سۋرەتتى تۇسىرگەن ەرلان ومار
«قازاق گازەتتەرى» جشس-ءنىڭ باس ديرەكتورى, ۇعا اكادەميگى ديحان قامزابەك ۇلى قوعامنىڭ جەگى قۇرتىنا اينالعان تۇرمىستىق زورلىق-زومبىلىقتىڭ كۇردەلى احۋالى ەلدى تولعاندىرعان وزەكتى ماسەلە ەكەنىن ايتتى. مەملەكەت باسشىسى دا تۇرمىستىق زورلىق-زومبىلىق ماسەلەسى زاڭمەن رەتتەلۋى كەرەكتىگىن تاپسىرعانىن اتاپ ءوتتى. قر پرەزيدەنتى جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيا توراعاسىنىڭ ورىنباسارى ءلاززات سۇلەيمەن «زورلىق-زومبىلىقققا قارسى بەلسەندىلىكتىڭ 16 كۇنى» دەگەن اتپەن باستالعان رەسپۋبليكالىق اكتسيانى قولداپ, اقپاراتتىق دەمەۋشىلىك تانىتقان گازەت ۇجىمىنا العىسىن ءبىلدىردى. «وتباسىلىق تۇرمىستىق زورلىق-زومبىلىققا قارسى ءىس-قيمىل تۋرالى بايانداما جاسالدى. سونىڭ نەگىزىنە سۇيەنە وتىرىپ ايتارىم, تەك زاڭدى قاتاڭداتىپ, نە بولماسا وزگەرتۋ ارقىلى بۇل ماسەلە تۇبەگەيلى شەشىمىن تاپپايدى. زورلىق-زومبىلىقتىڭ نەگىزگى سەبەبى ناشاقورلىق, ماسكۇنەمدىك, قۇمار ويىندارعا تاۋەلدى بولۋ – 55%, الەۋمەتتىك, ەكونوميكالىق سيپاتتاعى پروبلەمالار – 47%, تۇراقتى تابىستىڭ بولماۋىنان تۋىندايتىن زورلىق-زومبىلىقتىڭ ۇلەسى 29%. رەسپوندەنتتەر اراسىندا جۇرگىزگەن زەرتتەۋدىڭ قورىتىندىسى مىناداي: ايەلدەرگە قاتىستى زورلىق-زومبىلىقتىڭ ۇلەسى – 82%, بالالار اراسىندا – 32%, ەگدە جاستاعى قارتتارعا جاسالاتىن زورلىق-زومبىلىق – 11% جانە ەرلەرگە قاتىستى ۇلەسى 10 % جانە مۇگەدەكتەرگە قاتىستى زورلىق كورسەتۋ فاكتىسى 5%. وسى زەرتتەۋدىڭ قورىتىندىسى بويىنشا تۇرمىستىق زورلىق-زومبىلىق دەرەگىنىڭ 68 %-ى نەكەدە تۇرعاندار اراسىندا ورىن العان. 31%-ى تۋىستىق قارىم-قاتىناستا تۋىنداعان», دەدى ءلاززات جاڭىلىسقىزى.
پارلامەنت سەناتىنىڭ دەپۋتاتى جاننا اسانوۆا بۇل قاشاننان دا قوعامنىڭ باس اۋرۋىنا اينالعان باستى ماسەلەسى ەكەنىنە توقتالدى. وتباسى قۇندىلىعى سانالاتىن بالالاردىڭ تاربيەسىندە اعاتتىق جىبەرۋدىڭ اقىرى وراسان وپىنۋعا ۇلاساتىنىن ايتتى. ۇيدەگى بالا تەلەفوننىڭ تۇبىنەن نە كورىپ وتىرعانىن ءجىتى باقىلاۋدا ۇستاماۋدىڭ سوڭى سور بولىپ جابىساتىنىن جەتكىزدى.
دوڭگەلەك ۇستەلگە ءىىم اكىمشىلىك پوليتسيا كوميتەتىنىڭ ەرەكشە تاپسىرمالار جونىندەگى اعا ينسپەكتورى, پوليتسيا پودپولكوۆنيگى اقمارال سەرىكباەۆا, استانا قالاسى اكىمدىگىنىڭ ء«ۇمىت داعدارىس» ورتالىعى كوممۋنالدىق مەملەكەتتىك مەكەمەسى ديرەكتورىنىڭ الەۋمەتتىك جۇمىستار جونىندەگى ورىنباسارى ايگۇل بەردىبەكقىزى, «قازاقستان قوعامدىق دامۋ ينستيتۋتى» كەاق وتباسى جانە گەندەرلىك ساياسات سالاسىنداعى زەرتتەۋلەر ورتالىعىنىڭ جەتەكشى مەنەدجەرى بەكزات ەرمەكباەۆا قاتىسىپ, تۇرمىستىق زورلىق-زومبىلىقتىڭ سالدارىمەن كۇرەسىپ قانا قويماي سەبەبىن ايقىنداپ, كيكىلجىڭنىڭ الدىن الۋ قاجەتتىگى جونىندەگى ويىن ورتاعا سالدى.
