فوتو: primeminister.kz
كەزدەسۋ بارىسىندا پرەمەر-مينيستر يسپانيا قازاقستاننىڭ ەۋروپالىق وداقتاعى نەگىزگى ساۋدا-ەكونوميكالىق ارىپتەستەرىنىڭ ءبىرى ەكەنىن, ەكى ەل اراسىنداعى تاۋار اينالىمى وتكەن جىلى 42%-عا وسكەنىن ايتتى.
ينۆەستيتسيالىق ىنتىماقتاستىقتى ارتتىرۋ ماقساتىندا 2005 جىلدان بەرى يسپانيانىڭ كومپانيالارى قازاقستانعا شامامەن 300 ملن اقش دوللارى كولەمىندە ينۆەستيتسيا قۇيدى. ەلىمىزدە جەتەكشى يسپانيالىق برەندتەر, ولاردىڭ ىشىندە Maxam, Inditex, Pronovias جانە باسقالارىنىڭ ونىمدەرى ساتىلادى.
ء«بىز Tecnicas Reunidas كومپانياسىنىڭ اقتاۋداعى جاڭا اممياك-كارباميد كەشەنىنىڭ جوبالىق قۇجاتتاماسىن ازىرلەۋ, سونداي-اق اتىراۋ وبلىسىندا پوليەتيلەن ءوندىرۋ اياسىندا «قازازوت» جانە «قازمۇنايگازبەن» ىنتىماقتاستىعىن قولدايمىز. قۇنى جوعارى وسىنداي جوبالاردى تابىستى ىسكە اسىرۋ ماڭىزدى. ءوز تاراپىنان ۇكىمەت ەكونوميكانىڭ باسىم سالالارىندا ينۆەستيتسيالىق جوبالاردى ىسكە اسىرۋ ءۇشىن قاجەتتى قولداۋ كورسەتۋگە دايىن», دەدى ءا.سمايىلوۆ.
ۇكىمەت باسشىسى اممياك-كارباميد كەشەنىنىڭ قۇرىلىسى قازاقستان ءۇشىن جاڭا ءونىم – كارباميد ءوندىرىسىن جولعا قويۋعا مۇمكىندىك بەرەتىنىن, بۇل – كەز كەلگەن توپىراققا جارايتىن قۇرامىندا ازوت بار بىرەگەي تىڭايتقىش ەكەنىن جەتكىزدى. اتىراۋ وبلىسىندا پوليەتيلەن ءوندىرىسىن جولعا قويۋ دا ەكونوميكانى ارتاراپتاندىرۋعا سەرپىن بەرەتىنىن ايتتى.
ء«بىز اتالعان ەكى ماڭىزدى جوبا بويىنشا جۇمىستى بىرنەشە اي بۇرىن باستادىق. ەڭ وڭتايلى شەشىمدەردى ىزدەپ تاۋىپ, جەرگىلىكتى كومپانيالارمەن سەرىكتەستىكتە ءتيىمدى قۇرىلىس جۇمىستارىن جۇرگىزەتىنىمىزگە سەندىرە الامىن. جوبالاردى ءساتتى ىسكە اسىرۋ ءۇشىن قولدان كەلگەننىڭ ءبارىن جاسايمىز», دەدى Tecnicas Reunidas كومپانياسىنىڭ اتقارۋشى توراعاسى حۋان ليادو.
Tecnicas Reunidas – ونەركاسىپتىك جوبالاردى ازىرلەپ, جۇزەگە اسىرۋعا ماماندانعان يسپانيالىق كومپانيا. قىزمەت ەتكەن جىلدارى كومپانيا الەمنىڭ 60-تان استام ەلىندە 1 000-نان استام ونەركاسىپتىك كاسىپورىننىڭ قۇرىلىسىن جوبالاپ, باسقاردى.
2020 جىلى Tecnicas Reunidas استانادا كەڭسەسىن اشتى. بۇل كومپانيا 2002-2004 جىلدارى ەلدەگى مۇناي-گاز سالاسىندا جۇرگىزىلگەن ينجەنەرلىك جۇمىستارعا تارتىلعان بولاتىن.
