جەتىسۋ رۋحانياتىنىڭ التىن قازىعى تەاتردان باستالسا كەرەك. سوندىقتان ونەر ۇجىمىنىڭ ءار قادامى حالىقتىڭ كوز الدىندا. بيىل 7 ءتۇرلى حالىقارالىق ءھام رەسپۋبليكالىق دودالاردا باق سىناپ, قانجىعالارى بوس قايتپادى. كلاسسيكادان مودەرنگە قاراي بەت تۇزەگەن ونەر ورداسى كەلەر جىلى دا كورەرمەندى كوزايىم ەتۋگە اسىق. ماسەلەن, بىلتىر تەاتردىڭ قويىلىمدارىن تاماشالاۋعا 47 مىڭ ادام كەلسە, بيىل 60 مىڭنان استام تەاترسۇيەر قاۋىم جينالعان.
«وسى جىلدىڭ قازان ايىندا الماتى قالاسىندا وتكەن I حالىقارالىق «Almaty puppet festival» قۋىرشاق تەاترلارى فەستيۆالىنە ۆ.ۆوروبەۆتىڭ «قىرسىق» ەكسپەريمەنتالدى قۋىرشاق قويىلىمىمەن قاتىستىق. بۇل جارتى عاسىرعا جۋىق تاريحى بار كيەلى وردا ءۇشىن ۇلكەن جاڭالىق بولىپ وتىر. سەبەبى تەاترىمىزدىڭ رەپەرتۋارىندا العاش رەت قۋىرشاق قويىلىمى ساحنالانسا ءارى اتالعان قويىلىم تۇڭعىش رەت حالىقارالىق دەڭگەيدە وتكەن قۋىرشاق تەاترلارى فەستيۆالىنە قاتىستى», دەيدى تەاتر ديرەكتورى ەرلىك جۋاسبەك.
بۇگىندە كيەلى وردا جاستارعا قولداۋ كورسەتىپ, جاڭا مۇمكىندىكتەر بەرىپ وتىر. بۇدان ءتالىم العان شاكىرتتەر تەك تەاتر ساحناسىندا عانا ەمەس, وتاندىق فيلم, سەريالداردا دا توبە كورسەتىپ ءجۇر. اتاپ ايتساق, ەركەبۇلان ايدىمباەۆ «اعايىندى», «ادىلەتتىڭ جولى», «قاراسۋ», «Coco & Jambo»-عا, ال مەيىرجان نۇروۆ «برات يلي براك 3», «باتىر يز پروشلوگو», «نۆپ اعاي», «بوزتورعاي جىلى ۇيا» تۋىندىلارىندا ونەر كورسەتىپ, ەكران سىرتىنداعى حالىقتىڭ قوشەمەتىنە يە بولدى.
«وسى جىل ءبىز ءۇشىن ەستە قالاتىن جىل بولدى. جالپى, 7 فەستيۆالعا قاتىستىق. بۇل اكتەرلەر ءۇشىن وتە ۇلكەن مۇمكىندىك بولدى. باسقا رەجيسسەرلەردىڭ ەڭبەگىن كورىپ, ارتىستەرىنىڭ ءوسۋ دەڭگەيىن بىلدىك. ءبىزدىڭ دەڭگەيىمىز قانداي, قاي تۇستا ءوزىمىزدى قامشىلاۋىمىز كەرەكتىگىنە ءمان بەردىك. كوكشەتاۋ قالاسىندا وتكەن «سالەم» حالىقارالىق تەاتر فەستيۆالىنە «قازاقى كومەديا» قويىلىمىمەن قاتىستىق. ونەر بايگەسىندەگى قويىلىم كوكشەتاۋلىقتاردىڭ كوڭىلىنەن شىقتى. جۇرتشىلىق قازاقى كومەديانى جاقسى قابىلدادى», دەيدى تەاتر اكتەرى ەركەبۇلان ايدىمباەۆ. تەاتر قولىنا ەندى ديپلومىن العان جاستارعا مۇمكىندىك بەرىپ كەلەدى. ماسەلەن, «مۇعالىم» سپەكتاكلىندە 90 پايىز جاس اكتەرلەر ونەر كورسەتەدى. بۇل دا – وڭىرلىك تەاتردا بۇرىن-سوڭدى بولماعان ءۇردىس.
«پەتروپاۆل قالاسىندا وتكەن تەمىربەك جۇرگەنوۆتىڭ 125 جىلدىعىنا ارنالعان رەسپۋبليكالىق تەاتر فەستيۆالىنە دە قاتىسقان بولاتىنبىز. وندا باق سىناعان گ.حۋگاەۆتىڭ «قارا شەكپەن» قويىلىمى قازىلار القاسى مەن كورەرمەن قاۋىمنىڭ كوڭىلىنەن شىعىپ, «تەمىربەك جۇرگەنوۆ اتىنداعى ارنايى سىيلىق» اتالىمىن يەلەندى. فەستيۆال وتە جوعارى دەڭگەيدە ءوتتى. سەبەبى مۇندا تەاتر الەمىندەگى كىل مىقتىلاردىڭ باسى بىرىكتى. فەستيۆالدان تاجىريبە جيناپ, وزىمىزگە كەرەگىن الىپ قايتتىق», دەيدى جاس اكتەر مەيىرجان نۇروۆ.
سونىمەن قاتار جاقىندا كۇللى تۇركى حالىقتارىنىڭ باسىن قوسقان تۇرىكمەنستان جەرىندە وتكەن فەستيۆالدا تەاتر ۇجىمى وبلىستىڭ عانا ەمەس, بۇكىل ەلىمىزدىڭ نامىسىن قورعاپ كەلدى. ەل ىشىندە العاش رەت فەستيۆالعا قاتىسقان وبلىستىق تەاتر رەتىندە ەستە قالدى.
«اشحاباد قالاسىندا وتكەن IV حالىقارالىق فەستيۆالدا «قورعانسىزدىڭ كۇنى» قويىلىمىن ۇسىندىق. بۇل ونەر بايگەسىنە قاتىسۋ ارقىلى تەاترىمىز شەتەلدىك ارىپتەستەرىمىزبەن تاجىريبە الماستى», دەيدى ايگەرىم بەكتەمىروۆا.
ايتا كەتەيىك, حالىقارالىق فەستيۆالعا تاتارستان, قىرعىزستان, وزبەكستان, تاجىكستان مەملەكەتتەرىنەن ونداعان تەاتر قاتىسقان. جوعارى دارەجەدە ونەر كورسەتكەن تالدىقورعان دراما تەاترى مينيسترلىك پەن فەستيۆالدىڭ ارنايى كۋبوگىمەن جانە تۇركسوي حالىقارالىق ۇيىمىنىڭ ديپلومىمەن ماراپاتتالدى.
جەتىسۋ وبلىسى
