سپورتتىڭ بۇل تۇرىنەن الەم چەمپيوناتىنىڭ تۇساۋى 1957 جىلى كەسىلدى. العاشقى جارىس يۋگوسلاۆيادا ۇيىمداستىرىلدى. بۇل باسەكە چەحوسلوۆاكيانىڭ جەڭىسىمەن اياقتالسا, ماجارستان كۇمىس مەدالدى يەلەندى. قولا مەدال جارىس قوجايىندارىنا بۇيىردى. 1957-2021 جىلدار ارالىعىندا تورتكۇل دۇنيەنىڭ ءار قيىرىنان جينالعان كوماندالار 25 رەت باس قوستى. ەڭ كوپ ولجاعا كەنەلگەن نورۆەگيانىڭ قول دوبى شەبەرلەرى. سكانديناۆيالىقتار 4 التىن, 4 كۇمىس جانە 3 قولانى ولجالادى. ەكىنشى ورىندى – رەسەي. كورشىلەرىمىز 4 التىن مەن 1 قولانى قورجىنعا سالدى. ءۇشىنشى ساتىعا كسرو جايعاستى. كەلمەسكە كەتكەن ەلدىڭ وكىلدەرى 3 التىن, 2 كۇمىس جانە 1 قولانى يەلەندى. سونداي-اق ءار كەزدەرى جەڭىس تۇعىرىنا كوتەرىلگەندەر قاتارىندا مىنا مەملەكەتتەردىڭ گاندبولشىلارى بار: گدر (3+0+1), فرانتسيا (2+4+0), ماجارستان (1+4+4), يۋگوسلاۆيا (1+3+3), دانيا (1+2+3), رۋمىنيا (1+2+1), نيدەرلاند پەن چەحوسلوۆاكيا (1+1+1), گەرمانيا (1+0+2), وڭتۇستىك كورەيا (1+0+1), برازيليا (1+0+0), يسپانيا (0+1+1), سەربيا (0+1+0) جانە اۋستريا مەن گفر (0+0+1). بارلىعى وسى 18 كومانداعا عانا جۇلدە الۋ باقىتى بۇيىرعان ەكەن.
قازاقستان قۇراماسى الەمدىك دودادا التى رەت باق سىنادى. 2007 جىلى فرانتسيادا جەرگىلىكتى گاندبولشىلار (20:31) مەن حورۆاتيادان (25:35) ۇتىلىپ, ارگەنتينادان (26:22) ايلامىزدى اسىردىق. ناتيجەسىندە, 24 كوماندانىڭ اراسىنان 18-ورىنعا تابان تىرەدىك. 2009 جىلى قىتاي ەلىندە وڭتۇستىك كورەيا (21:39), قىتاي (13:25), كوت-د’يۆۋار (22:30), جاپونيا (17:33), تۋنيس (22:33) جانە تايلاندتان (23:27) جەڭىلىپ, ارگەنتينا (28:24) مەن چيليگە (32:26) شاڭ قاپتىردىق. قورىتىندى ەسەپتە 22-ورىندى قاناعات تۇتتىق. 2011 جىلى برازيليادا اۋستراليا (37:9) مەن ۋرۋگۆايعا (31:22) ءالىمىز جەتتى. ال وڭتۇستىك كورەيا (19:31), نيدەرلاند (20:32), يسپانيا (18:27), رەسەي (19:34) جانە گەرمانيانىڭ (14:37) الدىندا دارمەنسىزدىك تانىتتىق. وڭتۇستىك امەريكاداعى دودادا بۇيىرعانى – 19-ورىن. 2015 جىلى دانياداعى ناتيجەمىز ودان دا تومەن بولدى. بۇل جولى 22-ورىنعا تۇراقتادىق. توپتىق تۋرنيردە تەگىستەي ۇتىلدىق: يسپانيا (10:31), رۋمىنيا (20:36), نورۆەگيا (19:40), رەسەي (19:42) جانە پۋەرتو-ريكو (27:30). ودان كەيىن كونگونى (31:30) قاپى قالدىرعانىمىزبەن, تۋنيسكە (23:39) جارىتىپ قارسىلىق كورسەتە المادىق. 2019 جىلى جاپونيادا ءدال سول مەجەدەن كورىندىك. كۇن شىعىس ەلىندە قىتايلاردى عانا 29:23 ەسەبىمەن ۇتتىق, قالعان كوماندالار الدىمىزدى وراپ كەتتى. 2021 جىلى يسپانياداعى چەمپيوناتتىڭ العاشقى كەزەڭىندە نورۆەگتەر مەن رۋمىندارعا جول بەرىپ, يراننان مەرەيىمىز ۇستەم بولدى. ەكىنشى كەزەڭدە شۆەتسيا, نيدەرلاند, رۋمىنيا, نورۆەگيا جانە پۋەرتو-ريكو قۇرامالارىنا قارسى ويىنداردا – 133 دوپ ايىرماشىلىعىمەن تاس-تالقانىمىز شىقتى. ناتيجەسىندە, 32 كوماندا اراسىندا 24-ورىندى ەنشىلەدىك.
