قاڭتاردا ۇكىمەتكە اپاتتاردىڭ سالدارىن جويىپ, بولاشاقتا قايتالانباۋىنىڭ الدىن الۋ ماسەلەلەرىن كوتەرىپ دەپۋتاتتىق ساۋال جولداعان. ودان بولەك, جاڭا ماۋسىمعا دايىندىق كەزەڭىندە بيىل 15 مامىردا, 14 ماۋسىمدا, 4 قازاندا جولداعان ساۋالدارىندا دا اتالعان ماسەلەنى تاعى كوتەرگەن.

«مەملەكەتتىك ورگانداردىڭ ساۋالدارىنا بەرگەن جاۋاپتارى كوڭىلگە قونىمدى بولعانىمەن, وكىنىشكە قاراي, ەندى عانا باستالعان اياز كوتەرىڭكى كوڭىلدى سۋ سەپكەندەي باستى. ەندى, مىنە, بۇكىل ەل جىلۋ بەرۋ ماۋسىمىن ۇرەيلەنە باستان وتكەرىپ وتىر. قازىرگى جاعدايدا بيىلعى ماۋسىمداعى وقيعالاردىڭ قالاي ءوربيتىنىن بولجاۋ قيىن ەكەنىن تۇسىنەمىز. ۇكىمەتتە جىلۋ-ەنەرگەتيكا سالاسىنداعى قوردالانىپ قالعان ماسەلەلەردى كەشەندى تۇردە شەشۋدىڭ ۇزاق مەرزىمدى جوسپارلارى بار ما؟ بار بولسا جوسپارلاردىڭ قانداي ەكەنىن حابارلاۋدى سۇرايمىز. «اق جول» فراكتسياسىنىڭ بۇعان دەيىنگى ساۋالدارىندا دا بۇل سۇراق ءدال وسىلاي قويىلعان ەدى, ەندى بەلگىلى بولعانداي, سول ساۋالدارىمىزعا سەنىمسىز جاۋاپتار الىپ كەلىپپىز», دەدى دەپۋتات ەرلان بارلىباەۆ.