وبلىس اكىمى ەرماعانبەت بولەكپاەۆ وڭىردەگى قاتتى داۋىل سالدارىن جويۋ ءۇشىن توتەنشە جاعداي رەجيمىن ەنگىزۋدى تاپسىردى. قازىر قۇتقارۋشىلار ىسكە كىرىسكەن. قۇرباندار مەن زارداپ شەككەندەر جوق.
وبلىستاعى قازىرگى احۋالدى تج دەپارتامەنتىنىڭ باستىعى مۇرات قاتپانوۆ باياندادى:
«18-19 قاراشادا ايماقتا قاتتى جەلدىڭ سالدارىنان 114 تۇرعىن ءۇي مەن ءارتۇرلى عيماراتتاردىڭ شاتىرىنا, قابىرعاسىنا زاقىم كەلدى. قيراعان شاتىردىڭ جالپى اۋدانى — 18 947 شارشى مەتر. قاراعاندى, تەمىرتاۋ, بالقاش, شاحتينسك, اقتوعاي, اباي, بۇقار جىراۋ, وساكاروۆ, نۇرا, قارقارالى جانە شەت اۋداندارىنىڭ اۋماعىندا ەلەكتر ەنەرگياسى ءىشىنارا ءوشىپ قالدى. قازىرگى ۋاقىتتا وبلىستىڭ ەلدى مەكەندەرىنىڭ باسىم بولىگى ەلەكتر ەنەرگياسىنا قوسىلعان, ءۇش قالادا جانە ءتورت اۋداندا اۆاريالىق جۇمىستار جالعاسىپ جاتىر. سونداي-اق اعاشتاردىڭ قيراۋى مەن قۇلاۋ قاۋپى تۋرالى 85 حابار ءتۇستى», دەدى مۇرات قاتپانوۆ.
شاتىرى مەن قاپتاماسىنا زاقىم كەلگەن ۇيلەردى قالالىق اكىمدىك جوندەپ بەرەدى.
وبلىس اكىمى بارلىعىن زاڭ اياسىندا جاساۋدى تاپسىردى.
