سوندىقتان دا شىمقالادا كوپتەگەن مەرەكە, ايتۋلى ءىس-شارا, قايىرىمدىلىق اكتسياسى ۆولونتەرلەردىڭ قاتىسۋىنسىز وتپەيدى. وسى رەتتە ناعىز پاتريوت, قىزمەتى ءۇشىن ەشقانداي اقى المايتىن, حالىققا جاساعان قىزمەتىن مىندەتسىنبەيتىن, رۋحاني قوزعاۋشى كۇشى جۇرتتىڭ العىسىنا بولەنۋ, باتا الۋ بولىپ تابىلاتىن ەرىكتى جاستارعا العىستان باسقا ايتار تىلەك جوق-اۋ, ءسىرا.
بۇل ورايدا مەگاپوليستە حالىقارالىق ۆولونتەرلەر كۇنىنە وراي بىرنەشە ءىس-شارا ۇيىمداستىرىلدى. اتاپ ايتقاندا, «ىزگىلىكتە جارىسايىق» قايىرىمدىلىق قوعامدىق قورىنىڭ باستاماسىمەن «شىمكەنت قالالىق ۆولونتەرلەر» فورۋمى ءوتتى. قور باسشىسى قايرات دارىباەۆ فورۋمنىڭ نەگىزگى ماقساتى تۋرالى ايتىپ بەردى. ول – كوشباسشى, بəسەكەگە قابىلەتتى ۆولونتەر جاستاردىڭ سانىن ارتتىرۋ, ولاردىڭ بويىنداعى جان-جاقتى قابىلەتتەردى وياتۋ. سونداي-اق جيىندا ۆولونتەرلىك توپتار قالاي قۇرىلاتىنى, ونى باسقارۋ قالاي بولاتىنى, جوسپارلاۋدىڭ, بيۋدجەت تارتۋ ماسەلەسىنىڭ نە ەكەنى تەگىس ايتىلىپ, ءتۇسىندىرىلدى.
«شىمكەنت قالاسىندا حالىقارالىق ۆولونتەرلەر كۇنىن قال-قادەرىنشە اتاپ ءوتىپ جاتىرمىز. وسىعان بايلانىستى «شىمكەنت قالالىق ۆولونتەرلەر» فورۋمىن جوعارى دەڭگەيدە ۇيىمداستىرعانىمىزعا قۋانىپ وتىرمىز. بىزدە ماقسات – بىرەۋ. ول «ەرىكتى» ءسوزىن جاستار اراسىندا كوبىرەك ناسيحاتتاۋ, ونىڭ ۇعىمىن تەرەڭىرەك ءتۇسىندىرۋ. بۇگىنگى قوعامعا ءبىلىمدى, مەيىرىمدى, بويىنا بارشا قۇندىلىقتاردى سىڭىرگەن جاستار كەرەك. انشەيىن قۇرعاق سوزبەن ايتا بەرگەن جارامايدى, ءبىزدىڭ قوعام سونداي جاستاردى تاربيەلەپ شىعارۋى قاجەت. جاستار وسى فورۋم اياسىندا جوسپارلاۋدى ۇيرەندى, توپپەن جۇمىس ىستەۋدى مەڭگەردى. كوشباسشىلىق قاسيەتكە قالاي جەتۋدى يگەردى, ۆولونتەرلىك ومىردە قۋانىشتار مەن قيىندىقتار قاتار جۇرەتىنىن ءبىلدى. سمارت ستراتەگياسى جونىندە اقپارات پەن كوپ ماعلۇمات الدى», دەدى «ىزگىلىكتە جارىسايىق» قايىرىمدىلىق قورىنىڭ باسشى ق.دارىباەۆ.
وسى اتالعان ۆولونتەرلەر فورۋمىنا قالادان 50-دەن اسا جاس شاقىرىلىپ, ولار ءتۇرلى سپيكەرلەردىڭ ەرىكتىلەر قوزعالىسىنىڭ باعىتتارى بويىنشا وقۋ-سەمينارلارىنا قاتىستى.
