مەملەكەت باسشىسىنىڭ سۋ تاپشىلىعى ماسەلەسىن دەر كەزىندە كوتەرىپ, ارنايى 20 جاڭا بوگەن سالۋ, 3 مىڭ 500 شاقىرىمدىق كانالدى جاڭعىرتۋدى تاپسىرعانىن اتاپ ايتقان دەپۋتات رەسمي دەرەكتەردى كەلتىردى: ەلىمىزدە 1 478 گيدروتەحنيكالىق قۇرىلعى بار. 342 سۋ قويماسى, 219 دامبى, 119 سۋ تورابى, 313 توعان بار. ولاردىڭ 333-ءى رەسپۋبليكالىق مەنشىكتە, 895-ءى كوممۋنالدىق مەنشىكتە. ال 228-ءى جەكەمەنشىكتە. يەسىز قالعان 22 سۋ قويماسى بار.
«سۋ قويمالارى ەڭ باستى ستراتەگيالىق نىسان ەكەنىن ءبىلۋىمىز كەرەك, ونىڭ كوبى جەكەشەلەندىرىلىپ كەتكەندىكتەن قاتتى الاڭداتادى. قوجايىندارى نە ىستەپ, نە قويىپ جاتقانى بەلگىسىز. جەكەمەنشىك بولعاننان كەيىن مەملەكەتتىك باقىلاۋدان تىس قالعان», دەدى دەپۋتات.
ب.بازاربەكتىڭ سوزىنشە جالپى سۋ نىساندارىنا تولىق تۇگەندەۋ جۇمىسىن جاساپ, جايىن ناقتىلاۋ, قاجەت بولسا ولاردى تەز ارادا مەملەكەت مەنشىگىنە قايتارۋ كەزەك كۇتتىرمەيتىن ءىس. مىسالى پلاتينالاردىڭ سالىنعانىنا 30-40 جىلدان اسسا, اپات بولۋ قاۋپى ارتادى ەكەن. قانشاسى توزىعى جەتكەن, قانشاسىنا جوندەۋ جۇمىستارى قاجەت دەگەن مالىمەتتەر انىق ەمەس. بۇل مەملەكەتتىك جاۋاپتى مەكەمە تاراپىنان باقىلاۋ مەن مونيتورينگتىڭ السىزدىگىن كورسەتەدى.
«كەلەسى ءبىر ماڭىزدى نىسان بۇل – كانالدار. مالىمەتتەر بويىنشا, 3 مىڭ 500-دەي ماگيسترالدىك جانە شارۋاشىلىق كانالدار بار, ولاردىڭ جارتىسىنان استامى توزىعى جەتكەن, سالدارىنان 60 پايىز سۋ قۇردىمعا كەتىپ جاتىر. بۇل ۇلكەن شىعىن, دەمەك بار سۋدى ىسىراپ ەتىپ دۇرىس پايدالانا الماي وتىرمىز», دەدى ب. بازاربەك.
ماجىلىسمەن كانالداردىڭ ءبىرازى جەكەمەنشىككە ءوتىپ كەتكەنىن, كىمنىڭ يەلىگىندە ەكەنى دە انىق ەمەس ەكەنىن ايتتى. سونداي-اق دەپۋتات پرەزيدەنتتىڭ كانالدارعا قاتىستى بەرگەن تاپسىرماسى وتە ورىندى ەكەنىن اتاپ ءوتتى.
«ماسەلەنىڭ ماڭىزدىلىعىن ەسكەرە وتىرىپ, «Amanat» پارتياسى جانىنان ارنايى كوميسسيا قۇرۋ قاجەت دەپ ەسەپتەيمىن. اتالعان پارتيانىڭ جايىلىمدىق جەرلەردى مەملەكەت مەنشىگىنە قايتارۋ جونىندە قىلعان تاباندى ءىس-ارەكەتى كوپكە بەلگىلى, سول تاجىريبەنى كانالدارعا جانە سۋ قويمالارىنا قاتىستى دا قولدانۋعا ابدەن بولادى. ارىپتەستەرىمدى وسى ۇسىنىستى قولداۋعا شاقىرامىن», دەدى ول.
«ەلىمىزدە جەكەمەنشىككە ءوتىپ, بىراق قاراۋسىز قالعان, جۇمىستارى ۇيلەستىرىلمەگەن سۋ قويمالارىن, دامبىلاردى, كولدەردى, بوگەندەردى مەملەكەتكە قايتارۋ شارالارىن قولعا الۋ كەرەك جانە دەرەۋ تەكسەرۋ جۇمىستارىن جۇرگىزۋ قاجەت. ارينە, سونىمەن قوسا, سۋ رەسۋرستارىن ۇتىمدى پايدالانۋ ماڭىزدى. سۋدىڭ دا سۇراۋى بار دەپ حالقىمىز بەكەر ايتپاعان, سول سەبەپتى سۋ سالاسىندا زاڭسىزدىققا جول بەرىپ, تالاپقا باعىنبايتىندار قاتاڭ جازاعا تارتىلۋى ءتيىس دەپ ەسەپتەيمىن», دەپ تۇيىندەدى دەپۋتات ب.بازاربەك.
