ءىىم ەكسترەميزمگە قارسى ءىس-قيمىل دەپارتامەنتىنىڭ اسا ماڭىزدى ىستەر جونىندەگى اعا جەدەل ۋاكىلى ازامات حاسەنوۆتىڭ ايتۋىنشا, 2022 جىلمەن سالىستىرعاندا بيىل مۇنداي قىلمىستاردىڭ شامامەن 12 پايىزعا وسكەنى بايقالدى. ماسەلەن, ەگەر وتكەن جىلدىڭ 10 ايىنىڭ قورىتىندىسى بويىنشا 141 قىلمىستىق ىسكە تەرگەۋ جۇرگىزىلسە, بيىل 160 قىلمىستىق ءىس تەرگەلىپ جاتىر.
«جىل باسىنان بەرى تەرروريزم اكتىسى تۋرالى كورىنەۋ جالعان حابار بەرگەنى ءۇشىن 39 ادام قىلمىستىق جاۋاپكەرشىلىككە تارتىلدى. ونىڭ ىشىندە ءتۇرلى جازا تاعايىندالىپ, 12 ادام سوتتالدى: باس بوستاندىعىنان ايىرۋ جازاسىنا – 3 ادام, باس بوستاندىعىن شەكتەۋ جازاسىنا 7 ادام تارتىلدى, ءبىر ادامعا ايىپپۇل سالىنسا, ءبىر ادامعا مەديتسينالىق سيپاتتاعى ماجبۇرلەۋ شاراسى بەلگىلەندى», دەدى سپيكەر.
ايتا كەتەتىن جايت مۇنداي حابارلامالار استانا جانە الماتى سياقتى ءىرى قالالاردان ءجيى كەلىپ تۇسەدى ەكەن.
«سوڭعى ۋاقىتتا قاراعاندى جانە شىعىس قازاقستان وبلىستارىندا «ەلەكتروندىق جالعان تەرروريزم» جاعدايلارى كوبەيدى. جارىلعىش زات قويىلدى دەگەن حابارلامالاردا كوبىنەسە كولىك قۇرالدارى, ءبىلىم بەرۋ, دەنساۋلىق ساقتاۋ جانە سوت مەكەمەلەرى كورسەتىلەدى», دەپ اتاپ ءوتتى ازامات حاسەنوۆ.
سونىمەن قاتار بۇل قىلمىس ءۇشىن قىلمىستىق جاۋاپكەرشىلىك 14 جاستان باستالاتىنىن ەسكە سالدى.
«تەرروريزم اكتىسى تۋرالى كورىنەۋ جالعان حابار بەرگەنى ءۇشىن پوليتسيا بيىل 14 كامەلەتكە تولماعان بالانى ۇستادى. الماتىدا – 6, قاراعاندى وبلىسىندا – 4, استانا, جامبىل, ماڭعىستاۋ مەن پاۆلودار وبلىستارىندا ءبىر ادامنان. سونداي-اق ولاردىڭ بارلىعىنىڭ اتا-انالارى بالا تاربيەسىنە قاتىستى ءتيىستى شارالاردى قابىلداماعانى ءۇشىن اكىمشىلىك جاۋاپكەرشىلىككە تارتىلدى. ولارعا ۇلكەن سومادا ايىپپۇل سالىندى», دەدى اعا جەدەل ۋاكىل.
ايتا كەتەيىك, تەرروريزم اكتىسى تۋرالى كورىنەۋ جالعان حابارلاما ءۇشىن قىلمىستىق كودەكستىڭ 273-بابىنىڭ سانكتسياسى 5000 اەك (بۇل 17 ملن تەڭگەدەن استام) مولشەرىندە ايىپپۇل سالۋدى نەمەسە بەس جىلعا دەيىن باس بوستاندىعىنان ايىرۋدى يا شەكتەۋدى كوزدەيدى. سونىمەن قاتار سوت شەشىمى بويىنشا وبەكتىگە كەلتىرىلگەن زالالدى تولەۋگە تۋرا كەلەدى. بۇل سوما 200 مىڭنان 2 ملن تەڭگەگە دەيىن جەتەدى.
