اۋەلگى ومىرلىك تانىمدار بالاباقشادان باستالادى. وبلىستا قازىرگى ۋاقىتتا مەكتەپكە دەيىنگى ءبىلىم بەرۋ ۇيىمدارى جەمىستى جۇمىس ىستەپ تۇر. بۇرىن جابىلعان بالاباقشالار قايتا اشىلىپ, جاڭادان سالىنعاندارى ىسكە قوسىلىپ, بالدىرعانداردىڭ مەكتەپكە دەيىنگى ءبىلىم الۋىنا سەپتىگىن تيگىزىپ جاتىر. سونداي يگىلىكتى ءىس تالدىقورعان تورىندە ورىن الدى. قالاداعى №6 بالاباقشانىڭ عيماراتى كۇردەلى جوندەۋدەن ءوتىپ, ەسىگىن ايقارا اشتى. توقىراۋ كەزىندە وبلىستىق ارحيۆ ورنالاسىپ, كەيىننەن بوس قالعان ەكى بلوك بالدىرعاندارعا بەرىلدى.
– بالاباقشا – كىشكەنتاي بوبەكتەرىمىزدىڭ ءبىلىم ساپارىنا باستايتىن العاشقى قادامى. جاڭا عيمارات زامانعا ساي بارلىق جابدىقپەن قامتىلعان. ماڭايداعى اتا-انالار ەندى الىسقا سابىلماي, جاڭا نىسانعا اكەلەدى, – دەدى وبلىستىق ءبىلىم باسقارماسىنىڭ باسشىسى مارات سۇلەيمەنوۆ.
جوندەۋ جۇمىستارىن «نۇر شاپاعات» قۇرىلىس كومپانياسى جەرگىلىكتى بيۋدجەت قارجىسىنا جۇرگىزگەن. عيمارات 4 بلوكتەن تۇرادى. بۇگىندە 270 بالاعا ارنالعان 11 توپ جۇمىسىن باستادى. ءبىر بوبەكجاي توبى اشىلىپ, مەكەمەنىڭ اتاۋى وزگەردى. كادر ماسەلەسى دە شەشىلىپ, جۇمىسقا كونكۋرس ارقىلى 20 پەداگوگ-مامان, 21 كىشى قىزمەتكەر تارتىلدى. سونىمەن قاتار بالاباقشانىڭ ماتەريالدىق بازاسى جاقسارتىلعان.
ايتا كەتەيىك, بيىل وبلىستا جالپى ورىن سانى 2 260-تى قۇرايتىن مەكتەپكە دەيىنگى ۇيىمدار اشىلدى. ونىڭ ىشىندە 755 ورىندىق 10 جەكەمەنشىك بالاباقشا, اۋداندار بويىنشا 1 505 ورىندىق قوسىمشا توپ جۇمىس ىستەپ جاتىر. سونىڭ ىشىندە تالدىقورعان قالاسىنداعى «ەرسۇلتان», «مونتەسسوري», «ساميلا», پانفيلوۆ اۋدانىنداعى «دارىندى ءسابي», كەربۇلاق اۋدانىنداعى «ميراس» بالاباقشالارىن اتاپ وتۋگە بولادى. وعان قوسا سارقان اۋدانىندا – 75, ەسكەلدى اۋدانىندا 76 ورىندىق قوسىمشا توپ اشىلعان.
سونداي-اق مەملەكەت باسشىسى 2025 جىلعا دەيىن ەلىمىزدە 1 مىڭ مەكتەپ سالۋ مىندەتىن جۇكتەگەن ەدى. بۇل باعىتتا ەلىمىزدە يگى قادامدار جاسالىپ جاتىر. وسى قاتاردا سارقان اۋدانىنداعى جاڭادان پايدالانۋعا بەرىلگەن بىرلىك ورتا مەكتەبىن اتاپ ءوتۋىمىز كەرەك. بىرلىك اۋىلىنداعى ورتا مەكتەپ ىڭعايلاستىرىلعان ۇيدە ورنالاسقاندىقتان, وقۋ ءۇردىسىن جەتىلدىرۋگە, جىلدار بويى وقۋشىلارعا ساپالى ءبىلىم بەرۋگە جان-جاقتى مۇمكىندىك بولماعانى بەلگىلى. مىنە, بيىل كوپشىلىكتىڭ كۇتكەن ءۇمىتى جاندى. جۇرتشىلىق تىلەگى ەسكەرىلىپ, بىرلىك ورتا مەكتەبىنىڭ جاڭا عيماراتى پايدالانۋعا بەرىلدى. مەكتەپتى «قۇرىلىسشى-تبس» جاۋاپكەرشىلىگى شەكتەۋلى سەرىكتەستىگى جۇرگىزىپ, اۋقىمدى قۇرىلىسقا بولىنگەن 1 ملرد 300 ملن تەڭگە تولىق يگەرىلدى. قاراشانىڭ 14-ءى جاڭا مەكتەپ رەسمي تۇردە اشىلىپ, اۋىل تۇرعىندارى قۋانىش كوزايىمى بولدى.
سالتاناتتى ءىس-شارادا سارقان اۋدانىنىڭ اكىمى عالىمجان مامانباەۆ بولاشاققا قادام باسقان شاكىرتتەردىڭ اتا-اناسىن قۋانتىپ, جاڭا مەكتەپتە تەك قانا جاقسى ۇلگەرىمگە جەتەتىنىنە, مەكتەپ تۇلەكتەرىنىڭ ەل ءۇمىتىن اقتايتىنىنا سەنىم ءبىلدىردى. وبلىستىق ءبىلىم باسقارماسى باسشىسىنىڭ ورىنباسارى گۇلميرا احمەتوۆا, اتا-انالار كوميتەتىنىڭ ءتورايىمى گۇلشات تۇمەنباەۆا, بىرلىك ورتا مەكتەبىنىڭ ارداگەر ۇستازى شارا دۇتباەۆا ۇجىمعا ساتتىلىك تىلەسە, سارقان اۋدانىنىڭ قۇرمەتتى ازاماتى تىلەۋلەس دوسانامانوۆ اق باتاسىن بەردى. جاڭا مەكتەپتىڭ لەنتاسى قيىلىپ, جۇرتشىلىق ءبىلىم نەگىزىن قالايتىن التىن ۇيانى ارالاپ, زاماناۋي كابينەتتەرمەن تانىستى.
جەتىسۋ وبلىسى
