اسىرەسە, ماعجان جۇماباەۆ اۋدانىندا كۇردەلى احۋال قالىپتاستى. مۇندا جوعارى ءۆولتتى ۆل-110 كۆ ەلەكتر باعاندارىنا زاقىم كەلىپ, داۋىلعا شىداس بەرمەي, قۇلاپ كەتكەندەرى دە بار. باسقا اۋداندارداعى جاعداي دا ءماز ەمەس. ەلەكتر جارىعىن وشىرۋگە تۋرا كەلگەن سوڭ 183 اۋىلدىق ەلدى مەكەن جارىقسىز قالدى...
وبلىس اكىمى عاۋەز نۇرماعامبەتوۆ جاعدايدى باقىلاۋ جانە تۇزەتۋ ءۇشىن جەدەل شتاب قۇرىلعانىن ايتتى. ونىڭ ايتۋىنا قاراعاندا قازىر ەلەكتر قۋاتىن بەرەتىن رەزەرۆتەگى گەنەراتورلار ىسكە قوسىلىپ, الەۋمەتتىك سالانىڭ عانا نىساندارىنا توق بەرىلگەن. ال جىلۋ ەش كىدىرىسىز بەرىلىپ جاتىر.
سونىمەن قاتار توتەنشە جاعدايلارعا بايلانىستى ەكى ەلدىڭ اراسىنداعى ىنتىماقتاستىق تۋرالى كەلىسىمىنىڭ شەڭبەرىندە رەسەي فەدەراتسياسىنان ۋاقىتشا ەلەكتر قۋاتى الىناتىنى ايتىلدى. قالعانىن اقمولا وبلىسىنىڭ «كوكشەتاۋ-ەنەرگو» جشس قامتاماسىز ەتۋگە كەلىسىلگەن. بۇگىنگى تاڭدا وسى كاسىپورىننىڭ جوندەۋ بريگادالارى جۇمىس ىستەپ, تايىنشا, ايىرتاۋ, ع.مۇسىرەپوۆ اۋداندارىنىڭ 10 ەلدى مەكەنىنە ەلەكتر قۋاتىن جەتكىزۋ جۇمىستارىن جۇرگىزۋدە.
وبلىستاعى ەلەكتر قۋاتىن جەتكىزەتىن جۇيەلەردىڭ ءبارى «سەۆكازەنەرگو» اكتسيونەرلىك قوعامدىكى. قازىر ولاردىڭ 46 جوندەۋ بريگاداسى جۇمىس ىستەپ جاتىر. ولار ەلەكتر قۋاتى ءسونىپ قالعان 30 ەلدى مەكەننىڭ جەلىلەرىن جوندەۋمەن اينالىسۋدا. سونىمەن بىرگە عاۋەز نۇرماعامبەتوۆ بۇگىنگى تاڭدا ءالى 40 ەلدى مەكەنگە توق شەكتەۋلى كولەمدە عانا جەتكىزىلىپ وتىرعانىن دا ايتىپ ءوتتى.
وبلىستىڭ ەنەرگەتيكا جانە تۇرعىن-ءۇي كوممۋنالدىق شارۋاشىلىعىنىڭ باسشىسى ۆلاديسلاۆ لۋكين تۇرعىنداردى اۋىز سۋمەن قامتاماسىز ەتەتىن «ەسىل سۋ» كومپانياسىنىڭ فيليالى تۇراقتى جۇمىس ىستەپ تۇرعانىن جەتكىزدى. سونىمەن بىرگە ول ەلەكتر جەلىلەرى مەن جاراقتار «سەكازەنەرگو» اق بولعاندىقتان جوندەۋ جۇمىستارىنا بيۋدجەت قاراجاتى بولىنبەيتىنىن ايتتى. «وسىنداي جاعدايعا جالعىز جەلىنى قاتىرعان قارلى-جاڭبىر ەمەس ەلەكترمەن قامتاماسىز ەتۋ جۇيەلەرىنىڭ توزعاندىعى دا جەتكىزىپ وتىر. قازىر بۇل ماسەلە وبلىس اكىمىنىڭ تىكەلەي باقىلاۋىندا», دەدى ول.
وبلىس اۋماعىنان وتەتىن استانا-پەتروپاۆل, جەزقازعان-پەتروپاۆل, الماتى-ەكاتەرينبۋرگ, كوكشەتاۋ-رۋزاەۆكا باعىتىنداعى اۆتوكولىك جولدارى جابىلدى. بىلەتىندەردىڭ ايتۋىنا قاراعاندا مۇنداي اۋا رايى وسىدان 22 جىل بۇرىن بولعان ەكەن.
