ۇلتتىق ويىندار چەللەندجىنە وراي ۇيىمداستىرىلعان شارادا وقۋشىلار VR-كوزىلدىرىكتىڭ كومەگىمەن اسىق اتىپ, 3D پرينتەر ارقىلى ساقا جاسادى.
وقۋ-اعارتۋ مينيسترلىگىنىڭ 17 قاراشادا ەلىمىزدىڭ بارلىق مەكتەبىندە ءبىر مەزگىلدە ۇلتتىق ويىنداردان جارىس وتكىزۋ تۋرالى حابارلاندىرۋىنا بايلانىستى كىتاپحانا ۇجىمى اتالعان كۇندى زامان تالابىنا ساي ۇيىمداستىرۋدى ءجون كورگەن.
– قازاقتىڭ ۇلتتىق ويىندارىنان الارىمىز كوپ. اسىق اتۋدان باستاپ بەستاس سىندى ويىندارىمىز بۇگىنگى قوعامعا وتە كەرەك دەپ ويلايمىن. سەبەبى قازىرگى بالالارعا بۇل ويىنداردىڭ بەرەرى مول. كوشپەلى حالقىمىز ويىن ارقىلى بالانىڭ دامۋىنا, وي ءورىسىنىڭ كەڭەيۋىنە ىقپال ەتە بىلگەن. مىسالعا, بەستاستى الىپ قاراساق, ول بالانى ەپتىلىككە, ۇشقىرلىققا باۋليدى. جىلدام شەشىم قابىلداپ, ۇتقىر بولۋعا ۇيرەتەدى. ءتىپتى بالا ءتىلىنىڭ جەتىلۋى دە وسى ويىنعا بايلانىستى, – دەيدى كىتاپحانا قىزمەتكەرى ايداريعا ءاشىراپ.
ءىس-شارا بارىسىندا وقۋشىلارعا ۇلتتىق قۇندىلىقتارىمىز بەن ۇلتتىق ويىندارىمىز دارىپتەلىپ, بەستاس, توعىزقۇمالاق, اسىق اتۋدان ويىن ءوتتى. زاماناۋي تەحنولوگيامەن جابدىقتالعان كيىز ۇيدە بالدىرعاندار VR كوزىلدىرىك كومەگىمەن كوشپەندىلەر ومىرىنە ساياحاتتاپ, ۇلتتىق ويىنىمىز اسىق اتۋدى ونلاين رەجىمدە دە ويناپ كوردى. ۇلتتىق ويىنعا وسكەمەن قالالىق مادەنيەت جانە تىلدەردى دامىتۋ ءبولىمىنىڭ باسشىسى الماز بولات ۇلى دا قاتىسىپ, بەستاستان باعىن سىناپ كوردى. اسىر سالا ويناپ جۇرگەن بالالارعا ساتتىلىك تىلەدى.
وسكەمەن
