تۇساۋكەسەر راسىمىندە جۋرنالدىڭ ء«ال-ءجابردىڭ اتاسى» دەپ اتالۋ سەبەبىنە توقتالعان باس رەداكتور, بەلگىلى ماتەماتيك, اكادەميك اسقار جۇمادىلداەۆ «اتاقتى ء«ال-ءجابر ءۋا-ل مۋقابالا» كىتابىنىڭ اۆتورى مۇحاممەد ءال-حورەزمي ارال تەڭىزى ماڭىنداعى حورەزم شاھارىندا دۇنيەگە كەلگەن. تۇران جەرىندە تۋىپ, الەمدىك وركەنيەتكە وراسان زور ۇلەس قوسقان ويشىل بۇكىل الەمگە ورتاق تۇلعا. سوندىقتان جۋرنالدىڭ اتاۋىن الەمگە اتى ءماشھۇر عالىمنىڭ اتىمەن اتادىق. مەنىڭ بالا كۇنىمدە – «قازاقستان پيونەرى», «بالدىرعان», ء«بىلىم جانە ەڭبەك» سياقتى بىزدەر وقيتىن ەكى-ءۇش جۋرنال بولاتىن. ەلىمىزدە 10 مىڭنان اسا گازەت-جۋرنال شىعادى ەكەن. بىراق سونىڭ اراسىندا عىلىمعا ارنالعان جۋرنال دا, گازەت تە جوق. سول سەبەپتى وسى جۋرنالدى شىعارۋدى ماقسات ەتتىم. «Qalan.kz» پلاتفورماسىنىڭ قولداۋىمەن وسى ويىمدى جۇزەگە اسىرۋ مۇمكىندىگى تۋدى», دەپ ماسەلەنىڭ ءمانىسىن ءتۇسىندىردى.
جۋرنالدىڭ عىلىمي رەداكتورى اسىلتاي تاسبولات وزدەرىنىڭ تۇراقتى ايدارلارىمەن تانىستىرىپ ءوتتى. «زەرتتەۋلەر» ايدارىندا جەر پلانەتاسىنا قاتىستى دەرەكتەر, ماتەماتيكامەن تىعىز بايلانىستى فيزيكا, استرونومياعا بايلانىستى ماقالالار جاريالانىپ, عىلىم سالاسىندا جەتىستىككە جەتكەن جاستاردى ناسيحاتتاۋ دا نازاردان تىس قالمايدى. ۇلتتىق عىلىم اكادەمياسىمەن بىرلەسكەن جوبالار, «عىلىم قازىعى», «قاتەنى تاپ», «قازاقى ولشەمدەر», «جاڭارعان ۇلتتار», سونداي-اق ء«ال-ءجابردىڭ تەرمينكومى» ايدارلارى بالالار ءۇشىن تارتىمدى ماقالالارمەن ەرەكشەلەنبەك.
شىعارۋشى رەداكتور ورالاي الەيداروۆانىڭ ايتۋىنشا, جۋرنالدى شىعارماستان بۇرىن عىلىمدى ناسيحاتتايتىن باسىلىمدارعا شولۋ جاسالىپ, جاريالاناتىن ماقالالاردا وقۋشىلاردىڭ جاس ەرەكشەلىكتەرى دە ەسكەرىلەتىن بولادى. ونداعى ماقالالار بالالارعا تۇسىنىكتى تىلمەن, كوڭىلگە قونىمدى ەتىپ جازىلعان. ال ءاربىر ماقالا رابيعا ساتىبالدى سالعان يلليۋستراتسيالارمەن بەزەندىرىلىپ وتىر.
جۋرنالدى تانىستىرۋ راسىمىندە «Qalan.kz» جاريالاعان ماتەماتيكالىق وليمپيادانىڭ بيىلعى جەڭىمپازدارىنا اقاشالاي سىيلىقتار تابىس ەتىلدى.
الماتى
