جىل وتكەن سايىن قازاقستان مەن وزبەكستان اراسىنداعى ارحيۆارالىق بايلانىس ارتىپ كەلەدى. ايتار بولساق, ەكى ەل اراسىنداعى ءوزارا ءىس-قيمىل جوسپارىنا سايكەس قازاقستان مەن وزبەكستان اراسىندا ارحيۆتىك قۇجاتتاردى تولىقتىرۋ, كىتاپتار شىعارۋ, زەرتتەۋ جۇمىستارىن جۇرگىزۋ بويىنشا مۇمكىندىكتەر قاراستىرىلعان.
سونداي-اق «ارحيۆ-2025» كەشەندى جوبا اياسىندا 2022 جىلى ەلىمىزدەگى مەملەكەتتىك ارحيۆ قىزمەتكەرلەرى 14 ەلگە عىلىمي-زەرتتەۋ جۇمىستارىن جۇرگىزىپ, ول جاقتان 7000-نان استام ەل تاريحىنا قاتىستى قۇجات جەتكىزىلگەن كورىنەدى. بۇل قۇجاتتار قازىرگى تاڭدا عىلىمي اينالىمعا ەنگىزىلۋ ءۇشىن ازىرلىك جۇمىستار اتقارىلۋدا. «ەلىمىز ءۇشىن اسا جوعارى ماڭىزعا يە بۇل ىستەر عالىمدار مەن ءتۇرلى زەرتتەۋشىلەر ءۇشىن جاڭا مۇمكىندىكتەرگە جول اشادى», دەيدى ماماندار.
كەزدەسۋ بارىسىندا ەكى ەلارالىق كەلىسىمنىڭ ماڭىزى جايلى كوپشىلىككە تانىستىرىپ, ءسوز سويلەگەن ارحيۆ, قۇجاتتاما جانە كىتاپ ءىسى كوميتەتىنىڭ توراعاسى قۋات بوراش: «مەملەكەت باسشىسى قاسىم-جومارت كەمەل ۇلى بيىلعى جىلى استانادا وتكەن تۇركى مەملەكەتتەرى ۇيىمىنىڭ X سامميتىندە سويلەگەن سوزىندە «تاريحتان سىر شەرتەتىن ورتاق مۇراعاتتى زەرتتەپ, ۇرپاققا اقيقاتتى جەتكىزۋ – ءبىزدىڭ پارىزىمىز. قۇزىرلى ورگاندارىمىزعا بەيمالىم دەرەكتەردى بىرلەسىپ زەردەلەۋدى تاپسىرۋدى ۇسىنامىز. بۇل, شىن مانىندە, ماڭىزدى جۇمىس بولماق, سەبەبى ورتاق تاريحىمىزدا ءالى دە تولىق زەرتتەلمەگەن اقتاڭداقتار بار», دەگەن تاپسىرماسى بارىڭىزگە بەلگىلى. بيىل قازاقستان دەلەگاتسياسى وزبەكستانعا ساپار جاساپ ۋزارحيۆ باسشىلىعىمەن بىرلەسكەن ءىس-شارالار بويىنشا كەلىسىم جۇرگىزگەن بولاتىنبىز. ناتيجەسىندە بۇگىن اتالعان كەلىسىمدى ىسكە اسىرۋدى قۇجات جۇزىندە بەكىتتىك. بۇل - تاريحي ءسات. بۇگىنگى شارا مەملەكەت باسشىسى تمۇ وتىرىسىندا بەلگىلەپ بەرگەن باسىم مىندەتتەردىڭ ۋاقىت وزدىرماي العاشقى بولىپ ناقتى ورىندالىپ جاتقانىنىڭ ايعاعى», دەدى.
