دارىگەر ءازيزا ابدىراسىلقىزى قىس مەزگىلىندە تىنىس الۋ جولدارىنىڭ جەدەل ۆيرۋستى ينفەكتسياسىمەن قابىنۋى (جرۆي) جيىلەيتىنىن ايتادى. بالالارداعى جرۆي-ءدىڭ كوبەيۋى جىلىتۋ ماۋسىمىمەن تىكەلەي بايلانىستى بولىپ شىقتى.
«قىس مەزگىلىندە بالالار اراسىنداعى ءجيى كەزدەسەتىن اۋرۋ – تىنىس الۋ جولدارىنىڭ جەدەل ۆيرۋستى ينفەكتسيامەن قابىنۋى (جرۆي). ينفەكتسيانىڭ ءبىرىنشى كىرۋ قاقپاسى – مۇرىن. سوندىقتان مۇرىندى ءجيى شايىپ, ىلعالداندىرىپ وتىرۋ كەرەك. بالالار قىس مەزگىلىندە نەلىكتەن جرۆي-مەن ءجيى اۋىرادى؟ سەبەبى جىلىتۋ ناۋقانى باستالادى. ءۇي ىستىق, ىستىق گرادۋستا اۋا قۇرعايدى. قۇرعاق اۋانىڭ اسەرىنەن مۇرىننىڭ شىرىشتى قاباتى كەۋىپ, شىرىش قويۋلانىپ, ينفەكتسيا كوبەيە باستايدى. ەگەر دۇرىس كۇتىم جاسالماسا, ينفەكتسيا تومەندەپ, لارينگيت, برونحيت, پنەۆمونياعا دەيىن ۇلاسادى. سوندىقتان قىس ايىندا بولمەنىڭ اۋا تەمپەراتۋراسىن قاتتى كوتەرمەۋ كەرەك. ىستىق بولمەدە بالالار جەڭىل جازدىق كيىممەن جۇرگەنشە, قوڭىرسالقىن بولمەدە جۇقا شالبار, ۇزىن جەڭ كيىممەن جۇرگەنى تيىمدىرەك. ياعني, اۋا قۇرعاق بولماسا مۇرىن شىرىشتى قاباتى كەپپەيدى. شىرىش قويۋلانباسا, ينفەكتسيا دا كوبەيمەيدى دەگەن ءسوز», دەدى دارىگەر.
اۋرۋ اسقىنعاندا اتا-انا ابدىراپ قالادى. ولار ارنايى دارىگەرگە جۇگىنۋدەن عالامتورداعى كەڭەسكە قۇلاق تۇرۋگە قۇمار. دارىگەر ءازيزا ابدىراسىلقىزى جرۆي كەزىندە تاعايىندالاتىن ارنايى ەمنىڭ جوعىن ايتىپ, ءتيىمدى ەم-شارانى دارىگەر مامان عانا ۇسىنا الاتىنىن ەسكەرتەدى.
«جرۆي-دە ارنايى ەم جوق. ەم سيمپتومدى جۇرگىزىلەدى. ياعني جىلى سۇيىقتىق بەرىپ, مۇرىندى ءجيى شايۋ كەرەك. بالاعا قوسىمشا د جانە س دارۋمەندەرىن بەرۋ قاجەت. قىزۋى كوتەرىلسە پاراتسەتامول, يبۋپروفەن دارىلەرىن قولدانعان دۇرىس», دەدى پەدياتر.
بەيقامدىلىق سالدارى اۋىر بولۋى بەك مۇمكىن. سوندىقتان اتا-انا اۋرۋدىڭ العاشقى بەلگىلەرىن بايقاعاننان ارەكەتكە كوشۋى كەرەك. ەگەر اۋرۋ العاشقى ساتىدان ءوتىپ, سالدارى سالماقتانسا جرۆي كەزىندە نازار اۋدارۋعا ءتيىس دابىل بەلگىلەرىن ەستە ساقتاعان ءجون.
«جرۆي كەزىندە اۋرۋ اسقىنىپ, بالا جاعدايى ناشارلاپ, السىرەپ جاتسا دەرەۋ دارىگەردىڭ كومەگىنە جۇگىنۋ كەرەك. سونىمەن قاتار مىنا تومەندەگى بەلگىلەر دابىل بەلگى بولىپ تابىلادى:
- تىنىس الۋدىڭ جيىلەۋى, ەنتىگۋ;
- جوتەلدىڭ كۇندەگىدەن كۇشەيۋى;
- بالا ەمبەي, سۋ ىشۋدەن باس تارتقان جاعدايدا;
- 2 اپتادان ۇزاققا سوزىلعان جوتەل».
بالالاردا قىس ايلارىندا ءورشيتىن جرۆي-ءدىڭ جيىلەۋ سەبەبى قاراپايىم قاعيدالاردى ەسكەرمەۋ. ال اۋرۋدى اسقىندىرماۋدىڭ امالى ساۋاتتى كومەك, اعزاداعى دابىل بەلگىلەرىنە دەر كەزىندە كوڭىل ءبولۋ, قاجەت ەم-شارانى قابىلداۋ.
