aqorda_resmi
وبلىس باسشىسى وسى جىلى جالپى وڭىرلىك ءونىمى 4,4 تريلليون تەڭگە بولادى دەگەن بولجام جاسالىپ وتىرعانىن ايتتى. ينۆەستيتسيالىق جوبالاردىڭ جالپىۇلتتىق قۇرامىنا ايماقتان قۇنى 1,1 تريلليون تەڭگە بولاتىن 42 جوبا ەنگەن.
بيىل سوماسى 77 ميلليارد تەڭگەنى قۇرايتىن 8 جوبا جۇزەگە اسىرىلىپ جاتىر. ءوڭىردىڭ اگروونەركاسىپ كەشەنىندە 37 ءىرى جوبا ورىندالادى. ولارعا سالىناتىن ينۆەستيتسيا مولشەرى – 236,4 ميلليارد تەڭگە. ەلىمىزدە العاش رەت جىلىنا 4 مىڭ توننا سۇيىق لەتسيتين ءوندىرۋ ءۇشىن كۇنباعىس تۇقىمىن تەرەڭ وڭدەۋ ءادىسى ەنگىزىلىپ جاتىر. شاعىن جانە ورتا بيزنەستى دامىتۋعا قولايلى جاعداي جاسالۋدا. اتاپ ايتقاندا, وسى باعىتتاعى جوبالارعا 22 ميلليارد تەڭگە كولەمىندە قولداۋ كورسەتىلدى. 2024 جىل وبلىستا جول جىلى دەپ جاريالانعانى تۋرالى ايتىلدى. جولداردى جوندەۋگە جانە سالۋعا بولىنەتىن قارجىنى ەكى ەسە ۇلعايتۋ جوسپارلانىپ وتىر. جالپى 600 شاقىرىم جولدى جانە كوشەلەردى جوندەۋ جوسپارلانعان. ريددەر جىلۋ ەلەكتر ورتالىعىندا قالپىنا كەلتىرۋ جۇمىستارى جۇرگىزىلدى. 6 قازاندىق اگرەگاتى جوندەلدى. بۇگىندە ريددەر تۇرعىندارى جىلۋمەن قامتاماسىز ەتىلگەن. شەكارا ماڭىنان مارقاكول جانە كاتونقاراعاي اتتى ەكى جاڭا اۋدان قۇرۋ ماسەلەسىنە ەرەكشە نازار اۋدارىلدى. كەزدەسۋ قورىتىندىسى بويىنشا قاسىم-جومارت توقاەۆ ءوڭىر حالقىنىڭ ءومىر ءسۇرۋ ساپاسىن ارتتىرۋ ماڭىزدى ەكەنىن اتاپ ءوتىپ, شىعىس قازاقستان وبلىسىن الەۋمەتتىك-ەكونوميكالىق تۇرعىدا ودان ءارى دامىتۋعا قاتىستى بىرقاتار مىندەت جۇكتەدى.
