قونىستاندىرۋ وڭىرلەرىندە 2023 جىلعا ارنالعان قانداستاردى قابىلداۋ كۆوتاسى 2 337 ادامدى قۇرايدى. 1 قاراشاداعى جاعداي بويىنشا قونىستاندىرۋ وڭىرلەرىنە 1 870 قانداس قونىس اۋداردى.
اتالعان وڭىرلەردە قونىستانعان قانداستارعا كوشۋگە سۋبسيديا تۇرىندە – ءبىر مەزگىلدە وتاعاسىنا جانە وتباسىنىڭ ءاربىر مۇشەسىنە 70 اەك (241,5 مىڭ تەڭگە) مولشەرىندە; تۇرعىن ءۇي جالداۋعا جانە كوممۋنالدىق قىزمەتتەرگە اقى تولەۋگە – ءبىر جىل ىشىندە 15-تەن 30 اەك (51,7-دەن 103,5 مىڭ تەڭگەگە دەيىن) مولشەرىندە مەملەكەتتىك قولداۋ شارالارى ۇسىنىلادى.
جىل باسىنان بەرى 1254 قانداسقا ءتۇرلى قولداۋ شارالارى كورسەتىلدى. ناقتى اتاعاندا, 522 ادام تۇراقتى جۇمىسقا ورنالاستىرىلدى, 1254 ادام بىرجولعى سۋبسيديا الدى, ال 513 قانداسقا تۇرعىن ءۇي شىعىندارى سۋبسيديالاندى.
سونىمەن قاتار ەرىكتى قونىس اۋدارۋدىڭ تيىمدىلىگىن ارتتىرۋ ماقساتىندا ازاماتتاردى سولتۇستىك وڭىرلەرگە قونىس اۋدارۋعا قاتىساتىن جۇمىس بەرۋشىلەردى قولداۋ بويىنشا ينستيتۋتسيونالدىق شارالار قابىلداندى. تۇرعىن ءۇي ساتىپ الۋ, سالۋ ءۇشىن نەمەسە يپوتەكالىق تۇرعىن ءۇي قارىزدارى بويىنشا باستاپقى جارنانىڭ ءبىر بولىگىن جابۋ ءۇشىن ەكونوميكالىق ۇتقىرلىق سەرتيفيكاتى تۇرعىن ءۇي قۇنىنىڭ 50%-ى نەمەسە ءبىر وتباسىنا 4 ملن تەڭگەگە دەيىن مولشەرىندە بىرجولعى وتەۋسىز جانە قايتارىمسىز نەگىزدە ەنگىزىلدى.
ەستەرىڭىزگە سالايىق, بيىل پيلوتتىق رەجيمدە قازاقستان ەلشىلىكتەرى ارقىلى ء«بىر تەرەزە» قاعيداتى بويىنشا قانداس مارتەبەسىن بەرۋ تەتىگى ىسكە اسىرىلدى. پيلوتتىق جوبا شەڭبەرىندە ەلىمىزگە بارۋ, جۇمىس ورنى, تۇرعىن ءۇي بەرۋ مۇمكىندىكتەرى تۋرالى ماسەلەنى شەشۋگە جانە رەسپۋبليكا اۋماعىنا كىرمەي-اق قانداس مارتەبەسىن الۋعا بولادى. قازىرگى ۋاقىتتا رەسپۋبليكانىڭ شەت ەلدەردەگى مەكەمەلەرى ارقىلى ەتنيكالىق قازاقتاردان جاڭا فورماتتا 2 058 ءوتىنىش (690 وتباسى) قابىلدانعان.
