وسى باعىت بويىنشا «جاستار» عىلىمي-زەرتتەۋ ورتالىعىنىڭ ماماندارى 6000 جاس رەسپوندەنت اراسىندا الەۋمەتتانۋلىق زەرتتەۋ جۇرگىزىپ, سونىڭ قورىتىندىسى بويىنشا جاسالعان قازاقستان جاستارىنىڭ پورترەتى تۋرالى ايتىپ بەردى.
«بيىل جاستاردىڭ شەكتى جاسىنىڭ 35-كە دەيىن ۇلعايۋى ەسكەرىلە وتىرىپ الەۋمەتتانۋلىق زەرتتەۋلەرگە سۇيەنىپ, جاستار پورترەتى جاسالدى. بۇل پورترەت دەنساۋلىق, ءبىلىم, جۇمىسباستىلىق, قۇندىلىقتار, قاۋىپسىزدىك, ازاماتتىق جانە ساياسي بەلسەندىلىك سياقتى اسپەكتىلەر بويىنشا جاستاردىڭ بەينەسىن بەرەدى», دەيدى ماماندار.
بيىل «جاستار» عىلىمي-زەرتتەۋ ورتالىعى جۇرگىزگەن الەۋمەتتانۋلىق زەرتتەۋ دەرەكتەرى بۇگىنگى قازاقستان جاستارىنىڭ وتباسىلىق قۇندىلىقتاردى ءبىرىنشى ورىنعا قوياتىنىن كورسەتتى. بۇل 14 پەن 35 جاس ارالىعىنداعى ساۋالناماعا قاتىسقان رەسپوندەنتتەردىڭ 72,6%-ىن قۇرايدى. جاستار اراسىندا وتباسى قۇندىلىعى ۇزاق ۋاقىتتان بەرى العاشقى پوزيتسيالاردا اتالىپ كەلەدى.
«سونىمەن قاتار جاس ازاماتتاردىڭ 64,8%-ى ءوز دەنساۋلىعىن وتە جاقسى باعالايدى, ال حالىقتىڭ جاس بولىگىنىڭ ءاربىر ەكىنشى وكىلى (53,2%) سالاۋاتتى ءومىر سالتىن ۇستانادى», دەيدى ساراپشىلار.
جاستاردىڭ كوپشىلىگى (73%) ءبىلىم الۋ ساپاسىنا ريزا. سونىمەن قاتار ەلىمىزدىڭ جاس تۇرعىندارىنىڭ جارتىسىنان كوبى (56,1%) قوسىمشا ءبىلىم الىپ ءجۇر جانە قازىرگى ۋاقىتتا تاڭدالعان ماماندىق بويىنشا جۇمىسقا ورنالاسۋعا بولادى (53,3%) دەپ سانايدى. ساۋالناماعا قاتىسقانداردىڭ 43%-ى ۇنەمى جۇمىسقا ورنالاسۋ پروبلەمالارىنا تاپ بولاتىنىن اتاپ وتكەن. جۇمىسقا ورنالاسقانداردىڭ ۇشتەن ءبىرى عانا ءوز ماماندىعى بويىنشا جۇمىس ىستەيدى.
سونداي-اق 2023 جىلعا قاراي جاستاردىڭ ساياسي كۇن تارتىبىنە از قاتىسۋى ساقتالىپ وتىر. جاستاردىڭ شيرەگى عانا كۇن سايىن ساياسي جاڭالىقتار مەن وقيعالارعا قىزىعۋشىلىق تانىتادى. ال ازاماتتىق بەلسەندىلىك تۇرعىسىندا ءاربىر ءتورتىنشى رەسپوندەنت جاستار ۇيىمدارىنىڭ قىزمەتىنە جانە سوڭعى 1-2 جىلداعى جوبالارعا قاتىسقانىن حابارلاعان.
سونىمەن قاتار ساۋالناما ناتيجەسى جاستاردىڭ جەكە قاۋىپسىزدىگىنە دەگەن سەنىمدىلىگىنىڭ جوعارى دەڭگەيىن (87,6%) كورسەتەدى. الايدا ساۋالناماعا قاتىسقانداردىڭ 16,3%-ى جەكە دەرەكتەردىڭ, اسىرەسە الەۋمەتتىك جەلىلەردە جاريا بولۋىنان قورعالماعانىن سەزىنەتىنىن ايتقان.
شولۋ قورىتىندىسىنا سۇيەنە وتىرىپ, قازىرگى قازاقستان جاستارىن دەنى ساۋ, ءبىلىمدى, بەلسەندى ءومىر سالتىن ۇستاناتىن, وتباسىن قۇندىلىقتار جۇيەسىندە ءبىرىنشى ورىنعا قوياتىن ازاماتتار دەپ ايتۋعا بولادى. ولار ونەركاسىپتە جۇمىس ىستەۋگە ونشا قىزىعۋشىلىق تانىتپايدى, وزدەرىن سالىستىرمالى تۇردە قاۋىپسىز سەزىنەدى, بىراق جەكە دەرەكتەرىنىڭ قاۋىپسىزدىگىنە كۇمانمەن قارايدى. ولار سونداي-اق قوعامدىق قىزمەتكە بەلسەندى قاتىسادى, بىراق ساياساتقا ونشا قىزىعۋشىلىق تانىتپايدى.
وسى جانە باسقا دا قىزىقتى ۇردىستەر «قازاقستان جاستارى – 2023» ۇلتتىق بايانداماسىندا كورىنىس تاپتى. «جاستار» عىلىمي-زەرتتەۋ ورتالىعى ازىرلەگەن اتالعان قۇجات بيىل ون ءبىرىنشى رەت جاريالانىپ وتىر. جاستار ءومىرىنىڭ نەگىزگى سالالارى مەن ونىڭ جاي-كۇيى جانە ءال-اۋقاتىن تالداۋ قامتىلعان باياندامامەن eljastary.kz سايتىندا تانىسۋعا بولادى.
