فوتو: اشىق دەرەككوز
ماسەلەن, «قاراعاندى-استانا» تاس جولىنىڭ بويىندا قالىپ قويعان وزبەكستان ازاماتتارى قۇتقارىلدى. سارىاعاشتان جولعا شىعىپ, ەلورداعا جەتپەي سىنعان اۆتوبۋستا 20 شاقتى جولاۋشى بولعان. ناتيجەسىندە ولار وساكاروۆ اۋدانىنا دەيىن جەتكىزىلىپ, جاتىن ورىن مەن ىشەر تاماقپەن قامتاماسىز ەتىلدى.
«جەكسەنبى كۇنى كەشكى ساعات سەگىزدە اۆتوبۋسپەن جولعا شىقتىق. وزبەكستاننان كەلدىك. قۇتقارۋشىلار بىزگە ىستىق تاماق بەرىپ, جاتىن ورىنعا ورنالاستىردى. ءبىز 25 ادام ەدىك, 8 ادام قاراعاندىدا ءتۇسىپ كەتكەن», دەدى شەتەل ازاماتى ابۋباكىر حايتوۆ «Qazaqstan» ۇلتتىق ارناسىنا بەرگەن سۇحباتىندا.
بۇدان بولەك قىزىلوردا پوليتسەيلەرى اۋا رايىنىڭ قولايسىزدىعىنا بايلانىستى سوڭعى ءبىر تاۋلىكتە 15 جۇرگىزۋشىگە قول ۇشىن سوزدى.
تۇركىستان وبلىسىندا دا اقتۇتەك بوران سالدارىنان جولدا قالىپ قويعاندار قۇتقارىلدى. قازىر اۋى رايىنىڭ كۇرت سۋىتۋىنا بايلانىستى اۋماق مەكتەپتەرىنىڭ باسىم كوپشىلىگى قاشىقتان وقىتۋعا كوشكەن.
ال «شىمكەنت-تاراز» اۆتوجولى مەن تۇلكىباس اۋدانىندا ىشكى جولدار ۋاقىتشا جابىلدى. اتالعان كۇرەجول بويىندا ءۇش بىردەي تويوتا الفارد كولىگىنىڭ جۇرگىزۋشىلەرى مەن جولاۋشىلارى قۇتقارىلعان.
ايتا كەتسەك, بايدىبەك اۋدانىندا كەشەدەن بەرى بۇرقاسىن جەل سوعىپ تۇر. سونىڭ سالدارىنان تۇركىستان وبلىسى بايدىبەك پەن تۇلكىباس اۋداندارىنىڭ اۋماعى, باتىس-ەۋروپا باتىس-قىتاي تراسساسى مەن وعان قوسىلاتىن ەلدى مەكەندەر جولدارى جابىلدى. بۇل اۋماقتاردان دا بىرنەشە جەڭىل كولىك قار قۇرساۋىنان شىعارىلىپ, اقتۇتەكتە اداسىپ كەتكەن شوپان دا تابىلدى.
سونداي-اق اقمولا وبلىسىندا قاتتى ايازدا جولدا قالعان 31 ادام كوكشەتاۋ قالاسىنداعى جىلىتۋ پۋنكتىنە امان-ەسەن جەتكىزىلدى. ولاردىڭ اراسىندا ەكى بالا بولعان. بارلىعى تاجىكستان رەسپۋبليكاسىنىڭ ازاماتتارى.
