فوتو: اشىق دەرەككوز
«بيىلعى جىلعى 11 جەلتوقساندا پارلامەنت سەناتىنىڭ توراعاسى جانە سەناتتىڭ بىرقاتار دەپۋتاتى وسكەمەندە وبلىس باسشىلىعىمەن جانە وبلىستىق ءماسليحات دەپۋتاتتارىمەن كەزدەسۋ وتكىزگەن بولاتىن. وندا شىعىس قازاقستان وبلىسىنىڭ دەنساۋلىق ساقتاۋ ۇيىمدارىنداعى كۇردەلى قارجى احۋالىنا قاتىستى ماسەلەلەر ايتىلدى. ماسەلەن, وبلىستاعى 13 ۇيىمدا 6 ملرد تەڭگەدەن استام, ونىڭ ىشىندە ەڭبەكاقى تولەۋ قورى بويىنشا 1,3 ملرد تەڭگەدەن استام سوماسىندا نەسيە بەرەشەگى تۋىنداپ وتىر», دەپ سەناتور وسىعان دەيىن شىعىس قازاقستان تۇرعىندارى كوتەرگەن ماسەلەگە توقتالدى.
دەپۋتاتتىڭ ايتۋىنشا, 2023 جىلعى 20 قاراشاداعى جاعداي بويىنشا 619 مەديتسينالىق ۇيىمدا جالپى سوماسى 109,6 ملرد تەڭگە بولاتىن نەسيە بەرەشەگى بار. مەديتسينالىق ۇيىمدار ءتيىمسىز شىعىنداردى عانا ەمەس, حالىققا كورسەتىلەتىن قىزمەتتەردىڭ كولەمىن دە قىسقارتۋعا ءماجبۇر. مەديتسينالىق قىزمەتتەردىڭ ءتاريفى ناقتى شىعىندى جابا المايدى, بۇل مەديتسينالىق ۇيىمداردا «تەسىكتەردى بىتەۋ» تاجىريبەسىنە اكەلىپ سوقتى.
«تەك ەسەپتەلگەن نەسيە بەرەشەگىنىڭ كولەمى 2021 جىلدان باستاپ 2 ەسە كوبەيىپ كەتتى, 2022 جىلدىڭ قورىتىندىسى بويىنشا ول 100 ملرد تەڭگەنى قۇرادى, بۇگىنگى تاڭدا 109 ملرد بولىپ وتىر. بۇل سالانى قارجىلاندىرۋ كولەمىنىڭ 2,5 ەسە وسۋىنە قاراماستان بولعان جاعداي. سونداي-اق سوڭعى 3 جىلدا حالىقتىڭ قالتا شىعىنى دا كۇتكەندەگىدەي ازايا قويمادى», دەدى اقمارال ءالنازاروۆا.
سەناتور مەديتسينالىق ۇيىمدارداعى بۇل قارجى پروبلەمالارى دەنساۋلىق ساقتاۋدى ستراتەگيالىق جوسپارلاۋداعى كەمشىلىكتەرگە, مەديتسينالىق قىزمەتتەر نومەنكلاتۋراسىنىڭ بولماۋىنا, سونداي-اق شىعىستاردى باقىلاۋ تەتىگىنىڭ ازدىعىنا بايلانىستى ەكەنىن اتاپ ءوتتى. اقمارال ءالنازاروۆا وسىعان بايلانىستى جاعدايدىڭ سەبەبىن تالداپ, مەديتسينالىق ۇيىمداردىڭ نەسيە بەرەشەگىن تومەندەتۋ جانە قارجىنى پايدالانۋ تيىمدىلىگىن ارتتىرۋ ءۇشىن شۇعىل جانە جۇيەلى شارالار قابىلداۋدى ۇسىندى.