كەيىنگى الەم چەمپيوناتى وسىدان ەكى جىل بۇرىن يسپانيادا ۇيىمداستىرىلدى. پيرەنەي تۇبەگىندە نورۆەگيالىقتارعا تەڭ كەلەر كوماندا تابىلمادى. توپتىق تۋرنيردەگى بەس ويىننىڭ تورتەۋىن ۇتىپ, بىرەۋىن تەڭ اياقتاعان ولار ءبىرىنشى ورىندى يەلەندى. پلەي-وفف سايىستارىندا رەسەي (34:28), يسپانيا (27:21) جانە فرانتسيا (29:22) قۇرامالارىن جولىنان ىعىستىرىپ, باس جۇلدەنى ولجالادى. ءۇشىنشى ورىن ءۇشىن تارتىستا دانيالىقتار يسپاندىقتاردى (35:29) ۇتتى.
بيىلعى الەم چەمپيوناتىن دانيانىڭ حەرنينگ قالاسىنداعى «يۋسكە-بانك-بوكسەن» (12 500 كورەرمەنگە ەسەپتەلگەن) مەن فريدريحسحافەندەگى «سولتۇستىك ارەنا» (2 800), دانيانىڭ ستاۆەنگەرىندەگى «DNB ارەنا» (5 500) مەن ترونحەيمدەگى «ترونحەيم سپەكترۋم» (8 800) جانە شۆەتسيانىڭ حەلسينبۋرگىندەگى «حەلسينبۋرگ ارەنا» (5 500) مەن گيوتەبورگتاعى «سكانديناۆيۋم» (12 000) سپورت كەشەندەرى قابىلداپ جاتىر.
سكانديناۆيادا جالاۋى جەلبىرەگەن جارىسقا 32 كوماندا قاتىسىپ جاتقانىن ايتتىق. جەرلەستەرىمىز G توبىنا ءتۇستى. قارسىلاستارىمىز – يسپانيا, برازيليا جانە ۋكراينا. پيرەنەي تۇبەگىنىڭ بۇرىمدىلارى 2012 جىلى لوندون وليمپياداسىندا قولا مەدال الىپ, 2011 جانە 2019 جىلدارداعى الەم چەمپيوناتىندا جۇلدەگەرلەر قاتارىنان كورىندى.ەۋروپا چەمپيوناتتارىندا (2018, 2014 جىلدارى) ەكى رەت فينالدا وينادى. برازيليا 2013 جىلى وتكەن دۇنيەجۇزىلىك دودادا الدىنا جان سالمادى. ۋكراينا 2000 جىلعى الەم چەمپيوناتىندا كۇمىسپەن كۇپتەلسە, 2004 جىلى افينا وليمپياداسىندا قولاعا قول جەتكىزدى. مىنە, ءبىزدىڭ قىزدارعا وسىنداي مىقتى قارسىلاستارمەن كۇش سىناسۋعا تۋرا كەلەدى. جەر-جاھاننىڭ مىقتىلارى جينالعان جارىستا قازاقستاننىڭ قول دوبى شەبەرلەرى تابىستى ونەر كورسەتە الماعانىمەن, وتانداستارىمىز ازيا چەمپيوناتىندا 2 التىن مەن 1 قولا جانە ازيا ويىندارىندا 2 كۇمىس پەن 1 قولانى يەلەندى. بالكىم, وسى جولى ەڭ بولماعاندا جارىس كەستەسىنىڭ بەل ورتاسىنا جاقىنداي تۇسەدى دەپ ۇمىتتەنىمىز. اتالعان باسەكە 17 جەلتوقساندا ءوز مارەسىنە جەتەدى.