بۇدان بولەك شىمقالادا «مەن دونورمىن» اكتسياسى باستاۋ الدى. جوعارىدا اتاپ وتكەنىمىزدەي, اتالعان اكتسيا تىكەلەي ەرىكتى جاستاردىڭ قاتىسۋىمەن ءوتتى. ال وسىناۋ ءىس-شارانىڭ ۇيىمداستىرىلۋىنا قالالىق ىشكى ساياسات جانە جاستار ىستەرى جونىندەگى باسقارماسىنىڭ «جاستار رەسۋرستىق ورتالىعى» ۇيىتقى بولدى. جاستار ايتقان ۋاقىتتان كەشىكپەي «نۇرسات» شاعىن اۋدانىندا ورنالاسقان قالالىق قان ورتالىعىنا جينالدى. باس-اياعى ەلۋ شاقتى جاس. ولاردىڭ ءبارى – قان تاپسىرۋعا ءوز ەركىمەن كەلگەن قالانىڭ جاس ۆولونتەرلەرى. اكتسيا اياسىندا ماماندار قان مەن ونىڭ كومپونەنتتەرىن قايتا قۇيۋ ارقىلى ادام ءومىرىن قۇتقارىپ قالۋعا بولاتىنىن, دەنساۋلىعىنا قاۋىپ-قاتەر تونگەن جانداردىڭ ءومىرىن ۇزارتۋعا مۇمكىندىك تۋاتىنىن جاستارعا تاپتىشتەپ ءتۇسىندىرىپ بەردى.
جاستار رەسۋرستىق ورتالىعى قوعاممەن بايلانىس جانە اقپاراتتىق تالداۋ ءبولىمىنىڭ باسشىسى اقەركە سۇلتاننىڭ ايتۋىنشا, اتالعان اكتسياعا ەرىكتى جاستار مەن جاستار رەسۋرستىق ورتالىعىنىڭ قىزمەتكەرلەرى قاتىسىپ, ءتيىستى مولشەردە قان تاپسىردى, ءسويتىپ, توتەنشە جاعدايدا كەرەك بولاتىن قاننىڭ قورىن مولايتتى. البەتتە الدىمەن دونورلاردىڭ دەنساۋلىقتارى تولىق تەكسەرۋدەن وتكىزىلەدى, سوسىن قان مولشەرى, گەموگلوبين كورسەتكىشى مەن ءتۇرلى اۋرۋ بەلگىلەرىنىڭ بار-جوقتىعى زەرتحانالىق جولمەن انىقتالىپ, سودان كەيىن عانا قان تاپسىرۋعا رۇقسات بەرىلدى.
م.ساپارباەۆ اتىنداعى وڭتۇستىك قازاقستان گۋمانيتارلىق ينسيتۋتىنىڭ ءبىرىنشى كۋرس ستۋدەنتى ماردان ورىنباي قان ورتالىعىنا كەلىپ, جىل سايىن قان تاپسىراتىنىن ايتتى. ساۋاپتى ءىس جاساۋدان جالىقپاعان ول يگى باستاماعا دوستارىن دا ەرتە كەلىپتى.
«ومىردە ءتۇرلى وقيعا بولادى. وسىنداي كەزدە كەيبىر جاندارعا قان كەرەك بولىپ قالاتىنى ايان. سوندىقتان وزگەلەردىڭ ءومىرىن ساقتاپ قالۋ ءۇشىن قولۇشىمدى سوزۋ مەنىڭ ازاماتتىق پارىزىم دەپ بىلەمىن. وسىلايشا, جاستار رەسۋرستىق ورتالىعىنىڭ باستاماسىمەن قولعا الىنعان «مەن دونورمىن» اكتسياسىنا ءوز ەركىممەن كەلىپ, قان تاپسىرىپ, وزگە جانعا ءۇمىت سىيلاعىم كەلدى. مەنىڭ قان توبىم ءى توپقا جاتاتىندىقتان ءابسوليۋتتى دونور بولا الامىن», دەدى ەرىكتى جاس.
ايتا كەتۋ كەرەك, جوعارىدا اتالعان ورتالىق تۇركىستان وبلىسى مەن شىمكەنت قالاسى بويىنشا 42 مەديتسينالىق مەكەمەنى قان كومپونەنتتەرىمەن قامتاماسىز ەتەدى. مالىمەتكە سۇيەنسەك, جىل باسىنان بەرى 26 مىڭ ازامات وسى مەكەمەگە كەلىپ قان تاپسىرعان.
شىمكەنت
