پرەزيدەنت سايلاۋى ەلدەگى ساياسي وزگەرىستەرگە تۇرتكى بولدى. ناتيجەسىندە, پارلامەنتتىڭ قوس پالاتاسى دا, ءماسليحاتتار دا قايتا سايلانىپ, جاڭارتىلدى, 45 اۋدان مەن وبلىستىق ماڭىزى بار قالادا العاش رەت اكىمدەر سايلاۋى ءوتتى. ارينە, سايلاۋشىلاردىڭ ءوز داۋىستارىنىڭ ماڭىزدىلىعىن تولىق سەزىنۋى ءۇشىن بۇل وتە از ۋاقىت. بىراق سايلاۋ مادەنيەتىنىڭ نەگىزى قالاندى. اۋىل اكىمى, ءماسليحات, پارلامەنت دەپۋتاتتىعىنا سايلاۋعا كوزقاراس وزگەردى. «حالىق – بيلىك, بيلىك – حالىق» دەگەن فورمۋلانى ءدال وسى سايلاۋلار ايقىنداي ءتۇستى.
پرەزيدەنت قاسىم-جومارت توقاەۆتىڭ «ادىلەتتى قازاقستان: ءبارىمىز جانە ارقايسىمىز ءۇشىن. قازىر جانە ءاردايىم» سايلاۋالدى باعدارلاماسىنىڭ باسىم باعىتتارى ورىندالا باستاعانى بەلگىلى. باعدارلامانىڭ ءتۇپ قازىعى ەكونوميكادا ادال جانە ناقتى ەرەجە بەلگىلەۋ بولاتىن. جىلدار بويى تالان-تاراجعا تۇسكەن مەملەكەت بايلىعى قايتارىلا باستادى. شامامەن 1 ترلن تەڭگە سوماسىنداعى زاڭسىز ساتىپ الىنعان اكتيۆتەر ەلگە قايتارىلدى. ەكونوميكانى مونوپولياسىزداندىرۋ بويىنشا جۇيەلى جۇمىس جالعاسىپ كەلەدى. مونوپولياسىزداندىرۋ جونىندەگى كوميسسيا جۇمىسىنىڭ ناتيجەلەرى بويىنشا رەسپۋبليكالىق مەنشىككە ءوتتى.
مەملەكەت سالىقتىق, بيۋدجەت, اقشا-كرەديت جانە تاريفتىك ساياساتتى تەڭگەرىمدى جانە اشىق جۇرگىزىپ, ىشكى ءوندىرىستى جانە شيكىزاتتىق ەمەس ەكسپورتتى ىنتالاندىراتىن بولادى.
ق.توقاەۆ پرەزيدەنت بولعان ءبىرىنشى جىلدا سايلاۋالدى باعدارلاماسىن ىسكە اسىرۋ جونىندە ىرگەلى دايىندىق جۇمىستارى جۇرگىزىلدى. باعدارلامانىڭ ماقساتتارى مەن مىندەتتەرى مەملەكەتتىك ورگانداردىڭ اعىمداعى جوسپارلارىمەن ۇيلەستىرىلدى, ونى ىسكە اسىرۋ ءۇشىن زاڭنامالىق نەگىز جاسالدى.
پرەزيدەنت ءوزىنىڭ سايلاۋالدى باعدارلاماسىندا ەلدى دامىتۋدىڭ جاڭا ەكونوميكالىق ۇلگىسىنە كوشۋدى بەلگىلەپ بەرگەن ەدى. ناتيجەسىندە, 2022-2023 جىلدارى 41,3 ملرد دوللار تىكەلەي شەتەلدىك ينۆەستيتسيا تارتىلدى. ونەركاسىپ سالالارىنىڭ ورتا جانە جوعارى قايتا ءبولۋ ونىمدەرىن وندىرۋگە قاجەتتى بازالىق ماتەريالدىڭ قاجەتتىلىگىنە تالداۋ جۇرگىزىلدى. وتاندىق وندىرۋشىلەر مەن ونەركاسىپتىك-يننوۆاتسيالىق قىزمەت سۋبەكتىلەرى اراسىندا شيكىزات جەتكىزۋ بويىنشا مىندەتتەمەلەردى ەنگىزۋگە باعىتتالعان «ونەركاسىپتىك ساياسات تۋرالى» زاڭعا تۇزەتۋلەر ازىرلەندى. بۇل وڭدەۋشى ونەركاسىپ كاسىپورىندارىنىڭ قولجەتىمدى باعاداعى شيكىزاتپەن تولىق قۋاتىندا قامتاماسىز ەتۋگە مۇمكىندىك بەرەدى.
وندىرۋشىدەن سوڭعى تۇتىنۋشىعا دەيىن تاۋارلاردى وتكىزۋدىڭ اشىقتىعىن قامتاماسىز ەتەتىن تۇتاس كەشەن – ۇلتتىق قاداعالاۋ جۇيەسى ەنگىزىلدى.
مۇنىڭ ءوزى ءبىرىنشى جىلى وڭ وزگەرىستەر بويىنشا جاقسى قارقىنعا قول جەتكىزىلدى دەپ ايتۋعا نەگىز بولادى. مەملەكەت وسى قارقىندى ساقتاپ قالۋعا ءتيىس, ارينە, قوعام مەملەكەتكە بۇل ىستە كومەكتەسۋى كەرەك.
بيبىگۇل جەكسەنباي,
سەنات دەپۋتاتى
